រដ្ឋសភា អនុម័តទាំងស្រុងលើវិសោធនកម្មច្បាប់ ដែលអាចបើកផ្លូវឱ្យអតីតថ្នាក់ដឹកនាំគណបក្សប្រឆាំង មានសិទ្ធិធ្វើនយោបាយឡើងវិញ

រដ្ឋសភា អនុម័តទាំងស្រុងលើវិសោធនកម្មច្បាប់ ដែលអាចបើកផ្លូវឱ្យអតីតថ្នាក់ដឹកនាំគណបក្សប្រឆាំង មានសិទ្ធិធ្វើនយោបាយឡើងវិញ

រដ្ឋសភាក្រោមសំឡេងតំណាងរាស្រ្ត១១៥/១១៥ នៅក្នុងកិច្ចប្រជុំពេញអង្គ នៅព្រឹកថ្ងៃទី១៣ ខែធ្នូ ឆ្នាំ២០១៨នេះ បានអនុម័តទាំងស្រុងហើយ លើសេចក្តីស្នើច្បាប់ស្តីពី វិសោធនកម្មច្បាប់គណបក្សនយោបាយ ដែលអាចបើកផ្លូវឱ្យអតីតថ្នាក់ដឹកនាំគណបក្សប្រឆាំង មានសិទ្ធិពេញលេញក្នុងការធ្វើនយោបាយឡើងវិញ។ កិច្ចប្រជុំនេះ ធ្វើឡើងក្រោមអធិបតីភាព លោក ហេង សំរិន ប្រធានរដ្ឋសភា។

សេចក្តីស្នើច្បាប់ស្តីពី វិសោធនកម្មច្បាប់គណបក្សនយោបាយ ត្រូវបានចុះហត្ថលេខា ដោយតំណាងរាស្រ្តចំនួន៨៧រូប ដើម្បីធ្វើវិសោធនកម្ម ទៅលើមាត្រា៤៥ថ្មី (ស្ទួន) នៃច្បាប់ស្តីពីគណបក្សនយោបាយ ដោយបន្ថែមនូវវាក្សខណ្ឌមួយថ្មីក្នុងមាត្រា៤៥ថ្មី (ស្ទួនមួយ) ដូចតទៅ៖
«បុគ្គលត្រូវបានតុលាការសម្រេចហាមឃាត់ការ ធ្វើសកម្មភាពនយោបាយ មិនអាចបង្កើតគណបក្សនយោបាយ ឬចូលរួមក្នុងគណបក្សនយោបាយណាមួយ ឬឈរឈ្មោះឲ្យគេបោះឆ្នោត ឬធ្វើសកម្មភាពណា មួយគាំទ្រ ឬប្រឆាំងគណបក្សណាមួយបានឡើយ។ បុគ្គលដែលបានតុលាការ សម្រេចហាមឃាត់ការធ្វើសកម្មភាពនយោបាយនេះ នឹងអាចទទួលបានវិញនូវសិទ្ធិនយោបាយពេញលេញដោយពេញច្បាប់ បន្ទាប់ពីផុតរយៈពេលនៃការហាមឃាត់ដែលកំណត់ដោយសាលដីការបស់តុលាការកំពូល ឬក្នុងករណីដែលបុគ្គលនោះត្រូវបានផ្តល់នីតិសម្បទាឡើងវិញដោយព្រះមហាក្សត្រ តាមសំណើរបស់នាយករដ្ឋមន្រ្តី តាមសេចក្តីស្នើសុំរបស់រដ្ឋមន្រ្តីក្រសួងមហាផ្ទៃ»។

គួរបញ្ជាក់ថា​ លោកនាយករដ្ឋមន្រ្ដី ហ៊ុន សែន បានបញ្ជាក់នៅពេលថ្មីនេះថា សេចក្តីស្នើច្បាប់នេះ ធ្វើឡើងមិនតម្រូវចំពោះតែគណបក្សណាមួយនោះទេ ប៉ុន្តែជាការសម្តៅអនុវត្តចំពោះគណបក្សនយោបាយទាំងអស់នៅកម្ពុជា ដែលអាចនឹងកើតឡើងរឿងនេះនៅថ្ងៃណាមួយ។

លោកបានលើកឡើងយ៉ាងដូច្នេះថា៖ «មិនមែនសម្តៅទៅលើគណបក្សនយោបាយណាមួយ ឬក្រុមណាមួយទេ ក៏ប៉ុន្តែធ្វើនេះ គឺសម្តៅលើបក្សនយោបាយទាំងអស់នៅក្នុងព្រះរាជាណាចក្រកម្ពុជា ព្រោះថានៅក្នុងច្បាប់ស្តីពីពន្ធនាគារ អនុញ្ញាតឱ្យនាយករដ្ឋមន្រ្តី សុំលើកលែងទោសឱ្យទណ្ឌិតនៅពេលណាក៏បាន ហ្នឹងគឺទាក់ទងជាមួយនឹងច្បាប់អ្នកជាប់គុក គឺបើកផ្លូវឱ្យនាយកស្នើសុំទៅព្រះមហាក្សត្រ ដើម្បីរាជទានទោស នៅពេលណាក៏បានដែរ ប៉ុន្តែច្បាប់ស្តីពីបក្សនយោបាយ ដែលបក្សនយោបាយនោះត្រូវរំលាយ ហើយមេដឹកនាំរបស់ពួកគេត្រូវបានហាមឃាត់សិទ្ធិធ្វើនយោបាយ មិនមែនច្រកណាមួយបើកផ្លូវឱ្យនាយករដ្ឋមន្រ្តីធ្វើការសុំលើកលែងទេ ហើយជាផ្លូវច្បាប់ សាលក្រមតុលាការកំពូលបិទផ្លូវតវ៉ា។ ដូច្នេះមានន័យថា អត់មានច្រកចេញតែម្តង បើចង់ឱ្យកាត់ឡើងវិញ គឺផ្ទុយនឹងសាលក្រមតុលាការកំពូល»។

ទោះជាយ៉ាងនេះក្តី លោក កឹម សុខា អតីតប្រធាន អតីតគណបក្សសង្រ្គោះជាតិ និង លោកគង់ គាំ បានប្រកាសគាំទ្រចំពោះការរៀបចំសេចក្តីស្នើច្បាប់នេះ។

សូមបញ្ជាក់ថា ការរៀបចំសេចក្តីស្នើច្បាប់នេះ បានធ្វើឡើងបន្ទាប់ពី រាជរដ្ឋាភិបាលកម្ពុជា តាមរយៈក្រសួងការបរទេស និងសហប្រតិបត្តិការអន្តរជាតិ បានចេញសេចក្តីថ្លែងការណ៍សំខាន់មួយ សម្រួលដល់ស្ថានការណ៍អ្នកនយោបាយក្រុមប្រឆាំង ដែលត្រូវតុលាការហាមឃាត់សិទ្ធិធ្វើនយោបាយកន្លងទៅ ក៏ដូចជាសម្រួលដល់ប្រព័ន្ធផ្សព្វផ្សាយបរទេសនៅកម្ពុជា អង្គការសង្គមស៊ីវិល និងសហជីពជាដើម៕