ត្រឹមដំណាច់ឆ្នាំ២០១៩ ទុនវិនិយោគជប៉ុននៅកម្ពុជាមានជិត ៣ពាន់លានដុល្លារ
ត្រឹមដំណាច់ឆ្នាំ២០១៩ ទុនវិនិយោគជប៉ុននៅកម្ពុជាមានជិត ៣ពាន់លានដុល្លារ
ក្រុមប្រឹក្សាអភិវឌ្ឍន៍កម្ពុជា បានឲ្យដឹងថា គិតត្រឹមដំណាច់ឆ្នាំ២០១៩ គម្រោងវិនិយោគជប៉ុននៅកម្ពុជាសរុប ១៤៣គម្រោង ក្នុងទុនវិនិយោគ ២.៧៨៥លានដុល្លារអាមេរិក ត្រូវបានអនុម័តជាស្ថាពរ។ គម្រោងវិនិយោគជប៉ុននៅកម្ពុជានេះ ភាគច្រើនក្នុងវិស័យកម្មន្តសាលមិនមែនវាយនភណ្ឌ ដូចជា ការផលិតបរិក្ខារអេឡិចត្រូនិកនិងអគ្គិសនី ការផលិតគ្រឿងបន្លាស់រថយន្តជាដើម។ នេះបើតាមការឲ្យដឹងពីឯកឧត្តម សុខ ចិន្តា សោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា។
ក្នុងកិច្ចប្រជុំលើកទី១៩ នៃគណៈកម្មាធិការចម្រុះកម្ពុជាជប៉ុន នាទីស្តីការក្រុមប្រឹក្សាអភិវឌ្ឍន៍កម្ពុជា នៅថ្ងៃទី១២ ខែកុម្ភៈ ឆ្នាំ២០២០នេះ ឯកឧត្តមបានស្នើដល់អ្នកវិនិយោគនៅកម្ពុជាទាំង បង្កើនការយកចិត្តទុកដាក់ខ្ពស់ចំពោះសុខុមាលភាពកម្មករ និយោជិត ដោយដាក់ចេញ និងអនុវត្តជាប្រចាំនូវវិធានការបង្ការវីរុសផ្លូវដង្ហើមថ្មី (វីរុសកូរ៉ូណា) ក្នុងទីតាំងផលិតកម្មរបស់ខ្លួន ព្រមទាំងខិតខំធ្វើយ៉ាងណារក្សាប្រក្រតីភាពនៃខ្សែច្រវាក់ផលិតកម្ម ដើម្បីធានានិរន្តរភាពនៃការងាររបស់កម្មករ និយោជិត និងការបង្កើនប្រាក់ចំណូលអាជីវកម្មរបស់អ្នកវិនិយោគផ្ទាល់៕
