ស្វែងយល់ពីដើមកំណើតជនជាតិខ្មែរ និងមជ្ឈដ្ឋានភូមិសាស្ត្រ
ស្វែងយល់ពីដើមកំណើតជនជាតិខ្មែរ និងមជ្ឈដ្ឋានភូមិសាស្ត្រ
ក.មជ្ឈដ្ឋានភូមិសាស្ត្រ
ក្នុងសម័យដែលរុងរឿងបំផុត ទឹកដីខ្មែរបានលាតសន្ធឹងទៅលើមួយភាគធំនៃអាស៊ីអាគ្នេយ៍ដីគោក ។ ក្រៅពីប្រទេសខ្មែរបច្ចុប្បន្ន ទឹកដីកូសាំងស៊ីនទាំងមូល ផ្នែកខាងត្បូង និងកណ្ដាលនៃប្រទេសឡាវ និងផ្នែកខាងកើតនៃប្រទេសថៃ ក៏ជារបស់ខ្មែរដែរ ។ ហើយមានពេលខ្លះ អំណាចខ្មែរបានលាតសន្ធឹងរហូតដល់ជ្រោយម៉ាឡាយូ និងប្រទេសភូមាថែមទៀតផង ។
ពីសវត្សទី១៣ ដល់ ១៩ ទឹកដីខ្មែរត្រូវរួញបន្តិចម្ដងៗ ដោយសារអំពើរុករានរបស់ជនជាតិសៀម និងជនជាតិយួន ដែលមានបំណងចង់យកទន្លេមេគង្គធ្វើជាព្រំដែនរួមរបស់ពួកគេ ។ ដោយមានការស្នើសុំពីសំណាក់ព្រះរាជាខ្មែរ ហើយដោយស្របនឹងប្រយោជន៍របស់គេផងនោះ បារាំងបានធ្វើអន្តរាគមន៍ចូលមកក្នុងនយោបាយខ្មែរ ហើយប្រហែលដោយសារនោះ ជាតិខ្មែរយើងក៏អាចនៅគង់វង្សរហូតដល់សព្វថ្ងៃ ព្រមទាំងអាចថែរក្សាទឹកដីដែលខ្លួនធ្លាប់មានកាលពីសតវត្សទី១៨ ប៉ុន្តែជនជាតិខ្មែររាប់លាននាក់ត្រូវឃ្លាតឆ្ងាយពីមាតុភូមិរបស់ខ្លួន ហើយត្រូវរស់នៅក្រោមការគ្រប់គ្រងរបស់ជនបរទេសដែលបានយកទឹកដីខ្មែរធ្វើជារបស់គេ ។
ប្រទេសខ្មែរសព្វថ្ងៃមានផ្ទៃដី ១៨១.០៣៥ គម២ ហើយស្ថិតនៅចន្លោះប្រទេសថៃ ប្រទេសឡាវ ប្រទេសវៀតណាម និងឈូងសមុទ្រថៃ ។ បើនិយាយអំពីសណ្ឋានដី គេឃើញមានភូមិភាគ ២ ខុសប្លែកគ្នា ៖ មួយផ្នែកជាដីខ្ពស់នៅខាងជើង ឦសាន និងនិរតី មួយផ្នែកទៀត ជាដីទំនាបនៃតំបន់បឹងទន្លេសាប និងអាងទន្លេមេគង្គ ។
ភូមិភាគដីខ្ពស់ ជាភូមិភាគសម្បូរដោយព្រៃឈើ ហើយមានសណ្ឋានហាក់ដូចជារបងព័ទ្ធជុំវិញដីទំនាប ។ នៅទិសនិរតី ជួរភ្នំក្រវាញបានលាតសន្ធឹងតាមមាត់សមុទ្រ មានកម្ពស់មធ្យមមិនហួសពី ១០០០ ម ឡើយ ។ នៅខាងជើង ជួរភ្នំដងរែកជាព្រំដែនធម្មជាតិរវាងប្រទេសខ្មែរ និងប្រទេសថៃ ។ នៅខាងត្បូងជួរភ្នំនេះ គេឃើញមានភ្នំ (ភ្នំដែក) និងខ្ពង់រាបខ្លះ (ភ្នំគូលែន) ។ នៅទិសឦសាន ខ្ពង់រាបក្រានីត បានលាតសន្ធឹងក្នុងខេត្តរតនគីរី និងមណ្ឌលគីរី ហើយមានកន្លែងខ្លះមានកម្ពស់រហូតដល់ ១០០០ ម (កន្លែងប្រជុំព្រំដែនបី) ។ ខ្ពង់រាបទាំងនេះជាប្រភពនៃស្ទឹងបីដែលបានហូរឆ្ពោះទៅរកទន្លេមេគង្គគឺ ស្រែពក សេសាន និង សេកុង ។
