ប្រធានអង្គការសហប្រជាជាតិ ផ្ញើសារជូនលោកនាយករដ្ឋមន្ត្រី ហ៊ុន សែន ដើម្បីចូលរួមរំលែកទុក្ខចំពោះមរណភាពកងទ័ពមួកខៀវកម្ពុជា នៅប្រទេសម៉ាលី
ប្រធានអង្គការសហប្រជាជាតិ ផ្ញើសារជូនលោកនាយករដ្ឋមន្ត្រី ហ៊ុន សែន ដើម្បីចូលរួមរំលែកទុក្ខចំពោះមរណភាពកងទ័ពមួកខៀវកម្ពុជា នៅប្រទេសម៉ាលី
លោក Antonio Guterres អគ្គលេខាធិការអង្គការសហប្រជាជាតិ បានផ្ញើសារលិខិតជូនលោកនាយករដ្ឋមន្ត្រី ហ៊ុន សែន ដើម្បីចូលរួមរំលែកទុក្ខចំពោះមរណភាពរបស់នាយទាហានមួកខៀវមួយរូប នៅប្រទេសម៉ាលី កាលពីចុងខែឧសភា កន្លងទៅនេះ។
តាមរយៈសារលិខិត លោក Antonio Guterres បានបញ្ជាក់យ៉ាងដូច្នេះថា៖ «ខ្ញុំបានទទួលដំណឹងដ៏ក្រៀមក្រំបំផុត ចំពោះមរណភាពរបស់កម្លាំងគាំទ្រថ្នាក់ជាតិកម្ពុជា នៃបេសកកម្ម រក្សាស្ថិរភាពចម្រុះនៅសាធារណរដ្ឋម៉ាលី (MINUSMA) ក្នុងទីក្រុងហ្គាវ (GA0) កាលពីថ្ងៃ២៩ ខែឧសភា ឆ្នាំ២០២០ កន្លងមក»។
លោកបន្តថា៖ «ក្នុងឱកាសដ៏សោកសៅនេះ ខ្ញុំសូមចូលរួមរំលែកសមានទុក្ខដោយស្មោះអស់ពីដួងចិត្ត ចំពោះក្រុម គ្រួសារនៃសព និងរាជរដ្ឋាភិបាលកម្ពុជាលើការបាត់បង់ជីវិតដ៏សោកសង្រេងនេះ ព្រមទាំងសូមសម្ដែងនូវការ កោតសរសើរចំពោះការចូលរួមចំណែក ដែលបានធ្វើឡើងដោយជនរួមជាតិរបស់ សម្ដេចតេជោនាយករដ្ឋមន្ត្រី ដល់កិច្ចការងាររក្សាសន្តិភាពរបស់យើង នៅសាធារណរដ្ឋម៉ាលី។ ខ្ញុំសូមអះអាងចំពោះ សម្ដេចតេជោនាយករដ្ឋមន្ត្រីថា អង្គការសហប្រជាជាតិ (អ.ស.ប.) ក្នុងកិច្ចសហប្រតិបត្តិការជាមួយបណ្ដារដ្ឋាភិបាលនៃប្រទេសម្ចាស់ផ្ទះ ប្ដេជ្ញាពង្រឹងកិច្ចខិតខំថែមទៀត ក្នុងការកាត់បន្ថយផលប៉ះពាល់ និងទប់ស្កាត់ការរីករាលដាលនៃជំងឺកូវីដ-១៩ លើបេសកកម្មរក្សាសន្តិភាពរបស់យើង»។
លោកអះអាងថា «ស្របពេលនៃការចាត់វិធានការក្នុងការធានាសុវត្ថិភាព និងសន្តិសុខ របស់កងកម្លាំងរក្សាសន្តិភាព និងបុគ្គលិកដទៃទៀត បេសកកម្មនានារបស់យើង នឹងខិតខំបន្តផ្តល់អាណត្តិរបស់ពួកគេ។ ក្នុងន័យនេះ ខ្ញុំសូមសម្ដែងជាថ្មី នូវអំណរគុណយ៉ាងជ្រាលជ្រៅបំផុត ចំពោះការគាំទ្រដ៏មុតមាំរបស់ សម្ដេចតេជោនាយករដ្ឋមន្ត្រី ដល់អ.ស.ប. និងជាពិសេសដល់ប្រតិបត្តិការរក្សាសន្តិភាព»។
សូមបញ្ជាក់ថា កាលពីថ្ងៃទី២៩ ខែឧសភា ឆ្នាំ២០២០ កន្លងទៅនេះ មានកងកម្លាំងរក្សាសន្តិភាពកម្ពុជា១រូប បានបាត់បង់ជីវិត បន្ទាប់ពីឆ្លងជំងឺកូវីដ-១៩ នៅប្រទេសម៉ាលី។ ទាហានដែលបានទទួលមរណភាពនេះ គឺលោកឧត្តមសេនីយ៍ទោ ស សាវី អាយុ៦៣ឆ្នាំ មានទីលំនៅភូមិចុងបឹង ឃុំម្កាក់ ស្រុកអង្គស្នួល ខេត្តកណ្តាល។
រហូតដល់ពេលនេះ កម្ពុជាមានកងកម្លាំង៥កង សរុបចំនួន៧៨៧នាក់ កំពុងបំពេញបេសកកម្មរក្សាសន្តិភាព ក្រោមឆ័ត្ររបស់អង្គការសហប្រជាជាតិ ក្នុងនោះមានលីបង់, ស៊ូដង់, ស៊ូដង់ខាងត្បូង, ម៉ាលី និងអាហ្វ្រិកកណ្តាល៕
