ក្រសួងអប់រំ គ្រោងបញ្ជូនសិស្សកម្ពុជា ទៅរៀនផលិតមនុស្សយន្ត នៅប្រទេសចិន
ក្រសួងអប់រំ គ្រោងបញ្ជូនសិស្សកម្ពុជា ទៅរៀនផលិតមនុស្សយន្ត នៅប្រទេសចិនភ្នំពេញ៖ មន្ត្រីជាន់ខ្ពស់នៃក្រសួងអប់រំយុវជន និងកីឡាបានឲ្យដឹងថា នៅចុងឆ្នាំ២០១៨នេះក្រសួងគ្រោងនឹងបញ្ជូនសិស្សកំរិតថ្នាក់វិទ្យាល័យប្រមាណជាង៣០នាក់ឲ្យទៅបន្តការសិក្សាពីជំនាញផលិតរ៉ូបូត ឬ មនុស្សយន្តនៅសាកលវិទ្យាល័យហាប៊ីននៃប្រទេសចិនដើម្បីស្របទៅតាមសម័យបដិវត្តន៍ឧស្សាហកម្មទំនើបខណៈប្រទេសជឿនលឿនមួយចំនួនបាននឹងកំពុងប្រើរ៉ូបូតធ្វើការជំនួសមនុស្សនោះ។
ថ្លែងប្រាប់អ្នកសារព័ត៌មានក្រោយជួបជាមួយគណៈប្រតិភូសាកលវិទ្យាល័យហាប៊ីននៃប្រទេសចិននៅវិទ្យាល័យព្រះស៊ីសុវត្ថិកាលពីព្រឹកថ្ងៃទី២៤មេសា លោក អ៊ឹម កុច រដ្ឋលេខាធិការក្រសួងអប់រំយុវជននិងកីឡាបានមានប្រសាសន៍ថា សិស្សទាំងនោះនឹងទៅសិក្សាទៅលើជំនាញផ្សេងៗ ដូចជារបៀបធ្វើរ៉ូបូត វិទ្យាសាស្ត្រ បច្ចេកវិទ្យា វិស្វកម្ម សំណង់ស៊ីវិល អាវកាស ការគ្រប់គ្រងនិងជំនួញ ជាដើម។
លោកបានបន្តថា ការបញ្ជូនសិស្សឲ្យទៅសិក្សាជំនាញទាំងនេះពិសេសជំនាញផលិតរ៉ូបូតនេះគឺដើម្បីត្រៀមលក្ខណៈឲ្យបានរួចរាល់ជាមុនព្រោះថា ប្រហែលជាជាង១០ឆ្នាំទៅមុខទៀតកម្ពុជាអាចនឹងប្រើរ៉ូបូតនេះ ដើម្បីឲ្យស្របទៅតាមការរីកចម្រើនរបស់ប្រទេសជាតិក៏ដូចជាតាមការរីកចម្រើនរបស់ពិភពលោកផងដែរ។
លោកអ៊ឹម កុច បានបន្ថែមទៀតថា «ប្រសិនបើរ៉ូបូតជួយធ្វើការមនុស្សនឹងធ្វើឲ្យមនុស្សមានពេលវេលាច្រើននៅជាមួយក្រុមគ្រួសារ មានពេលហាត់ប្រាណនាំគ្រួសារដើរកំសាន្តធ្វើឲ្យក្រុមគ្រួសារមានសុភមង្គល»។
លោកបានបញ្ជាក់ថា បច្ចុប្បន្នការប្រើរ៉ូបូតនេះ គឺមាននៅតាមបណ្តាប្រទេសជឿនលឿនមួយចំនួនរួចហើយដោយគេប្រើវានៅតាមព្រលានយន្តហោះសម្រាប់ឆែកលិខិតឆ្លងដែន បើកទ្វារផ្ទះឬតាមសណ្ឋាគារនិងធ្វើកិច្ចការងារផ្ទះផ្សេងៗ។
ចំណែក លោក សម្យ កំសាន្ត នាយករងវិទ្យាល័យព្រះស៊ីសុវត្ថិទទួលបន្ទុកសាលាជំនាន់ថ្មីបានមានប្រសាសន៍ថា សាកលវិទ្យាល័យហាប៊ីននៃប្រទេសចិនបានចុះអនុស្សរណៈយោគយល់ជាមួយសាលាចំនួន៦រួមមានវិទ្យាល័យព្រះស៊ីសុវត្ថិ បាក់ទូក សន្ធរម៉ុក ឫស្សីកែវ ទួលស្វាយព្រៃនិងសាលាបញ្ញាសាស្ត្រដោយក្នុង១សាលាផ្តល់អាហារូបករណ៍ចំនួន៦នាក់សិក្សានៅសាកលវិទ្យាល័យនិងបញ្ជូនអ្នកជំនាញមកបណ្តុះបណ្តាលដល់គ្រូនិងសិស្សវគ្គខ្លីៗនៅតាមសាលានីមួយៗទាក់ទងទៅនឹងវិទ្យាសាស្ត្រនិងបច្ចេកទេស។
លោកថា «ដើម្បីឲ្យការងារនេះបានជោគជ័យនឹងស្របទៅតាមផែនការរបស់រដ្ឋាភិបាលនោះខ្ញុំសូមអំពាវនាវដល់មហាជនអាណាព្យាបាលឬ ឪពុកម្តាយត្រូវជួយជំរុញឲ្យកូនចៅក្មួយរៀនលើមុខវិជ្ជាវិទ្យាសាស្ត្រនិងស្រាវជ្រាវជាជាងរៀនតែមុខវិជ្ជាសង្គម ឬ គណនីយព្រោះថា ការរៀនវិទ្យាសាស្ត្រមានសារសំខាន់ណាស់ក្នុងការជួយដល់សេដ្ឋកិច្ចជាតិឲ្យកាន់តែរីកចម្រើន»។
ចំណែកអ្នកស្រី សោវ វ៉ី តំណាងសាកលវិទ្យាល័យហាប៊ីននៃប្រទេសចិនដែលជាសាកលវិទ្យាល័យហាប៊ីននៃប្រទេសចិនជាសាកលវិទ្យាល័យមួយលំដាប់ទី៦របស់ពិភពលោកបានមានប្រសាសន៍ថា សិស្សដែលអាចទៅរៀននៅសាកលវិទ្យាហាប៊ីនបានគឺត្រូវមានលទ្ធផលការសិក្សាល្អ និងមានឧទ្ទេសនាមពីនាយកសាលារបស់ខ្លួន។
គួរបញ្ជាក់ថា បច្ចុប្បន្ននេះមានសិស្សរៀននៅសាលាជំនាន់ថ្មីសរុបចំនួន៧៦៣នាក់ចាប់ពីថ្នាក់ទី៧រហូតដល់ថ្នាក់ទី១២៕
ប្រភព៖ កម្ពុជាថ្មី
