រដ្ឋបាលខេត្តព្រះសីហនុ បង្ហាញភាពលេចធ្លោ នៃបច្ចុប្បន្នភាពវិស័យសំណង់ក្នុងក្រុងនេះថា នឹងឈានទៅរកកេរ្តិ៍ឈ្មោះដាច់គេ
រដ្ឋបាលខេត្តព្រះសីហនុ បង្ហាញភាពលេចធ្លោ នៃបច្ចុប្បន្នភាពវិស័យសំណង់ក្នុងក្រុងនេះថា នឹងឈានទៅរកកេរ្តិ៍ឈ្មោះដាច់គេ
មន្ត្រីរដ្ឋបាលសាលាខេត្តព្រះសីហនុ បានអះអាងថា ប៉ុន្មានឆ្នាំចុងក្រោយនេះ ក្រុងទេសចរណ៍ជាប់ឆ្នេរសមុទ្រមួយនេះ មានសកម្មភាពសាងសង់សំណង់តូចធំជាច្រើនអគារ បាននិងកំពុងសាងសង់មានសកម្មភាពរស់រវ៉ើក រហូតមកដល់សព្វថ្ងៃនេះ។
តាមមន្ត្រីរដ្ឋបាលសាលាខេត្តព្រះសីហនុ បានឲ្យដឹងថា តួលេខ នៃគម្រោងសាងសង់សំណង់ ដែលមានទំហំផ្ទៃលើសពី ៣០០០ម៉ែត្រការ៉េឡើងទៅ គឺមានចំនួន៧០គម្រោង ក្នុងនោះជាង ៣០០គម្រោង កំពុងដំណើរការសាងសង់យ៉ាងសកម្មរាល់ថ្ងៃនេះ។ ទន្ទឹមគ្នានេះ ក៏មានសំណង់អគារ ដែលមានកម្ពស់ខ្ពស់ៗ រហូតដល់៤០ជាន់ មានចំនួនជាច្រើនគម្រោង កំពុងត្រូវបានស្ថាបនា បានរីកដូចផ្សិត និងទាក់ទាញការចាប់អារម្មណ៍ពីសំណាក់ប្រជាពលរដ្ឋ និងភ្ញៀវទេសចរជាតិអន្តរជាតិ ដែលចូលមកដល់មូលដ្ឋាននេះ។
វិស័យសំណង់នាខេត្តព្រះសីហនុ ចាប់ពីឆ្នាំ២០០៥ ដល់ឆ្នាំ២០១៥ មានគម្រោងសាងសង់អគារខ្ពស់ៗចាប់ពី ៥ជាន់ រហូតដល់៣៥ជាន់ មានត្រឹម៤៦គម្រោងប៉ុណ្ណោះ។ ប៉ុន្តែពេលនេះ គឺគិតតែឆ្នាំ២០១៨ប៉ុណ្ណោះ ក្រុងទេសចរណ៍មួយនេះ មានគម្រោងសង់អគារធំៗ និងមានកម្ពស់ៗចាប់ពី ៥ជាន់ដល់៤០ជាន់ មានរហូតដល់ ៥៨គម្រោង។
មន្ត្រីរដ្ឋបាលដដែលបញ្ជាក់ថា ភូមិសាស្រ្តខេត្តព្រះសីហនុ មានលក្ខណៈអំណោយផលពីធម្មជាតិល្អព្រមគ្នាដូចជា៖ មានឆ្នេរខ្សាច់ពណ៌ពងមាន់ សម្បូរដោយកោះតូច-ធំ មានជួរភ្នំ សម្បូរដោយព្រៃធម្មជាតិស្រស់ត្រកាលគ្រប់រដូវកាល រហូតរដ្ឋបាលខេត្តនេះ សម័យមុនៗ និងបច្ចុប្បន្នបានយកធ្វើជាឧទ្យានជាតិ។ ភាពល្បីល្បាញទាំងនេះហើយ បានជំរុញឲ្យខេត្តជាប់ឆ្នេរសមុទ្រមួយនេះ មានឈ្មោះបោះសំឡេងដោយបានបង្កើតជាទីក្រុងថ្មីឈ្មោះថា «ព្រះសីហនុ» នាដើមទស្សវត្សរ៍ឆ្នាំ១៩៦០មកម្ល៉េះ។
មន្ត្រីរូបនេះបានរំលឹកថា កាលណោះនៅដំណាក់កាលដំបូង គឺក្រុងព្រះសីហនុ មានកេរ្តិ៍ឈ្មោះល្បីល្បាញ ថាជាទីក្រុងអំណោយផលជាប់មាត់សមុទ្រដ៏ស្រស់ស្អាត ប្រកបដោយសម្រស់ធម្មជាតិពិតៗ ហើយមានសេដ្ឋកិច្ចរីកចម្រើនរស់រវើក ព្រោះមានកំពង់ផែសមុទ្រទឹកជ្រៅ មានហេដ្ឋារចនាសម្ព័ន្ធដឹកជញ្ជូនគ្រប់ផ្នែក និងជាពិសេសផ្នែកនគរូបនីយកម្មឆើតឆាយថ្មីៗ បានរំលេចខ្លួនលេចធ្លោជាងគេនៅក្នុងតំបន់។ ចំពោះសមិទ្ធិផលនានានៅអមសងខាងផ្លូវនីមួយៗក្នុងក្រុងព្រះសីហនុវិញ គេសង្កេតឃើញមានសំណង់ភូមិគ្រឹះតូចធំចម្រុះ ស្ថាបត្យកម្មខ្មែរជាច្រើនរយខ្នង ត្រូវបានកសាងព្រោងព្រាត សម្រាប់ការរស់នៅរបស់ប្រជាពលរដ្ឋ និងជួលឲ្យភ្ញៀវទេសចរជាតិអន្តរជាតិស្នាក់នៅ ឬសម្រាកលម្ហែកាយជាដើម។
