គណៈប្រតិភូក្រសួងការបរទេសកម្ពុជា នឹងចូលរួមកិច្ចប្រជុំចង្អៀត រដ្ឋមន្ត្រីការបរទេសអាស៊ាននៅប្រទេសថៃ
គណៈប្រតិភូក្រសួងការបរទេសកម្ពុជា នឹងចូលរួមកិច្ចប្រជុំចង្អៀត រដ្ឋមន្ត្រីការបរទេសអាស៊ាននៅប្រទេសថៃលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នឹងដឹកនាំគណៈប្រតិភូកម្ពុជា អញ្ជើញទៅចូលរួមកិច្ចប្រជុំចង្អៀត រដ្ឋមន្ត្រីការបរទេសអាស៊ាន នៅទីក្រុងឈៀងម៉ៃ ប្រទេសថៃ រយៈពេល២ថ្ងៃ។ នេះបើយោងតាមសេចក្តីប្រកាសព័ត៌មាន របស់ក្រសួងការបរទេស និងសហប្រតិបត្តិការអន្តរជាតិ ដែលទើបទទួលបាននៅថ្ងៃទី១៥ ខែមករានេះ។
សេចក្តីប្រកាសព័ត៌មាន បានឲ្យដឹងថា តបតាមការអញ្ជើញរបស់លោក ដូន ប្រាំម៉ូដវិណៃ រដ្ឋមន្ត្រីការបរទេសនៃព្រះរាជាណាចក្រថៃ លោកឧបនាយករដ្ឋមន្ត្រី ប្រាក់ សុខុន នឹងដឹកនាំគណៈប្រតិភូ អញ្ជើញទៅចូលរួមកិច្ចប្រជុំចង្អៀត រដ្ឋមន្ត្រីការបរទេសអាស៊ាន នៅទីក្រុងឈៀងម៉ៃ ពីថ្ងៃទី១៧ ដល់ថ្ងៃទី១៨ ខែមករា ឆ្នាំ២០១៩។
នៅក្នុងឱកាសនៃកិច្ចប្រជុំចង្អៀតនេះ រដ្ឋមន្ត្រីការបរទេសអាស៊ាននឹងពិភាក្សាពីវិស័យ អាទិភាពជាច្រើន ដែលមានចំណាប់អារម្មណ៍រួម ដែលអាស៊ានត្រូវអនុវត្តន៍នៅក្នុងឆ្នាំ២០១៩ នៅក្នុងដំណើរការកសាងសហគមន៍អាស៊ាន និងធ្វើការឆ្ពោះទៅកាន់សហគមន៍អាស៊ានមួយ ដែលផ្តោតការយកចិត្តទុកដាក់លើប្រជាជន និងឲ្យមានភាពរឹងមាំថែមទៀត ក៏ដូចជាពង្រឹងទំនាក់ទំនងជាមួយដៃគូខាងក្រៅដើម្បីផលប្រយោជន៍ទៅវិញទៅមក។
បើតាមសេចក្តីប្រកាសព័ត៌មានដដែល ក្នុងឋានៈជាប្រធានប្តូរវេនរបស់អាស៊ាន នៅក្នុងឆ្នាំ២០១៩ ប្រទេសថៃ បានជ្រើសយកមូលបទ «ជំរុញភាពជាដៃគូសម្រាប់ចីរភាព» ដែលស្របតាមវត្ថុបំណងរួមរបស់អាស៊ាន ក្នុងគោលដៅលើកកម្ពស់គោលដៅអភិវឌ្ឍន៍ ប្រកបដោយចីរភាព៕
