អង់គ្លេស​សម្រេច​ទទួល​យក​បច្ចេកវិទ្យា 5G របស់​Huawei ប៉ុន្តែ ក្នុង​ចំនួន​មានកំណត់

ដោយ៖ លី វិទ្យា​​ | ថ្ងៃព្រហស្បតិ៍ ទី៣០ ខែមករា ឆ្នាំ២០២០​ | បច្ចេកវិទ្យា |
អង់គ្លេស​សម្រេច​ទទួល​យក​បច្ចេកវិទ្យា 5G របស់​Huawei ប៉ុន្តែ ក្នុង​ចំនួន​មានកំណត់ អង់គ្លេស​សម្រេច​ទទួល​យក​បច្ចេកវិទ្យា 5G របស់​Huawei ប៉ុន្តែ ក្នុង​ចំនួន​មានកំណត់

រដ្ឋាភិបាល​អង់គ្លេស កាលពី​ថ្ងៃ​អង្គារ​បាន​សម្រេច​បើកភ្លើងខៀវ ឲ្យ​ក្រុមហ៊ុន​ទូរគមនាគមន៍​ចិន Huawei មាន​នាទី​ក្នុង​ការកសាង​បណ្តាញ​ទាក់ទង​ទូរស័ព្ទ ជំនាន់​ទី​៥ របស់​អង់គ្លេស។ ទីក្រុង​ឡុងដ៍ បាន​បញ្ជាក់​ផង​ដែរ​ថា ដើម្បី​បញ្ហា​សន្តិសុខ និង​កិច្ចការ​សម្ងាត់​ជាតិ តួនាទី របស់​ក្រុមហ៊ុន Huawei ក្នុង​បណ្តាញ​ទូរស័ព្ទ អង់គ្លេស នឹង​មាន​កំណត់ ច្រើនបំផុត ៣៥ភាគរយ។ ទោះ​អង់គ្លេស កំណត់ការចូលរួម​របស់​ក្រុមហ៊ុន​ Huawei ប៉ុន្តែ ការសម្រេច​របស់​រដ្ឋាភិបាល​អង់គ្លេស នឹង​អាច​ធ្វើ​ឲ្យ​រដ្ឋបាល​អាមេរិក អាក់អន់​ចិត្ត ព្រោះថា អាមេរិក​បាន​ព្យាយាម បញ្ចុះបញ្ចូល សម្ព័ន្ធមិត្ត​កុំ​ឲ្យ​ប្រើ​បច្ចេកវិទ្យា 5G​របស់​ Huawei ​ដែល​អាមេរិក​ចោទប្រកាន់ថា ជាភ្នាក់ងារ​យកការណ៍​សម្ងាត់​ឲ្យ​រដ្ឋាភិបាល​ចិន។

នៅក្នុង​កិច្ចប្រជុំ​ក្រុមប្រឹក្សា​សន្តិសុខ ដឹកនាំ​លោក​នាយករដ្ឋមន្រ្តី បូរីស ចនសុន រដ្ឋាភិបាល​អង់គ្លេស​បាន​សម្រេច​យល់ព្រម​ឲ្យ​ក្រុមហ៊ុន​ Huawei​មានតួនាទី​មួយ​ផ្នែក​ក្នុង​ការកសាង​បណ្តាញ​បច្ចេកវិទ្យាទូរស័ព្ទ ដ៏ទំនើប 5G​នៅក្នុង​ទឹកដី អង់គ្លេស។ តាម​ការអះអាង​របស់​រដ្ឋមន្រ្តី​ឌីជីថល​អង់គ្លេស លោកស្រី Nicky Morgan អង់គ្លេស​ចង់​មាន​បច្ចេកវិទ្យា 5G ដែល​ជាបណ្តាញ​ទូរស័ព្ទ ដ៏​លឿនបំផុត​ក្នុង​លោក ប៉ុន្តែ ជាមួយ​គ្នានោះ អ្នកលក់ បណ្តាញ 5G​ដូចជា​ក្រុមហ៊ុន​ Huawei​នឹង​មិនត្រូវ​អនុញ្ញាត​ឲ្យ​ចូលរួម ឬ មាន​វត្តមាន​ដាច់ខាត នៅក្នុង​វិស័យ ដែល​សំខាន់ៗ របស់​អង់គ្លេស ដូចជា ទីតាំង​នុយក្លេអ៊ែរ ឬ​មូលដ្ឋានទ័ព​ក្នុង​ទឹកដី​អង់គ្លេស។ អង់គ្លេស​នឹង​មិន​ហាមផងដែរ មិនឲ្យ​ក្រុមហ៊ុន​ Huawei​អាច​ចូល​ទៅ​ប្រើប្រាស់ ម៉ាស៊ីន​ផ្ទុក ទិន្នន័យ​របស់​អ្នកប្រើប្រាស់​អង់គ្លេស។

