ការក្រោកពីព្រលឹម ពិតជាផ្តល់អត្ថប្រយោជន៍យ៉ាងច្រើនដល់អ្នក
ការក្រោកពីព្រលឹម ពិតជាផ្តល់អត្ថប្រយោជន៍យ៉ាងច្រើនដល់អ្នកការក្រោកពីគេង នៅពេលព្រឹកព្រលឹម គឺជារឿងមួយ ដែលពិបាកធ្វើសម្រាប់អ្នកដែលរវល់វក់វីនឹងការងារ សល់ពីពេលយប់។ ដូច្នេះហើយ ទើបពួកគេត្រូវគេងសងវិញ រហូតថ្ងៃរះខ្លាំង ឬអាចដាច់មួយព្រឹកក៏ថាបាន។
ទោះជាយ៉ាងនេះក្ដី ការគេងយូរទ្រមក់ម្ដងម្កាល មិនអីទេ តែសូមកុំឲ្យក្លាយទៅជាទម្លាប់ ជាប់រាប់ខួបរាប់ខែ និងធ្វើឲ្យខូចសុខភាព និងបាត់បង់សម្រស់ ដោយមិនដឹងខ្លួន។
អ្នកជំនាញផ្នែកសម្រស់ និងសុខភាព បង្ហើបឲ្យដឹងថា ប្រសិនបើយើងព្យាយាមក្រោកពីគេងពីព្រលឹមរាល់ថ្ងៃ មានន័យថា យើងចំណេញ ៧ចំណុច ដ៏សំខាន់។
ខាងក្រោមនេះ ជាអត្ថប្រយោជន៍ ៧ចំណុច ដែលអ្នកអាចទទួលបានពីការក្រោកពីព្រលឹម។
១. អារម្មណ៍ល្អ
នៅពេលដែលអ្នកក្រោកពីព្រលឹម អ្នកនឹងអាចសង្កេតឃើញថា អារម្មណ៍អ្នកនឹងស្រស់ស្រាយជាងពេលដែលអ្នកគេងដល់ថ្ងៃត្រង់ ដែលធ្វើឲ្យអ្នកមួលម៉ៅខ្លាំង។ ដូចនេះ ការក្រោកពីព្រលឹម អ្នកនឹងមានអារម្មណ៍បំពេញការងារ ដោយអាចទទួលបានផលល្អ។
២. សម្រស់ស្បែកស្អាត
នៅពេលដែលអ្នកឆាប់ចូលគេង និងក្រោកពីព្រលឹម នោះកោសិកាស្បែកថ្មីនឹងឆាប់ដុះឡើង មកជំនួសស្បែកចាស់របស់អ្នក ដោយធ្វើឲ្យស្បែកអ្នកថ្មី ភ្លឺរលោង ជានិច្ច។
ជាក់ស្ដែង គឺនៅត្រង់រង្វង់ភ្នែកខ្មៅរបស់អ្នក នឹងចាប់ផ្ដើមប្រែជាសវិញ។
៣. សម្ពាធអារម្មណ៍
អ្នកក្រោមពីគេងនៅពេលព្រលឹម គឺមិនងាយប្រឈមមុខនឹងអាការៈ ដែលទាក់ទងនឹងសម្ពាធអារម្មណ៍នោះទេ។ អារម្មណ៍អ្នកនឹងមិនងាយចុះឡើង ដូចជាអ្នក ដែលតែងចូលគេងយប់ជ្រៅនោះទេ។
៤. រាងស្អាត
មិនខុសទេ បើអ្នកចង់ទទួលបានរាងស្លីមស្អាត អ្នកគួរតែចូលគេងឲ្យបានឆាប់ ហើយក្រោកឡើងឲ្យបានពីព្រលឹម ទើបអ្នកមិនងាយមានរាងធាត់ មិនស្អាត ពិបាកស្លៀកពាក់ នាំឲ្យមិនសប្បាយចិត្ត។
៥. ប្រព័ន្ធការពាររាងកាយ
សុខភាពអ្នកនឹងរឹងមាំខ្លាំង ក្រោយពេល ដែលអ្នកគេងក្នុងរយៈពេលត្រឹមត្រូវ ជាមធ្យម ៨ម៉ោង ក្នុង១យប់។ ផ្ទុយទៅវិញ បើអ្នកតែងចូលគេងយប់ជ្រៅ រាងកាយអ្នកនឹងចុះខ្សោយទៅៗ រហូតមិនអាចគ្រប់គ្រងសុខភាព ឬការញ៉ាំ ហើយមិនយូរប៉ុន្មានទេ រាងអ្នកនឹងរីកដូចជាធុងសាំងអញ្ចឹង។
៦. ការចងចាំ
ប្រសិនជាអ្នកចង់បង្កើនការចងចាំរបស់អ្នក ចង់មានអារម្មណ៍មូល និងផ្ចង់ក្នុងការបំពេញការងារ អ្នកគួរតែក្រោកពីព្រលឹម។ ក្រោយសាកល្បងហើយ សូមសង្កេតថា តើអ្នកនឹងអាចទទួលបានលទ្ធផលល្អពីការងារអ្នកល្អកម្រិតណា បើធៀបជាមួយពេលដែលអ្នកនៅគេង ទ្រមក់រហូតថ្ងៃចាំងគូថ?
៧. ទំនាក់ទំនងល្អជាមួយអ្នកដទៃ
ការក្រោកពីព្រលឹម អាចធ្វើឲ្យអ្នករក្សាទំនាក់ទំនងល្អជាមួយអ្នកដទៃ ដោយធ្វើឲ្យអ្នកមានអ្នកជួយច្រើននៅពេលដែលជួបនឹងឧបសគ្គ។ មានន័យថា អ្នកបានចាប់ផ្ដើមក្នុង១ថ្ងៃៗ ជាមួយពេលវេលាដ៏ត្រឹមត្រូវ ឧទាហរណ៍ អ្នកតែងឆាប់មកដល់កន្លែងធ្វើការពីព្រលឹម ជាហេតុធ្វើឲ្យអ្នកមានឱកាសចូលធ្វើការលឿន ឬជួយសហការី ដែលត្រូវការជំនួយ ក្នុងករណីចាំបាច់ណា១៕
