លោកនាយករដ្ឋមន្រ្តីហ៊ុន សែន ចូលរួមកិច្ចប្រជុំកំពូលប្រចាំឆ្នាំ របស់មូលនិធិរូបិយវត្ថុអន្តរជាតិ (IMF) និងធនាគារពិភពលោក (World Bank) នៅសាធារណរដ្ឋឥណ្ឌូណេស៊ី
លោកនាយករដ្ឋមន្រ្តីហ៊ុន សែន ចូលរួមកិច្ចប្រជុំកំពូលប្រចាំឆ្នាំ របស់មូលនិធិរូបិយវត្ថុអន្តរជាតិ (IMF) និងធនាគារពិភពលោក (World Bank) នៅសាធារណរដ្ឋឥណ្ឌូណេស៊ី
បន្ទាប់ពីបានអញ្ជើញបំពេញទស្សនកិច្ចផ្លូវការ និងអញ្ជើញចូលរួមកិច្ចប្រជុំកំពូលមេគង្គ-ជប៉ុន លើកទី១០ នៅទីក្រុងតូក្យូ ប្រទេសជប៉ុន រយៈពេល៤ថ្ងៃរួចមក នៅថ្ងៃទី១០ ខែតុលា ឆ្នាំ២០១៨នេះ លោកនាយករដ្ឋមន្ត្រី ហ៊ុន សែន និងគណៈប្រតិភូបានអញ្ជើញធ្វើដំណើរចាកចេញពីទីក្រុងតូក្យូ ប្រទេសជប៉ុន ក្នុងដំណើរបន្តចូលរួមវេទិកា នៃជំនួបថ្នាក់ដឹកនាំអាស៊ាន និងអញ្ជើញចូលរួមកិច្ចប្រជុំកំពូលប្រចាំឆ្នាំ របស់មូលនិធិរូបិយវត្ថុអន្តរជាតិ (IMF) និងធនាគារពិភពលោក (World Bank) ឆ្នាំ២០១៨ នៅកោះបាលី សាធារណរដ្ឋឥណ្ឌូណេស៊ី ពីថ្ងៃទី១០ ដល់ ថ្ងៃទី១២ ខែតុលា ឆ្នាំ២០១៨។
នៅអាកាសយានដ្ឋានអន្តរជាតិ ហាណេដា ទីក្រុងតូក្យូ ប្រទេសជប៉ុន វត្តមាននៃការអញ្ជើញជូនដំណើរលោកនាយករដ្ឋមន្ត្រី ហ៊ុន សែន និងគណៈប្រតិភូជាន់ខ្ពស់ រាជរដ្ឋាភិបាលកម្ពុជារួមមាន លោក ស៊ុយស៊ុយគី ណូរីកាស៊ុ អនុរដ្ឋមន្រ្តីការបរទេសជប៉ុន លោក ហូរី ណូឈិះ ឯកអគ្គរាជទូតវិសាមញ និងពេញសមត្ថភាពរបស់ប្រទេសជប៉ុន ប្រចាំកម្ពុជា លោក អ៊ឹង រចនា ឯកអគ្គរាជទូតវិសាមញ និងពេញសមត្ថភាពរបស់កម្ពុជា ប្រចាំប្រទេសជប៉ុន និងលោក លោកស្រី ព្រមទាំងវត្តមានឥស្សរជនជាន់ខ្ពស់រដ្ឋាភិបាលជប៉ុន និងឥស្សរជនការទូតរបស់កម្ពុជា ប្រចាំប្រទេសជប៉ុន ជាច្រើនរូប។
សូមបញ្ជាក់ដែរថា លោកនាយករដ្ឋមន្រ្តីហ៊ុន សែន និងគណៈប្រតិភូជាន់ខ្ពស់រាជរដ្ឋាភិបាលកម្ពុជា បានអញ្ជើញធ្វើដំណើរទៅដល់ដែនដីលំហែកាយកោះបាលី សាធារណរដ្ឋឥណ្ឌូណេស៊ី ប្រកបដោយសុវត្តិភាពហើយ កាលពីវេលាម៉ោង១៧និង២០នាទី ម៉ោងនៅប្រទេសឥណ្ឌូណេស៊ី ត្រូវនឹងម៉ោង១៦ និង២០នាទី ម៉ោង នៅរាជធានីភ្នំពេញ ប្រទេសកម្ពុជា ជាទីដែលបណ្តាមេដឹកនាំនៃប្រទេសអាស៊ាន អញ្ជើញចូលរួមវេទិកា នៃជំនួបថ្នាក់ដឹកនាំអាស៊ាន និងអញ្ជើញចូលរួមកិច្ចប្រជុំ ប្រចាំឆ្នាំរបស់មូលនិធិរូបិយវត្ថុអន្តរជាតិ និងធនាគារពិភពលោក ឆ្នាំ២០១៨ នៅកោះបាលី ប្រទេសឥណ្ឌូនស៊ី ដែលនិងប្រារព្វនៅថ្ងៃទី១១-១២ ខែតុលាស្អែក។
នៅអាកាសយានដ្ឋានអន្តរជាតិ ង៉ូរ៉ារ៉ៃ កោះលំហែកាយបាលី សាធារណរដ្ឋឥណ្ឌនេស៊ី វត្តមាននៃការអញ្ជើញដល់របស់លោកនាយករដ្ឋមន្រ្តី និងគណៈប្រតិភូជាន់ខ្ពស់ ត្រូវបានការធ្វើគារវកិច្ចស្វាគមន៍យ៉ាងកក់ក្តៅបំផុតពីលោក រ៉ូដាតារា រដ្ឋមន្រ្តីក្រសួងទំនាក់ទំនង និងព័ត៌មានវិទ្យាឥណ្ឌូណេស៊ី លោក ហោ ណាំបូរ៉ា ឯកអគ្គរាជទូតវិសាមញ និងពេញសមត្ថភាពរបស់កម្ពុជា ប្រចាំសាធារណរដ្ឋឥណ្ឌូណេស៊ី ព្រមទាំងលោក លោកស្រី ជាឥស្សរជនជាន់ខ្ពស់រដ្ឋាភិបាលឥណ្ឌូណេស៊ី និងឥស្សរជនការទូតរបស់ព្រះរាជាណាចក្រកម្ពុជា ប្រចាំសាធារណរដ្ឋឥណ្ឌូណេស៊ីជាច្រើនរូប។
សូមជម្រាបផងដែរថា លោកនាយករដ្ឋមន្រ្តី ហ៊ុន សែន និងអញ្ជើញធ្វើបទអន្តរាគមន៍ចំនួន២ ក្នុងនោះទី១ ថ្លែងក្នុងវេទិកា នៃជំនួបថ្នាក់ដឹកនាំអាស៊ាន និងទី២ថ្លែងក្នុងពិធីបើកកិច្ចប្រជុំ ប្រចាំឆ្នាំរបស់មូលនិធិរូបិយវត្ថុអន្តរជាតិ និងធនាគារពិភពលោក ឆ្នាំ២០១៨៕
