ខុទ្ទកាល័យលោកនាយករដ្ឋមន្រ្ដី ហ៊ុន សែន ប្រកាសបដិសេធសេចក្តីណែនាំក្លែងក្លាយមួយ ដែលកំណត់ឱ្យក្រសួង៥ បញ្ជូនឯកសារត្រង់ទៅនាយករដ្ឋមន្រ្តី

ខុទ្ទកាល័យលោកនាយករដ្ឋមន្រ្ដី ហ៊ុន សែន ប្រកាសបដិសេធសេចក្តីណែនាំក្លែងក្លាយមួយ ដែលកំណត់ឱ្យក្រសួង៥ បញ្ជូនឯកសារត្រង់ទៅនាយករដ្ឋមន្រ្តី

នាយកខុទ្ទកាល័យលោកនាយករដ្ឋមន្រ្ដី ហ៊ុន សែន លោក ហូ សិទ្ធី តាមរយៈកិច្ចសម្ភាសន៍ផ្តាច់មុខជាមួយលោក លឹម ជាវុត្ថា នាយកប្រតិបត្តិអង្គភាពព័ត៌មាន Fresh News នៅថ្ងៃទី៣១ ខែមករា ឆ្នាំ២០១៩នេះ បានប្រកាសទាត់ចោលនូវសេចក្តីណែនាំក្លែងក្លាយមួយ ដែលផ្សព្វផ្សាយនៅលើសារព័ត៌មាន និងបណ្តាញទំនាក់ទំនងសង្គម អំពីការកំណត់ឱ្យមានក្រសួងសំខាន់ៗតែ៥ប៉ុណ្ណោះ អាចបញ្ជូនឯកសារត្រង់ ទៅកាន់នាយករដ្ឋមន្រ្តី។

លោក ហូ សិទ្ធី បានបញ្ជាក់ថា លិខិតដែលហៅថា សេចក្តីណែនាំនោះគឺជាលិខិតក្លែងក្លាយសុទ្ធសាធ មិនមែនជាលិខិតខុទ្ទកាល័យឡើយ ដែលត្រូវបានគេបន្លំក្លែងជាលិខិតរបស់លោក។ ជាមួយគ្នានេះ នាយកខុទ្ទកាល័យលោកនាយករដ្ឋមន្រ្ដី ហ៊ុន សែន ក៏បានបង្ហាញអំពីតម្រុយជាច្រើន ដែលបង្ហាញថា លិខិតនោះគឺជាលិខិតក្លែងក្លាយ។

តាមលោក ហូ សិទ្ធី ថ្លែងឲ្យដឹងថា ចំណុចដែលបញ្ជាក់ថា សេចក្តីណែនោះពិតជាលិខិតក្លែងក្លាយគឺរួមមានដូចជា៖
* ទី១៖ ខុទ្ទកាល័យមិនដែលចេញនូវសេចក្តីណែនាំទេ។ កាលណាទទួលបានអនុសាសន៍ពីលោកនាយករដ្ឋមន្រ្តី ខុទ្ទកាល័យត្រូវធ្វើលិខិតទៅទីស្តីការគណៈរដ្ឋមន្រ្តី ដែលជាអ្នកចេញសេចក្តីណែនាំ។
* ទី២៖ សេចក្តីណែនាំក្លែងក្លាយដែលសរសេរនេះ គឺអត់មានសរសេរដាក់ថា ជូនទៅបុគ្គលណាមួយនោះទេ ធម្មតាគេណែនាំគេជូនទៅចំពោះស្ថាប័ននេះស្ថាប័ននោះ បុគ្គលនេះបុគ្គលនោះ តែលិខិតនេះអត់ទទេ។
* ទី៣៖ ចំពោះលិខិតពិត ខុទ្ទកាល័យតែងប្រើក្រដាសពណ៌លឿងជាផ្លូវការ
* ទី៤៖ ក្នុងលិខិតក្លែងក្លាយនោះ អត់មានត្រាខុទ្ទកាល័យទេ បើជាលិខិតផ្លូវការរបស់ខុទ្ទកាល័យ គឺត្រូវតែជាក្រដាសពណ៌លឿង និងមានត្រាខុទ្ទកាល័យលើហ្នឹងផងដែរ
* ទី៥៖ ត្រង់ចំណុចហត្ថលេខា បើលិខិតផ្លូវការលោកសរសេរហើយ ត្រូវបោះត្រាឈ្មោះរបស់លោក មិនមែនសរសេរដៃនោះទេ។

ក្រៅពីនោះលោក ហូ សិទ្ធី បានបញ្ជាក់បន្ថែមថា៖ «នៅមានចំណុចច្រើនទៀត ដែលខ្ញុំសម្គាល់ថា មិនមែនជារបស់ខុទ្ទកាល័យ តែខ្ញុំមិនប្រាប់ទៅមនុស្សល្ងើទេ ទុកឱ្យមនុស្សនោះចាស់ស្លាប់ទាំងល្ងើទៅចុះ។ ការព្យាយាមធ្វើបន្លំរបស់ក្រុមក្លែងនេះមិនមែនធ្វើលើកទី១ទេ គឺធ្វើច្រើនដងរួចទៅហើយ»។

សូមបញ្ជាក់ថា នាពេលថ្មីៗនេះមានការចែកចាយនូវសេចក្តីណែនាំ (ក្លែងក្លាយ)មួយ ដោយចោទថា ជារបស់ខុទ្ទកាល័យលោកនាយករដ្ឋមន្រ្ដី ហ៊ុន សែន បណ្តាលឱ្យមានការភាន់ច្រឡំដល់សាធារណជន និងប្រជាពលរដ្ឋអ្នកតាមដានព័ត៌មាន ៕

ប្រភពព័ត៌មាន Fresh News