ផ្នែកកណ្ដាលនៃប្រទេសខ្មែរ មានសណ្ឋានជាចានដែកធំមួយ ដែលគេឃើញមានភ្នំនៅត្រង់នេះខ្លះ ត្រង់នោះខ្លះ ។ គឺនៅត្រង់នោះហើយដែលមានមនុស្សនៅច្រើនកុះករជាទីបំផុត ហើយដែលចិញ្ចឹមជីវិតដោយរបរកសិកម្ម ព្រោះជាដីមានជីជាតិ និងមានទំហំធំទូលាយជាងគេនៅឥណ្ឌូចិនទាំងមូល ។
ទន្លេមេគង្គ ជាទន្លេធំតែមួយដែលបានឆ្លងកាត់វាលទំនាបខ្មែរពីខាងជើងរហូតដល់ចុងខាងត្បូង ។ ទន្លេនេះមានប្រវែងជាង ៤០០០ គម មានប្រភពចេញពីខ្ពង់រាបទីបេ ហើយហូរកាត់ប្រទេសចិនខាងត្បូង ប្រទេសភូមា ប្រទេសថៃ ប្រទេសឡាវ ប្រទេសខ្មែរ និងប្រទេសវៀតណាមខាងត្បូង ។ នៅត្រង់ខោនក្នុងប្រទេសឡាវ ដុំថ្មជាច្រើនបានរាំងផ្លូវទន្លេមេគង្គជាប់ បង្កើតបានជាអាងទឹកមានកម្ពស់ប្រមាណ ២០ ម ហើយដែលជាហេតុបណ្ដាលឲ្យមានល្បាក់ទឹក មិនអាចឲ្យកប៉ាល់ធ្វើចរាចរទៅមកបានឡើយ ។ ដីសណ្ដទន្លេមេគង្គមានដៃច្រើន ខ្លះមានទទឹងដល់ទៅ ២ គម ហើយមានទំហំប្រមាណជា ៦០០ គម ។
ខ. អំពីដើមកំណើតជាតិខ្មែរ
ក្នុងការសិក្សាអំពីអរិយធម៌ខ្មែរ យើងតែងតែជួបនូវបញ្ហាចោទឡើងជានិច្ច កត្តាទាំងនេះហើយដែលធ្វើអោយអ្នក សិក្សាស្រាវជ្រាវ ខិតខំដោះស្រាយដោយបញ្ចេញមតិយោបល់ប្លែក មានពេលខ្ល៖យោបល់ទាំងនោះមានលក្ខណៈផ្ទុយគ្នាទាំងស្រុងទៀតផង។ ជាទូទៅគេតែងតែភ្ជាប់ជនជាតិខ្មែរទៅននឹងជនជាតិណាមួយផ្សេងទៀត ដែលមានអរិយធម៌ខ្ពស់ រដូវជឿនលឿនជាង ដើម្បីរក្សានូវអត្ថិភាពរបស់ខ្មែរ ។
១ មតិទី១ ស្ដីពីរដើមកំណើតជាតិខ្មែរ
តាមមតិទី១នេះគេបានទទួលស្គាល់ថា ខ្មែរជាជាតិអន្តោប្រវេសន៍ចេញពីប្រទេសឥណ្ឌា។ហើយបានចូលមករាតត្បាតដណ្ដើមទឹកដីរបស់ជនជាតិដើមមួយ។ ជាតិដើមនោះគឺជនជាតិក្នុងអំបូរម៉ាឡាយួប៉ួលីណេស៊ីយែន ឬអួស្រ្តួណេស៊ីយែន គឺស្ថិតក្នុងអំបូរភាសារនិយាយរបស់ជនជាតិដែលរស់នៅលើកោះនៃមហាសមុទ្រឥណ្ឌា និង មហាសមុទ្រប៉ាស៊ីភិច (នេះគឺជាទស្សនះរបស់លោក ហេនដ្រឹកគែរ ) ។ មានអ្នកប្រាជ្ញមួយចំនួនទៀត ដូចជាលោក អាដេម៉ាឡឺក្លែរ និងលោក ព្បែរគួរួ ក៏ទទួលស្គាល់នូវទស្សនះខាងលើនេះផងដែរ ។
