សម្តេចនាយករដ្ឋមន្ត្រី ហ៊ុន សែន ថ្លែងថា អូស្រ្តាលីនឹងបន្តគាំទ្រចំពោះការអភិវឌ្ឍនៅកម្ពុជា
សម្តេចនាយករដ្ឋមន្ត្រី ហ៊ុន សែន ថ្លែងថា អូស្រ្តាលីនឹងបន្តគាំទ្រចំពោះការអភិវឌ្ឍន៍នៅកម្ពុជាសម្តេចតេជោនាយករដ្ឋមន្រ្តី ហ៊ុន សែន បានថ្លែងបញ្ជាក់ថា ប្រទេសអូស្រ្តាលីនឹងបន្តការគាំទ្រចំពោះការអភិវឌ្ឍនៅក្នុងប្រទេសកម្ពុជា។ នេះបើយោងតាមប្រសាសន៍របស់ឯកឧត្តម កៅ គឹមហួន បានថ្លែងឱ្យដឹងបន្ទាប់ពីជំនួបផ្លូវការរវាងសម្តេចនាយករដ្ឋមន្រ្តី ហ៊ុន សែន និងឯកឧត្តមនាយករដ្ឋមន្ត្រីអូស្ត្រាលី ម៉ាល់ខូម ថើនប៊ុលនៅព្រឹកថ្ងៃទី១៦ ខែមីនា ឆ្នាំ២០១៨នេះ។
ឯកឧត្តម កៅ គឹមហួន បានបញ្ជាក់ថា ឯកឧត្តមនាយករដ្ឋមន្រ្តី អូស្រ្តាលី បានចាត់ទុកថាអាស៊ានកំពុងតែមានការរីកចម្រើនប្រកបដោយភាពទន់ភ្លន់ ហើយលោកចង់បន្តកិច្ចសហប្រតិបត្តិការជាមួយអាស៊ានឱ្យបានកាន់តែខ្លាំងក្លាក្នុងភាពជាដៃគូយុទ្ធសាស្រ្តដើម្បីចូលរួមក្នុងការថែរក្សាសន្តិសុខតំបន់ផងដែរ។
ឯកឧត្តមបានបន្តថា ជាការឆ្លើយតប សម្តេចនាយករដ្ឋមន្រ្តី ហ៊ុន សែន បានថ្លែងអំណរគុណនាយករដ្ឋមន្រ្តី អូស្រ្តាលីដែលតែងតែផ្តល់ការគាំទ្រដល់កម្ពុជាកន្លងមក ដូចជាធ្លាប់បានបញ្ជូនអ្នកសង្កេតការបោះឆ្នោត ២៦នាក់ ដើម្បីចូលរួមសង្កេតការបោះឆ្នោតក្រុមប្រឹក្សាឃុំសង្កាត់ឆ្នាំ២០១៧ ហើយលោកក៏បានស្នើសុំឱ្យភាគីអូស្ត្រាលីបន្តការគាំទ្រទាំងឡាយចំពោះការបោះឆ្នោតជ្រើសរើសតំណាងរាស្រ្តនៅឆ្នាំ២០១៨ខាងមុខនេះផងដែរ។
ឯកឧត្តម កៅ គឹមហួន នៅបានឱ្យដឹងទៀតថា សម្តេចតេជោនាយករដ្ឋមន្រ្តី ហ៊ុន សែន ក៏បានថ្លែងអំណរគុណដល់អូស្ត្រាលីដែលបានផ្តល់ការគាំទ្រដល់សកម្មភាពបោសសំអាតមីននៅកម្ពុជាកន្លងមក និងស្នើសុំភាគីអូស្ត្រាលីទទួលយកកងទ័ពមួកខៀវកម្ពុជាបន្ថែមទៀត។ ជាចុងក្រោយ សម្តេចនាយករដ្ឋមន្រ្តី ហ៊ុន សែន ក៏បានអញ្ជើញឯកឧត្តមនាយករដ្ឋមន្រ្តី អូស្រ្តាលី មកទស្សនកិច្ចនៅកម្ពុជាក្នុងពេលវេលាសមស្របណាមួយនាពេលខាងមុខផងដែរ៕
