សមាជិក គ.ជ.ប បីរូបរបស់បក្សប្រឆាំង លាឈប់ពីការងារ ស្ម័គ្រចិត្តរត់តាមបក្សក្បត់ជាតិ
សមាជិក គ.ជ.ប បីរូបរបស់បក្សប្រឆាំង លាឈប់ពីការងារ ស្ម័គ្រចិត្តរត់តាមបក្សក្បត់ជាតិ
នៅថ្ងៃទី២០ ខែវិច្ឆិកា ឆ្នាំ២០១៧នេះ មានលិខិតពីមិត្តអ្នកអានមួយរូបបានផ្ញើមកកាន់អង្គភាពព័ត៌មាន ខ្មែរប៉ុស្តិ៍យើងខ្ញុំ ដោយបានហៅសមាជិកគណៈកម្មាធិការជាតិរៀបចំការបោះឆ្នោតចំនួនបីរូប ដែលបានលាឈប់ពី គជប អាចជាអ្វីមួយដែលបុគ្គលទាំងបីនេះ ចង់បញ្ជាក់ថា ពួកគាត់ស្អាតស្អំ និងស្រឡាញ់ជាតិ ស្មោះត្រង់នឹងបក្សប្រឆាំងលុះក្ស័យ តែធាតុពិតការចាកចេញពីមុខតំណែងកំពូលរបស់ស្ថាប័នឯករាជ្យមួយនេះ គឺបានបញ្ជាក់យ៉ាងច្បាស់ថា ពួកគាត់ទាំងបីរូបពិតជាបានឃុបឃិតក្នុងអំពើក្បត់ជាតិយ៉ាងពិតប្រាកដ ហើយអ្វីៗដែលពួកគាត់បានទៅជ្រកក្រោមស្លាក គជប គឺមិនបានបំរើជាតិ និងប្រជាពលរដ្ឋទេ គឺពួកគាត់ធ្វើការបំរើបក្សក្បត់ជាតិនោះតែប៉ុណ្ណោះ។
មិនមែនជាការដាក់បណ្តាសារទេ ប៉ុន្តែ ម្ចាស់លិខិតដែលបានផ្ញើមកឲ្យអង្គភាពព័ត៌មានយើងខ្ញុំឲ្យចុះផ្សាយ គឺហាក់បីដូចជាបង្ហាញនូវការហួសចិត្ត និងចង់បញ្ជាក់ថា ពួកគាត់ទាំងបីរូប គួរតែមានសតិសម្បជញ្ញៈ និងមនសិការជាតិ ហើយគួរធ្វើជាគំរូក្នុងសង្គម និងជៀសឲ្យផុតពីអំពើក្បត់ជាតិ ប៉ុន្តែផ្ទុយទៅវិញ សារជាតិក្បត់ពីកំណើតរបស់ពួកគាត់ ប្រហែលជាមិនចេះរស់នៅក្នុងសភាវល្អ និងភាពត្រឹមត្រូវ ដែលជាតម្លៃរបស់ពលរដ្ឋចេះដឹងក្នុងសង្គមទេ ដូចពាក្យចាស់ពោលថា « ស្លឹកឈើជ្រុះមិនឆ្ងាយពីគុល » គឺពួកគេ អាចជាប់ពាក់ព័ន្ធជ្រៅនឹងអំពើក្បត់ជាតិ ចូលដៃជើង នឹងទណ្ឌិត សម រង្ស៊ី និងជនក្បត់ កឹម សុខា ហើយអាចគិតថា នឹងស្រមៃថ្ងៃណាមួយបានទៅចូលរួមក្នុងសកម្មភាពនយោបាយជាមួយបក្សណា ឬក៏បង្កើតចលនាណាមួយ ដើម្បីវិលមកដណ្តើមអំណាចជាថ្មីម្តងទៀតហើយមើលទៅ បានជាសុខចិត្តលាឈប់ពីសមាជិក គជប នោះ?
ម្ចាស់លិខិតបានសរសេរទៀតថា សំណាងហើយដែលអស់លោកអ្នក ទាំងបី មាន រ៉ុង ឈុន, គួយ ប៊ុនរឿន, លោកស្រី តែ ម៉ានីរ៉ុង ដែលបានដាក់ពាក្យដើរចេញពី (គ ជ ប) ក្រោយពេលដែល គណបក្ស CNRP ត្រូវបានរំលាយចោលហើយ ប្រសិនបើលោកលាលែងមុនតុលាការកំពូលបើកសវនាការ ប្រាកដណាស់អ្នកទាំងបីនឹងត្រូវជាប់ក្នុងបញ្ជីឈ្មោះនៃការហាមឃាត់សិទ្ធិក្នុងការធ្វើសកម្មភាពនយោបាយរយៈពេល៥ឆ្នាំនឹងគេដែរហើយ។
តែទោះជាយ៉ាងណាការដើរចេញពី គជប មិនមែនជាកិត្តិយសរបស់អស់លោកនោះទេ តែវាជាការបញ្ជាក់ថា ជនទាំងបីរូបពិតជាមានចេតនាចង់បំផ្លាញស្ថាប័នជាតិតាមរយៈការលាលែងនេះ ដើម្បីចង់ឲ្យស្ថាប័ន គជប រាំងស្ទះដំណើរការប្រជុំ អនុម័តផ្សេងៗ ប៉ុន្តែសំឡេងនៃការដើរចេញនេះ មិនបានប៉ះពាល់ដល់ដំណើរការរបស់ គជប នោះឡើយ ពីព្រោះ គជប នៅមានសំឡេងភាគច្រើនដែលអាចបន្តដំណើរការការងារជាប្រក្រតីបាន។ ម៉្យាងវិញទៀត យើងក៏សូមសរសើរដល់លោក ហ៊ីង ធីរិទ្ធ ដែលជាសមាជិក គជប កូតាខាងបក្សសង្គ្រោះជាតិមួយរូបដែរ តែគាត់មានឧត្តមគតិស្រឡាញ់ជាតិពិតៗ គាត់មិនបានលាលែង និងរត់តាមបក្សក្បត់ជាតិនោះទេ។
ជាចុងក្រោយនេះ ម្ចាស់លិខិតបានសរសេរថា ៖ ចង់ប្រាប់ថា បើអស់លោកដើរចេញពី (គ ជ ប) ហើយ ក៏ឆ្កែនៅតែព្រុស មនុស្សនៅតែដើរ ប្រាក់ខែមន្ត្រីរាជការ កម្មករ កម្មការីនី នៅតែបើក ទីផ្សារនៅតែលក់ ទេសចរណ៍នៅតែហូរចូល ចំណូលនៅតែកើន រោងចក្រនៅតែបន្ត កសិករនៅតែធ្វើស្រែ ឡានក្រុងសុីក្លូនៅតែរត់ហូរហែរ តុគុយទាវផឹកតែមានគ្រប់កន្លែង។
ហើយបើទោះជាអ្នកទាំងបីនៅបន្តក្នុង (គ ជ ប) ក៏គ្មានបានសាច់ការស្អីដែរ ព្រោះធ្វើដើម្បីបក្ស CNRP តែប៉ុណ្ណោះ មិនមែនធ្វើដើម្បីជាតិទាំងមូលនោះឡើយ៕