លោកព្បែរគួរួថែមទាំងបានបញ្ជាក់ទៀតថា ជាជាតិខ្មែរ មនប្រហែលជាត្រូវពួក ឌ្រាថិទ រឺអារ្យ័ន បានច្រានអោយចេញពីប្រទេសឥណ្ឌា ក្នុងនោះមានមួយចំនួនបានចូលមកលុកលុយប្រទេសភូមា ប្រទេសសៀម និងប្រទេសកម្ពុជាសព្វថ្ងៃ ។
២ មតិទី២ ស្ដីពីដើមកំណើតជាតិខ្មែរ
តាមមតិទី២នេះបានសន្និដ្ឋានថា ខ្មែរជាជនជាតិពិសេសមួយដែលស្ថិតនៅក្នុងក្រុមខ្មែរ មន ដែលបានមកកកើតឡើង និងរស់នៅក្នុងភូមិភាគអាស៊ីអាគ្នេយ៍ តាំងពីបុរេប្រវត្តិមកម្ល៉េះ (នេះគឺជាយោបល់របស់លោក ប៊ែរណាហ្វ៊ីលីពក្រោសឺ លឹយេ អតីតអភិរក្សអង្គរ និងលោកម៉ាសែលតាឡាបួ ) ។ លោកទាំងពីរបានយល់ឃើញថា ក្នុងសម័យបុរេប្រវត្តិសាស្រ្ដ មានហ្វូងមនុស្សជាច្រើនក្រុមបានចេញដំណើរពភូមិភាគខាងជើងហើយចូលមកតាំងលំនៅក្នុងភូមិភាគអាស៊ីអាគ្នេយ៍ គឺពួកអូស្រ្ដូ ឡូអ៊ីត ពួកមេឡាណេស៊ីយ៉ាង ។
អំបូរមន ខ្មែរគឺជាពូជកាត់ផ្សំរវាងពួកឥណ្ឌូណេស៊ីយ៉ាង និងពួកមេឡាស៊ីយ៉ាង ហើយបានមករស់នៅរាយប៉ាយលើទឹកដី ដែលលាតសន្ធឹងលើជ្រោយឥណ្ឌូចិន ជ្រោយម៉ាឡាយួ រហូតដល់ព្រំប្រទល់នៃប្រទេសឥណ្ឌា ។
តាមទស្សនះទាំងពីរខាងលើយើងឃើញថា ហាក់ដូចជាសមស្របនិងទស្សនះរបស់ខ្មែរភាគច្រើនដោយផ្អែកតាមរយះ នៃរឿងព្រេងនិទាននានា ពិសេសរឿងព្រះថោងនាងនាគ ខ្មែរតែងចាត់ទុកខ្លួនឯងថា ខ្មែរគឺជាជនជាតិមួយដែលមានប្រពភ ចេញពីស្រុកខ្មែរនេះឯង ។
ដូចនេះមានន័យថាប្រសិនបើគ្មាននាងនាគ ដែលជាម្ចាស់ស្រុកខ្មែរនោះទេ បព្រះថោង ឬ កៅណ្ឌិន្យ ដែលមានប្រភព មកពីឥណ្ឌា គឺពុំមានលទ្ធភាពមកទាក់ទងជាមួយនាងនាគ ដែលជារាជបុត្រីនៃនគរហ្វូណន ឬកោះគោកធ្លកនេះបានដែរ ។ ពោលគឺបើគ្មានខ្មែរជាម្ចាស់ស្រុកនៅលើកោះគោកធ្លកនេះទេ ពួកឥណ្ឌាក៏មិនអាចមានលទ្ធភាពមកធ្វើការផ្សព្វផ្សាយ អរិយធម៌របស់ខ្លួននៅលើទឹកដីខ្មែរនោះដែរ ។
សរុបសេចក្ដីមកយើងសង្កេតឃើញថាបញ្ហាដើមកំណើតជាតិខ្មែរគឺមានសម្មតិកម្មជាច្រើនហើយប្លែកៗគ្នាទៀតផង។ តែមតិទាំងនោះក៏មានចំនុចរមមួយគឺថា ខ្មែរជាជនជាតិដែលស្ថិតក្នុងអំបូរពិសេសមួយគឺអំបូរខ្មែរ មនឬជាជនជាតិ ខមនេះឯង ដែលមានដើមកំណើតនៅលើទឹកដីខ្មែរពិតប្រាកដ ។
