បន្ទាប់ពី World Bank, ADB ក៏បានទំលាក់កំណើនសេដ្ឋកិច្ចកម្ពុជាឆ្នាំ២០២០មកទាបដែរគឺ ២,៣%
បន្ទាប់ពី World Bank, ADB ក៏បានទំលាក់កំណើនសេដ្ឋកិច្ចកម្ពុជាឆ្នាំ២០២០មកទាបដែរគឺ ២,៣%
ធនាគាអភិវឌ្ឍន៍អាស៊ី (ADB) នៅថ្ងៃទី០៣ ខែមេសានេះ បានព្យាករថា កំណើនសេដ្ឋកិច្ចកម្ពុជានៅឆ្នាំ២០២០ ត្រូវបានរំពឹងថានឹងធ្លាក់ចុះយ៉ាងគំហុកមកនៅត្រឹម២,៣% ដែលនេះបង្កឡើងដោយផ្ទាល់ពីការផ្ទុះរាលដាលនៃមេរោគកូវីដ១៩។ ការវាយតម្លៃរបស់ស្ថាប័នហិរញ្ញវត្ថុអន្តរជាតិស្តីពីការធ្លាក់ចុះកំណើនសេដ្ឋកិច្ចកម្ពុជាក្នុងអំឡុងពេលនៃការរាតត្បាតជំងឺកូវីដនេះ ធ្វើឡើងបន្ទាប់ពីធនាគារពិភពលោកកាលពីថ្ងៃពុធ បានទំលាក់កំណើនសេដ្ឋកិច្ចកម្ពុជាមកត្រឹម២,៥ភាគរយ។
ធនាគារអភិវឌ្ឍន៍អាស៊ី (ADB) បានឲ្យដឹងថា បន្ទាប់ពីមានសន្ទុះខ្លាំងរយៈពេល២ទសវត្សរ៍ចុងក្រោយក្នុងរង្វង់៧% កំណើនសេដ្ឋកិច្ចកម្ពុជានៅឆ្នាំ២០២០នេះ ត្រូវគេរំពឹងថា នឹងធ្លាក់មកនៅត្រឹម២,៣%។ និន្នាការនៃការធ្លាក់ចុះកំណើនសេដ្ឋកិច្ចកម្ពុជានៅពេលនេះ មិនខុសពីពិភពលោកនោះទេ គឺបណ្តាលមកពីការឆ្លងរាលដាលនៃវីរុសកូវីដ-១៩។ ក៏ប៉ុន្តែលោកស្រី Sunniya Durrani-Jamal នាយិការប្រចាំប្រទេសកម្ពុជានៃ ADB រំពឹងថាសេដ្ឋកិច្ចកម្ពុជានឹងហក់ឡើងវិញមកត្រឹម៥,៧% នៅឆ្នាំ២០២១ ល្គិកណាសកម្មភាពរាតត្បាតនៃកូវីដ-១៩ ត្រូវបានបញ្ចប់។
តាមអត្ថបទរបស់ធនាគារអភិវឌ្ឍន៍អាស៊ី ដែលមានឈ្មោះថា«ទស្សនវិស័យអភិវឌ្ឍន៍អាស៊ី ២០២០» វីរុសកូវីដ-១៩ នឹងបង្កឲ្យប៉ះពាល់ធ្ងន់ធ្ងរចំពោះវិស័យសេវាកម្មដែលនឹងធ្លាក់ចុះ១,៧% ហើយរំពឹងថានឹងប៉ះពាល់ដល់វិស័យសំណង់ និងកម្មន្តសាល តាមរយៈការកាត់ផ្តាច់ខ្សែរសង្វាក់ផ្គត់ផ្គង់ និងការកាត់បន្ថយតម្រូវការ។
កំណើនឧស្សាហកម្មត្រូវបានព្យាករថានឹងថយចុះមក៦,៥% ក្នុងឆ្នាំ២០២០ ជាមួយនឹងការថមថយកំណើន ក្នុងវិស័យផលិតកម្មកាត់ដេរ និងសំណង់ ការធ្លាក់ចុះយ៉ាងគំហុកនៃសេដ្ឋកិច្ចចិន ជាពិសេសការរឹតបន្តឹងភាពអនុគ្រោះពាណិជ្ជកម្មដោយសហភាពអឺរ៉ុប ដែលនឹងចាប់ផ្តើមក្នុងខែសីហាឆ្នាំ២០២០។ ជាមួយគ្នានេះ កំណើនផ្នែកកសិកម្មក៏ត្រូវបានវាយតម្លៃដែរថាមានកម្រិតទាប គឺត្រឹម០,៥%ប៉ុណ្ណោះ ក្នុងឆ្នាំ២០២០។ លោកស្រី Sunniya Durrani-Jamal ផ្តល់ជាយោបល់ថា រដ្ឋាភិបាលកម្ពុជាគួរផ្តោតសំខាន់ទៅលើការទប់ស្កាត់វីរុសកូវីដ-១៩ បើពុំនោះទេ ការងើបឡើងវិញនៃវិស័យសេវាកម្ម និងទេសចរណ៍ នឹងមានការលំបាក។
ទោះយ៉ាងណាក្រសួងសេដ្ឋកិច្ច និងហិរញ្ញវត្ថុកម្ពុជា ពុំទាន់វាយតម្លៃយ៉ាងណានៅឡើយទេទាក់ទងទៅនឹងការព្យាកររបស់ADB នៅពេលនេះទេ ក៏ប៉ុន្តែរដ្ឋាភិបាលនឹងមានការព្យាករដោយខ្លួនឯងក្នុងពេលឆាប់ៗខាងមុខ ដែលជាជំហរផ្លូវការ ខណៈកាលពីពេលថ្មីៗនេះ ក្រសួងបានហៅការព្យាកររបស់ធនាគារពិភពលោកប្រមាណ ២,៥% ថាជាតម្រុយមួយ ដែលកម្ពុជាមិនបានបដិសេធ ហើយក៏មិនទាន់ទទួលស្គាល់ដែរ៕ RFI