ការសម្រេច​របស់ទីក្រុង​ឡុងដ៍ ដែល​បើកភ្លើងខៀវ​ឲ្យ​ក្រុមហ៊ុន​ Huawei​អាច​ចូលរួម​ក្នុង​ការកសាង​បណ្តាញ​ទូរស័ព្ទ 5Gអង់គ្លេស ធ្វើឡើង នៅបន្ទាប់​ពី​សហភាព អឺរ៉ុប​ទើប​ប្រកាស​ថា ខ្លួន​អាច​អនុញ្ញាត​ឲ្យ​ Huawei​មាន​តួនាទី ប៉ុន្តែ មាន​កំណត់ នៅក្នុង​ការកសាង​ហេដ្ឋារចនា​សម្ព័ន្ធ​ទូរស័ព្ទ ក្នុង​ទឹកដី​អឺរ៉ុប។

នៅក្នុង​សេចក្តីថ្លែងការណ៍​ដាច់ដោយឡែក កាលពីថ្ងៃ​អង្គារ ក្រុមហ៊ុន​ Huawei​បាន​ថ្លែង​ស្វាគម​ការសម្រេចចិត្ត​របស់​រដ្ឋាភិបាល​អង់គ្លេស។ ប៉ុន្តែ ទីក្រុងឡុងដ៍​វិញ ត្រូវ​រង់ចាំ មើល​ប្រតិកម្ម​របស់​អាមេរិក ដែល​ធ្លាប់​បាន​គំរាម​រួចហើយ ថា នឹង​កាត់បន្ថយ ការចែករំលែក ព័ត៌មាន​សម្ងាត់ ជាមួយ​ទីក្រុង​ឡុងដ៍ ក្នុងករណី រដ្ឋាភិបាលអង់គ្លេស បើកផ្លូវ​ឲ្យ​ Huawei​មាន​ចំណែក​ចូលរួម ក្នុង​ហេដ្ឋារចនាសម្ព័ន្ធ​បច្ចេកវិទ្យា​ថ្មី 5G របស់​អង់គ្លេស។ សូមរំលឹកថា អង់គ្លេស ចូលរួម​ជាមួយ កាណាដា នូវែលហ្សេឡង់ និង​អូស្រ្តាលី នៅ​ក្នុង​បណ្តាញ​ស៊ើបការណ៍​សម្ងាត់ ភ្នែក ៥ ដែលដឹកនាំ​ដោយ​អាមេរិក។

ដោយចោទប្រកាន់​ក្រុមហ៊ុន​ Huawei​ថា ជា​ភ្នាក់ងារយកការណ៍​សម្ងាត់​ឲ្យ​រដ្ឋាភិបាល​ប៉េកាំង ប្រធានាធិបតី​អាមេរិក លោកដូណាល់ ត្រាំ ធ្លាប់​បាន​បញ្ជា​ឲ្យ​ក្រុមហ៊ុន​អាមេរិកាំង​ឈប់​ធ្វើជំនួញ ជាមួយ​ក្រុមហ៊ុន​ Huawei។ រដ្ឋបាល​លោកដូណាល់ ត្រាំ បាន​ដាក់សម្ពាធ​ផងដែរ លើ​ក្រុមប្រទេស​សម្ព័ន្ធមិត្ត​ឲ្យ​បែរខ្នង កុំ​ប្រើប្រាស់បច្ចេកវិទ្យា 5G ​របស់​ក្រុមហ៊ុន Huawei។ អ្នកជំនាញ វាយតម្លៃថា អង់គ្លេស ដែល​បាន​ទទួល​ប្រើ​បណ្តាញ​ទូរស័ព្ទ​របស់​ Huawei​អស់ ១៥ឆ្នាំមកហើយនោះ មិន​អាច​ពហិការ ប្រព័ន្ធ 5G ​របស់ Huawei​បានទេ។ ឈប់​ធ្វើការ​ជាមួយ Huawei មានន័យថា អង់គ្លេស ត្រូវរុះរើ ដកចោល​ទាំងអស់​អង់តែន បណ្តាញទូរស័ព្ទ 4G របស់​Huawei នៅអង់គ្លេស ដែលការនេះ នឹង​ធ្វើ​ឲ្យ​អង់គ្លេស ខាតបង់​ប្រយោជន៍ មិន​អាច​ដើរទាន់​បច្ចេកវិទ្យា​នឹងគេ៕

RFI

បញ្ចេញមតិ
ពាក្យគន្លឹះទាក់ទង
អត្ថបទទាក់ទង