ខ្មែរប៉ុស្ដិ៍ Close

ទឹកបឹងមួយកន្លែងនៅកម្ពុជា មាន​ពណ៌​ និងទេសភាពប្លែកភ្នែក

ដោយ៖ សន ប្រាថ្នា ​​ | ថ្ងៃអង្គារ ទី៧ ខែសីហា ឆ្នាំ២០១៨ កំសាន្ដ & ប្លែកៗ 3111
ទឹកបឹងមួយកន្លែងនៅកម្ពុជា មាន​ពណ៌​ និងទេសភាពប្លែកភ្នែកទឹកបឹងមួយកន្លែងនៅកម្ពុជា មាន​ពណ៌​ និងទេសភាពប្លែកភ្នែក

ភ្នំ​ខ្លែង​ពណ៌​ស្ថិត​ក្នុង​ខេត្ត​បន្ទាយ​មានជ័យ បាន​ក្លាយ​ជា​ទីតាំង​មួយ​ដែល​កំពុង​តែ​ទទួល​បាន​ចាប់​អារម្មណ៍​យ៉ាង​ខ្លាំង ពី​មួយ​ថ្ងៃ​ទៅ​មួយ​ថ្ងៃ ព្រោះ​មាន​ទឹក​បឹង​ដ៏​ធំ​មួយ​មាន​រំលេច​ពណ៌​ប្រៀប​ដូច​ទឹក​សមុទ្រ​ដ៏​ថ្លា​ឈ្វេងមើល​ឆ្លុះដល់​បាត​ដី។

បើ​តាម​លោក វឌ្ឍនា ដែល​ជា​កងទ័ព​កំពុង​ឈរ​ជើង​ក្នុង​ខេត្ត​បន្ទាយ​មានជ័យ​បាន​ឲ្យ​ដឹង​ថា ទឹក​បឹង​មាន​ទំហំ​ដ៏​ធំនេះ មានទីតាំងស្ថិតក្នុងបន្ទាយការពារព្រំដែន៥០៣។ អ្វីដែលពិសេសជាងនេះទៅទៀតនោះ ទឹកពណ៌ខៀវដ៏ស្រស់បំព្រងនេះ មាន​ភ្នំ​ព័ទ្ធ​ជុំវិញ​តែ​ម្ដង ដែល​ហៅ​ថា​ភ្នំ​ខ្លែង​ពណ៌។ តាម​ការ​រៀបរាប់​របស់​លោក​វឌ្ឍនា មកកាន់ Sabay នៅ​ថ្ងៃនេះឲ្យដឹងទៀតថា ទឹក​បឹង​ដ៏​ស្រស់​ស្អាត​នេះ កើត​ចេញ​ពី​ការ​កាយ​ថ្ម​របស់​ក្រុមហ៊ុន​ចិន​មួយ ដើម្បី​យក​ទៅ​សាងសង់​ផ្លូវក្រវាត់ព្រំដែន។

ការ​កាយ​ថ្ម​នេះ បណ្ដាល​ឲ្យ​ចេញ​ទឹក​មក​ស្រស់​ស្អាត​យ៉ាង​ចម្លែក ហើយ​ថែម​ទាំង​អាច​ងូត​លេង​យ៉ាង​សប្បាយ​ទៀត​ផង។ ប៉ុន្តែទឹកនេះមានជម្រៅជ្រៅរហូតទៅដល់ជាង២០ម៉ែត្រឯណោះ អ្នកដែលមិនចេះហែលទឹកក៏ត្រូវប្រុងប្រយ័ត្នផងដែរ ប្រសិនបើចង់ទៅលេង។

នៅ​ទីនោះ​មិន​ត្រឹម​តែ​មាន​ទឹក​បឹង​ដ៏​ធំ​នោះ​ទេ តែ​ក៏​មាន​ទេសភាព​ហ៊ុម​ព័ន្ធ​ជុំវិញ​យ៉ាង​ស្រស់​ស្អាត បាន​ធ្វើ​ឲ្យ​ទីតាំង​មួយ​នេះ មាន​សម្រស់​មិន​​ចាញ់​តំបន់ទេសចរណ៍​ផ្សេងៗ​នៅ​ក្នុង​ប្រទេស​កម្ពុជា​ឡើយ។ ភ្នំ​ខ្លែង​ពណ៌នេះស្ថិតនៅចម្ងាយប្រមាណជាង២០គីឡូម៉ែត្រប៉ុណ្ណោះពីទីរួមខេត្ត មាន​ទីតាំង​ស្ថិត​នៅ​ភូមិ​ចក់ពួក ឃុំ​ស្លក្រាម ស្រុក​ស្វាយ​ចេក ខេត្ត​បន្ទាយមានជ័យ។

ប្រសិន​បើ​បងប្អូន​ចង់​ទៅ​ទស្សនា​កម្សាន្ត​អាច​ធ្វើ​ដំណើរ​តាម​ក្រោយ​រង្វង់មូល​ចក់ពួក កន្លែង​ចិន​កាយ​ថ្ម (ជិះ​ចូល​តាម​ផ្លូវ​គោកតាសត បត់​តាម​ផ្លូវ​វិស្វកម្ម ងាយ​ស្រួល​ធ្វើ​ដំណើរ)។ នៅតាមដងផ្លូវទៅកាន់ទីតាំងខាងលើនេះ បងប្អូននឹងប្លែកភ្នែកជាមួយចម្ការរាប់រយ​​ហិកតានៅតាមដងផ្លូវមានទាំងដំណាំដំឡូង ចម្ការកៅស៊ូ ស្វាយចន្ទីជាដើម៕

អត្ថបទទាក់ទង