បញ្ហានេះ សូម្បីអតីតព្រះមហាក្សត្រ នរោមត្តម សីហនុ ក៏ទ្រង់ពេញព្រះទ័យជាខ្លាំង នូវបរិយាកាសបរិសុទ្ធស្រស់ត្រកាល របស់ទីក្រុងទេសចរណ៍មួយនេះ រហូតបានដាក់ឈ្មោះខេត្តនេះ តាមព្រះនាមទ្រង់ថែមទៀតផង។ ជាងនេះទៀត ព្រះអង្គក៏បានពេញព្រះទ័យសាងសង់ព្រះរាជដំណាក់ សម្រាប់សម្រាកលម្ហែព្រះកាយរបស់ព្រះអង្គ នៅទីក្រុងទេសចរណ៍ជាប់មាត់សមុទ្រមួយនេះ និងបានបន្សល់ទុកដល់សព្វថ្ងៃនេះ។
មន្ត្រីរដ្ឋបាលសាលាខេត្តព្រះសីហនុ បន្តថា នៅអំឡុងទសវត្សរ៍ឆ្នាំ១៩៦០ ក្រុងព្រះសីហនុ មានភាពល្បីល្បាញលើសគេក្នុងតំបន់ (ថៃ កម្ពុជា វៀតណាម) ពោលបន្ទាប់ពីក្រុងព្រះសីហនុ បានស្ថាបនាសណ្ឋាគារឯករាជ្យ ឬសណ្ឋាគារ៧ជាន់ រួចរាល់ក្នុងឆ្នាំ១៩៦៤-៦៥។ កាលណោះ កិត្តិនាមរបស់សណ្ឋាគារនេះ ក៏បានទទួលឥស្សរជនអន្តរជាតិល្បីៗជាច្រើនរូប រួមមាន៖ អតីតលោកស្រីភរិយា របស់ប្រធានាធិបតី ចន អែហ្វ កេនឌី (John F. Kenedy) នៃសហរដ្ឋអាមេរិកជាដើម។ សណ្ឋាគារឯករាជ្យ ឬសណ្ឋាគារ ៧ជាន់ ក៏ជាប់ឈ្មោះជាអគារសំណង់ធំខ្ពស់ជាគេបំផុត ចាប់ពីទស្សវត្សរ៍ឆ្នាំ១៩៦០ដល់ឆ្នាំ១៩៨០ នៅទូទាំងតំបន់ឆ្នេរ គឺរាប់ពីឆ្នេរសមុទ្រហាឡុងបៃយ៍ ជិតទីក្រុងហាណូយ ប្រទេសវៀតណាម រហូតដល់តំបន់ឆ្នេរ នៃខេត្តណារ៉ាត់ធីវ៉ាត់ ប្រទេសថៃ។
គួររំលឹកថា សណ្ឋាគារឯករាជ្យ ដ៏ល្បីល្បាញខាងលើនេះ ត្រូវបានរចនាប្លង់សាងសង់ដោយស្ថាបត្យករជនជាតិបារាំង និងជនជាតិខ្មែរ។ ចំណែកការរចនាផ្ទៃខាងក្នុង នៃសណ្ឋាគារនេះ គឺជាស្នាព្រះហស្ថសម្តេចព្រះ នរោត្តម សីហនុ អតីតព្រះមហាក្សត្រខ្មែរដោយផ្ទាល់។ សណ្ឋាគារឯករាជ្យ បើរាប់ពីចុងទស្សវត្សរ៍ឆ្នាំ១៩៧០ថយក្រោយ គឺជាសំណង់ធំប្រណីត និងខ្ពស់ជាងបំផុត នៅតំបន់ឆ្នេរសមុទ្រ (វៀតណាម កម្ពុជា ថៃ) ពោលគឺមានតែសណ្ឋាគារឯករាជ្យ ឬសណ្ឋាគារ៧ជាន់មួយទេ ដែលត្រូវបានគេទទួលស្គាល់ជាលក្ខណៈអន្តរជាតិ ថាជាសំណង់ខ្ពស់ធំស្កឹមស្កៃ ដាច់គេនៅក្នុងតំបន់ទាំងមូល។
ដោយឡែក ងាកមកមើលបច្ចុប្បន្នភាព នៃគម្រោងអភិវឌ្ឍន៍អគារសំណង់ខ្ពស់ ប្រណីតៗ និងធំស្កឹមស្កៃ ក្រោមការដឹកនាំរបស់លោក យន្ត មីន ជាអភិបាលខេត្តព្រះសីហនុវិញ បើគិតក្នុងឆ្នាំ២០១៨ ទីក្រុងជាប់មាត់សមុទ្រមួយនេះ មានគម្រោងសាងសង់អគារធំប្រណីតៗ និងមានកម្ពស់ស្កឹមស្កៃ ចាប់ពី៥ជាន់ដល់ ៤០ជាន់ មានចំនួន ៥៨គម្រោង៕
