តុលាការចេញសេចក្តីសម្រេច បដិសេធពាក្យស្នើសុំទម្លាក់បទចោទប្រកាន់លើលោក កឹម សុខា ពីសំណាក់ក្រុមមេធាវីការពារសិទ្ធិរបស់ កឹម សុខា
តុលាការចេញសេចក្តីសម្រេច បដិសេធពាក្យស្នើសុំទម្លាក់បទចោទប្រកាន់លើលោក កឹម សុខា ពីសំណាក់ក្រុមមេធាវីការពារសិទ្ធិរបស់ កឹម សុខា
សាលាដំបូងរាជធានីភ្នំពេញ បានចេញដីកាសម្រេចដោយបដិសេធពាក្យស្នើសុំរបស់ក្រុមមេធាវីការពារសិទ្ធិរបស់លោក កឹម សុខា អតីតប្រធានគណបក្សសង្រ្គោះជាតិ ដែលបានដាក់ពាក្យស្នើសុំទៅកាន់តុលាការដើម្បីទម្លាក់បទចោទប្រកាន់លើលោក កឹម សុខា នេះបើយោងតាមសេចក្តីសម្រេចរបស់សាលាដំបូងរាជធានីភ្នំពេញ នៅថ្ងៃទី០៦ ខែមករា ឆ្នាំ២០១៩នេះ។
នៅក្នុងសេចក្តីសម្រេចរបស់សាលាដំបូងរាជធានីភ្នំពេញបានសរសេរថា៖ «បដិសេធពាក្យស្នើសុំ ចុះថ្ងៃព្រហស្បត្តិ៍ ៥រោច ខែមិគសិរ ឆ្នាំច សំរិទ្ធិស័ក ព.ស ២៥៦២ ត្រូវនឹងថ្ងៃទី២៧ ខែធ្នូ ឆ្នាំ២០១៨ របស់សហមេធាវីការពារសិទ្ធិឲ្យជនត្រូវចោទឈ្មោះ កឹម សុខា»។
ដីកាសម្រេចរបស់តុលាការក៏បានបង្ហាញថា សំណុំរឿងលោក កឹម សុខា ស្ថិតនៅក្នុងដំណាក់កាលស៊ើបសួរ ចៅក្រមស៊ើបសួរត្រូវចាត់និតិវិធី ដើម្បីស្រាវជ្រាវប្រមូលភស្តុតាងឲ្យបានពេញលេញ និងគ្រប់គ្រាន់ស្របតាមក្រមនីតិវិធីព្រហ្មទណ្ឌជាធរមាន ហើយបានបញ្ជាក់ថា សំណុំរឿងលោក កឹម សុខា កំពុងដំណើរការទៅមុខ ដើម្បីប្រមូលភស្តុតាងបន្ថែម។
សូមបញ្ជាក់ថា ក្រុមមេធាវីរបស់លោក កឹម សុខា បានដាក់សំណើជាថ្មីទៅកាន់ចៅក្រមស៊ើបសួរ នៃសាលាដំបូងរាជធានីភ្នំពេញ ដើម្បីសុំឲ្យទម្លាក់បទចោទចេញពីលោក កឹម សុខា អតីតប្រធានគណបក្សសង្គ្រោះជាតិ កាលពីថ្ងៃទី២៧ ខែធ្នូ ឆ្នាំ២០១៨កន្លងទៅ៕
