ខ្មែរប៉ុស្ដិ៍ Close

លោក ទៀ បាញ់៖ ជនពិការកាន់តែមានសមត្ថភាព ក្នុងការប្រកួតប្រជែងទីផ្សារពលកម្មដែលអាចរកប្រាក់ចំណូលប្រកបដោយឯករាជ្យម្ចាស់ការ

ដោយ៖ ព្រហ្ម សុវណ្ណ ​​ | ថ្ងៃព្រហស្បតិ៍ ទី៧ ខែធ្នូ ឆ្នាំ២០១៧ ព័ត៌មានទូទៅ 1534
លោក ទៀ បាញ់៖ ជនពិការកាន់តែមានសមត្ថភាព ក្នុងការប្រកួតប្រជែងទីផ្សារពលកម្មដែលអាចរកប្រាក់ចំណូលប្រកបដោយឯករាជ្យម្ចាស់ការសម្តេច​ពិជ័យ​សេនា ទៀ បាញ់៖ ជនពិការកាន់តែមានសមត្ថភាព ក្នុងការប្រកួតប្រជែងទីផ្សារពលកម្មដែលអាចរកប្រាក់ចំណូលប្រកបដោយឯករាជ្យម្ចាស់ការ

ក្នុងពិធីអបអរសាទរទិវាជនពិការកម្ពុជាលើកទី១៩ និងទិវាជនពិការអន្តរជាតិលើកទី៣៩ នៅព្រឹកថ្ងៃទី០៧ ខែធ្នូ ឆ្នាំ២០១៧នេះ សម្តេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួង​ការពារ​ជាតិ​ បានលើកឡើងថា ជនពិការកាន់តែមានសមត្ថភាព ក្នុងការប្រកួតប្រជែងក្នុងទីផ្សារពលកម្ម ដែលអាចរកប្រាក់ចំណូលដើម្បីធានានិរន្តភាព ជីវភាពរស់នៅប្រកបដោយឯករាជ្យម្ចាស់ការ និងសេចក្តីថ្លៃថ្នូរ តាមរយៈកម្មវិធីបណ្តុះបណ្តាលវិជ្ជាជីវៈ និងការបង្កើតមុខរបរ។

សម្តេច​ពិជ័យ​សេនា​ ទៀ បាញ់ បន្ថែមថា រាជរដ្ឋាភិបាលទទួលស្គាល់សិទ្ធិរបស់ជនពិការ ផ្ទាល់និងក្រុមគ្រួសារ ដោយបានផ្តល់ផ្ទះសម្បែងសមរម្យ សម្លៀកបំពាក់ ការកែលម្អនូវជីវភាពរស់នៅ ប្រចាំថ្ងៃដោយគ្មានការរើសអើង និងឈរលើមូលដ្ឋានពិការភាព។ បើតាមសម្តេច​ពិជ័យ​សេនា​ ទៀ បាញ់ រាជរដ្ឋាភិបាលបានផ្ដល់ កម្មសិទ្ធិដីធ្លី ជូនយោធិនពិការនៅតំបន់អភិវឌ្ឍជនពិការ៣១៧ តាកែនកោះស្លា ខេត្តកំពត នៅស្រុកគូលែន ខេត្តសៀមរាប និងនៅភ្នំឆ័ត្រ ខេត្តបន្ទាយមានជ័យ សម្រាប់សាងសង់លំនៅឋាន និងធ្វើអាជីវកម្ម កសិកម្មជាលក្ខណៈគ្រួសារ ព្រមទាំងបានផ្តល់សេវា ស្តារលទ្ធភាពពលកម្មនៅសហគមន៍។

សម្តេចពិជ័យ​សេនា​ ក៏បានឲ្យដឹងដែរថា បច្ចុប្បន្ននេះសិស្សពិការគ្រប់ប្រភេទ សរុបចំនួន២២,១៣៣នាក់ បាននិងកំពុងរៀននៅគ្រប់កម្រិតសិក្សាដោយមិនមានការរើសអើង។ ក្រៅពីនេះសិស្សពិការភ្នែកនិងគ-ថ្លង់ ចំនួន១,៤៣៣នាក់ បាននិងកំពុងសិក្សានៅ ថ្នាក់អប់រំពិសេស ថ្នាក់សមាហរណកម្ម ថ្នាក់អប់រំមូលដ្ឋាន ថ្នាក់អប់រំក្រៅប្រព័ន្ធនៃកម្មវិធីអភិវឌ្ឍ មនុស្សគ-ថ្លង់ អង្គការគ្រួសារថ្មី។ អក្សរស្ទាប និងភាសាសញ្ញាក៏ត្រូវបានធ្វើការអភិវឌ្ឍដាក់បញ្ចូល ទៅក្នុងកម្មវិធីសិក្សា នៃវិស័យអប់រំ។ អគារសិក្សាចំនួន៨,២០០ បានរៀបចំឲ្យមានជំរាលសម្រាប់សិស្សពិការទាំងនៅទីជនបទ និងនៅទីក្រុង ដែលជាការបង្កលក្ខណៈងាយស្រួល ដល់សិស្សពិការទទួលបានការសិក្សាអប់រំ រហូតដល់កម្រិតឧត្តមសិក្សា។
យុវជនពិការ ក៏ត្រូវបានលើកទឹកចិត្តឲ្យទៅចូលរួមប្រកួតប្រជែងជាសកល ជាមួយយុវជនពិការក្នុងតំបន់ និងក្នុងពិភពលោក ព្រមទាំងបាននាំមកនូវមេដាយ ដែលជាកិត្តិយសសម្រាប់ប្រទេសជាតិ និងសង្គមទាំងមូលទៀតផង។

តាមការបញ្ជាក់របស់ សម្តេច​ពិជ័យ​សេនា​ឧបនាយករដ្ឋមន្រ្តី បានអោយដឹងថា ចាប់តាំងពីឆ្នាំ១៩៩៩ រហូតមកទល់ឆ្នាំ២០១៧នេះ គណៈកម្មាធិការជាតិប៉ារ៉ាឡាំពិកកម្ពុជា បានបញ្ជូនជនពិការកម្ពុជាទៅចូលរួមការប្រកួត ជាលក្ខណៈអន្តរជាតិ បានទទួលមេដៃ សរុបចំនួន១៥៩គ្រឿង ក្នុងនោះមានមេដៃមាសចំនួន២២គ្រឿង មេដៃប្រាក់៧៨គ្រឿង និងមេដៃសំរិទ្ធ៥៩គ្រឿង។

ចាប់តាំងពីឆ្នាំ២០១៣ រហូតមកទល់ឆ្នាំ២០១៦ គណៈកម្មាធិការជាតិស្ប៉េស្យាល់អូឡាំពិកកម្ពុជា ក៏បានបញ្ជូនកុមារពិការសតិបញ្ញាកម្ពុជា ទៅចូលរួមការប្រកួតជាលក្ខណៈអន្តរជាតិ បានទទួលមេដៃសរុបចំនួន ៤១គ្រឿង ក្នុងនោះមានមេដៃមាសចំនួន៣គ្រឿង មេដៃប្រាក់៣៤គ្រឿង និងមេដៃសំរិទ្ធ៤គ្រឿង៕

 

 

អត្ថបទទាក់ទង