គណបក្សសង្រ្គោះជាតិ ចេញសេចក្តីប្រកាសទាត់ចោលរាល់ការប្រកាសជាលក្ខណៈបុគ្គល
គណបក្សសង្រ្គោះជាតិ ចេញសេចក្តីប្រកាសទាត់ចោលរាល់ការប្រកាសជាលក្ខណៈបុគ្គល
នៅរសៀលថ្ងៃទី ១៥ ខែវិច្ឆិកា ឆ្នាំ២០១៧នេះ ភ្លាមៗបន្ទាប់ពីទណ្ឌិត សម រង្ស៊ី អតីតប្រធានគណបក្សសង្រ្គោះជាតិ បានប្រកាសវិលចូលគណបក្សសង្រ្គោះជាតិវិញនោះ គណបក្សសង្រ្គោះជាតិ ក៏បានចេញសេចក្តីថ្លែងការណ៍មួយក្តៅៗភ្លាមផងដែរ ដោយទាត់ចោល និងមិនទទួលស្គាល់ការប្រកាសនេះឡើយ។
ក្នុងសេចក្តីថ្លែងការណ៍របស់គណបក្សសង្រ្គោះជាតិបានបញ្ជាក់ថា «គណបក្សសង្រ្គោះជាតិ សូមបដិសេធទាំងស្រុងនូវរាល់ សកម្មភាព ឬសេចក្តីថ្លែងការណ៍ទាំងឡាយណា ដែលគណបក្សមិនបានសម្រេច ដោយមិនមានហត្ថលេខាសង្ខេបរបស់អ្នកទទួលខុសត្រូវ និងត្រារបស់គណបក្ស»។
សេចក្តីថ្លែងការណ៍ បានបញ្ជាក់ទៀត គណបក្សមិនទទួលខុសត្រូវ ចំពោះរាល់សកម្មភាព និងសេចក្តីថ្លែងការណ៍ ដែលមានលក្ខណៈជាបុគ្គលនោះឡើយ។
ជាការកត់សម្គាល់សេចក្តីថ្លែងការណ៍របស់គណបក្សសង្រ្គោះជាតិ ធ្វើឡើងតែប៉ុន្មានម៉ោងប៉ុណ្ណោះ បន្ទាប់ពីលោក សម រង្ស៊ី បានចេញមកប្រកាសថា រូបលោកបានវិលត្រឡប់ ចូលគណបក្សសង្រ្គោះជាតិវិញ ។ លោក សម រង្ស៊ី បានបញ្ជាក់យ៉ាងដូច្នេះ «ខ្ញុំសូមប្រកាសថា ខ្ញុំ សម រង្ស៊ី ចូលជាសមាជិក គណបក្សសង្គ្រោះជាតិ វិញហើយ ចាប់ពីថ្ងៃនេះទៅ ទោះជាគេរំលាយ ឬក៏មិនរំលាយគណបក្សសង្គ្រោះជាតិ យ៉ាងណាក៏ដោយ»។
ក្រុមអ្នកវិភាគបានលើកឡើងថា សេចក្តីថ្លែងការណ៍របស់គណបក្សសង្រ្គោះជាតិ គឺជាការទះកំភ្លៀងមួយយ៉ាងដំណំ និងពេញទំហឹងតែម្តង ចំពោះអតីតប្រធានគណបក្ស ប្រឆាំងរូបនេះ ហើយក៏បានបង្ហាញពីការបែកបាក់ផ្ទៃក្នុងកាន់តែខ្លាំងនៅក្នុងគណបក្ស ដែលប្រឈមនឹងការរំលាយតាមអំណាចតុលាការកំពូលនៅថ្ងៃទី១៦ ខែវិច្ឆិកា ឆ្នាំ២០១៧ស្អែកនេះ។
ម៉្យាងវិញទៀត បើទោះជាគណបក្សសង្គ្រោះជាតិមានបំណងថា បក្សរបស់ខ្លួនមិនទទួលខុសត្រូវទៅនឹងសកម្មភាពទាំងឡាយណាដែលធ្វើសកម្មភាពជាលក្ខណៈបុគ្គល ដែលមិនមានហត្ថលេខា របស់អ្នកទទួលខុសត្រូវ ឬត្រារបស់គណបក្សយ៉ាងណាក្តី ក៏មិនអាចកាត់ផ្តាច់ការឃុបឃិតគ្នារវាងទណ្ឌិត ជាមួយគណបក្សបានឡើយ។ គេនៅចាំបានថា កាលពីពេលថ្មីៗនេះ ទណ្ឌិត សម រង្ស៊ី បានចេញមុខមកការពារគណបក្សសង្គ្រោះជាតិតាមរយៈការផ្តល់កិច្ចសម្ភាសន៍ពីទីក្រុងរ៉ូម ដោយមានការចូលរួមពីតំណាងរាស្ត្រមួយចំនួនរបស់បក្សនេះ រួមមាន លោកស្រី ជូឡុង សូម៉ូរ៉ា លោកស្រី មូរ សុខហួរ និងលោក ញ៉យ ចំរើន ដែលជាទម្ងន់ភស្តុតាងបញ្ជាក់ពីការរំលោភលើបញ្ញត្តិនៃច្បាប់ស្តីពីគណបក្សនយោបាយ ដែលចែងអំពី ការមិនអោយមានការជាប់ពាក់ព័ន្ធជាមួយទណ្ឌិត យកសារជាសំឡេង ជាលាយលក្ខណ៍អក្សរ ឬចូលរួមជាតុណ្ហីភាពជាមួយទណ្ឌិតក្តី ដើម្បីផលប្រយោជន៍នយោបាយ។
ការប្រព្រឹត្តិ ឬជាប់ពាក់ព័ន្ធដោយផ្ទាល់ ឬដោយប្រយោលជាមួយទណ្ឌិត គណបក្សនយោបាយនោះ នឹងប្រឈមមុខការប្តឹងរំលាយ ឬហាមឃាត់ការធ្វើសកម្មភាពនយោបាយរបស់ថ្នាក់ដឹកនាំដែលពាក់ព័ន្ធក្នុងរយៈពេល៥ឆ្នាំ។
