លោកនាយករដ្ឋមន្ត្រី ហ៊ុន សែន លើកទឹកចិត្តដល់ក្រុមគ្រូពេទ្យស្ម័គ្រចិត្តប្រយុទ្ធប្រឆាំងនឹងជំងឺកូវីដ១៩ គឺមានតម្លៃមហាសាល
លោកនាយករដ្ឋមន្ត្រី ហ៊ុន សែន លើកទឹកចិត្តដល់ក្រុមគ្រូពេទ្យស្ម័គ្រចិត្តប្រយុទ្ធប្រឆាំងនឹងជំងឺកូវីដ១៩ គឺមានតម្លៃមហាសាល
លោកនាយករដ្ឋមន្ត្រី ហ៊ុន សែន បានមានប្រសាសន៍ផ្តល់ដំបូន្មាន និងកម្លាំងចិត្តដល់ក្រុមគ្រូពេទ្យទាំងអស់ ដែលបានស្ម័គ្រចិត្តធ្វើដំណើរចាកចេញពីក្រុមគ្រួសារ និងមនុស្សជាទីស្រឡាញ់ ដើម្បីសង្គ្រោះជីវិតមនុស្ស។
លោកនាយករដ្ឋមន្ត្រី ហ៊ុន សែន បានមានប្រសាសន៍បែបនេះ នៅថ្ងៃទី២៥ ខែមីនា ឆ្នាំ២០២០នេះ ក្នុងឱកាសអញ្ជើញជួបសំណេះសំណាលជាមួយគ្រូពេទ្យស្ម័គ្រចិត្តប្រមាណជាង ៤០០នាក់ មុននឹងពួកគេចេញបេសកកម្មជាមួយក្រសួងសុខាភិបាល ដើម្បីប្រយុទ្ធជាមួយជំងឺកូវីដ-១៩ (COVID-19)។
លោកនាយករដ្ឋមន្ត្រី ហ៊ុន សែន បានប្រកាសថា នៅតាមបណ្តាខេត្តនានា ដែលបានត្រៀមរៀបចំដោយយកសណ្ឋាគារ ផ្ទះសំណាក់ និងអន្តេវាសិកដ្ឋាន ធ្វើជាកន្លែងសម្រាកព្យាបាលសម្រាប់អ្នកជំងឺកូវីដ គឺមកដល់ពេលនេះ យើងមានប្រមាណ ៣០០០ បន្ទប់ហើយ។ ក្នុងនោះ នៅភ្នំពេញ មាន ៤ទីតាំងធំៗ គឺនៅមន្ទីរពេទ្យរុស្ស៊ី មន្ទីរពេទ្យចាក់អង្រែ និងមន្ទីរពេទ្យយោធាព្រះកេតុមាលា ព្រមទាំងសណ្ឋាគារ អាំងទែកុងទីណង់តាល់។ លោក បានចាត់ទុកការស្ម័គ្រចិត្តរបស់ក្រុមគ្រូពេទ្យ ដែលបានចូលរួមប្រយុទ្ធប្រឆាំងនឹងជំងឺឆ្លងកូវីដ១៩ នៅពេលនេះ គឺជាការលះបង់ ដែលមានតម្លៃមហាសាល មិនអាចកាត់ថ្លៃបានទេ ក្នុងប្រឆាំងនឹងសត្រូវលាក់មុខកូវីដ។
លោកនាយករដ្ឋមន្ត្រី ហ៊ុន សែន ក៏បានបញ្ជាក់ពីមូលហេតុ ថាហេតុអ្វីបានជាត្រូវជ្រើសរើសក្រុមគ្រូពេទ្យស្ម័គ្រចិត្ត នៅពេលនេះ ខណៈដែលយើងមានគ្រូពេទ្យប្រមាណ ២ម៉ឺននាក់ នៅទូទាំងប្រទេស ចំនួននេះមិនត្រឹមតែពិនិត្យព្យាបាលប្រជាពលរដ្ឋលើជំងឺកូវីដ នាពេលនេះទេ តែពួកគាត់ក៏ត្រូវពិនិត្យព្យាបាល លើជំងឺដទៃទៀតជូនប្រជាពលរដ្ឋផងដែរ៕
