សម្តេចតេជោ ហ៊ុន សែន៖ ប្រសិនជនណាចង់មកបំផ្លាញនូវសុខសន្តិភាពនៅកម្ពុជា គឺមិនអាចទៅរួចនោះទេ
សម្តេចតេជោ ហ៊ុន សែន៖ ប្រសិនជនណាចង់មកបំផ្លាញនូវសុខសន្តិភាពនៅកម្ពុជា គឺមិនអាចទៅរួចនោះទេ
ព្រឹកថ្ងៃចន្ទ ទី០២ ខែមករា ឆ្នាំ២០២៣ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និង ឯកឧត្តម វ៉ាង វិនធៀន (H.E. Mr. Wang Wentian) ឯកអគ្គរដ្ឋទូតនៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា អញ្ជើញជាសហអធិបតីបើកការដ្ឋានសាងសង់ស្ពានឆ្លងកាត់ទន្លេមេគង្គខេត្តក្រចេះ និងផ្លូវតភ្ជាប់ក្រោមឥណទានសម្បទានពីរដ្ឋាភិបាលប្រជាមានិតចិន។
សម្តេចតេជោ ហ៊ុន សែន បានថ្លែងអំណរអគុណដល់បងប្អូនប្រជាពលរដ្ឋនៅខេត្តក្រចេះ ដែលបានបោះឆ្នោតគាំទ្រគណបក្សប្រជាជនកម្ពុជា ឱ្យឈ្នះភ្លូកទឹកភ្លូកដីនាពេលកន្លងមក ហើយសម្តេចរំពឹងថាបងប្អូននឹងបន្តគាំទ្រគណបក្សនេះជារៀង រហូតទៅផងដែរ។ ជាមួយគ្នានោះដែរ សម្តេចតេជោ ហ៊ុន សែន នាយករដ្ឋមន្រ្តីក៏បានចំអកដល់គណបក្សខ្លះ និងក្រុមខ្លះដែលចង់ប្រកួតប្រជែងជាមួយគណបក្សប្រជាជនកម្ពុជា គឺមិនអាចទៅរួចនោះឡើយ បើទោះបីជារង់ចាំទៅជាតិក្រោយទៀតក៏ប្រហែលមិនឈ្នះដែរ ខណៈគណបក្សប្រជាជនកម្ពុជាបានដឹកនាំប្រទេសជាតិឱ្យមានសុខសន្តិភាព និងការអភិវឌ្ឍរហូតមកដល់សព្វថ្ងៃនេះ ហើយទៅអនាគតក៏នឹងបន្តអភិវឌ្ឍឱ្យកាន់តែរីកចំរើនបន្ថែមទៀតផងដែរ។
នៅក្នុងឱកាសនោះដែរ សម្តេចតេជោ ហ៊ុន សែន ក៏បានលើកឡើងអំពីភាពរីកចំរើននៅប្រទេស កម្ពុជានាពេលបច្ចុប្បន្ន និងភាពសប្បាយរីករាយរបស់បងប្អូនប្រជាពលរដ្ឋខ្មែរគ្រប់រូបផងដែរ ជាក់ស្តែងក្នុងឱកាសឆ្លងឆ្នាំសកល គឺបងប្អូនប្រជាពលរដ្ឋគ្រប់រាជធានី-ខេត្តទាំងអស់បានដើរលេងសប្បាយ ដោយពុំមានភាពភ័យខ្លាចអ្វីនោះឡើយ ខណៈទិដ្ឋភាពទាំងនេះហើយគឺសបញ្ជាក់ឲ្យឃើញថា កម្ពុជាមានសុខសន្តិភាពពិតប្រាកដ ហើយប្រសិនបើជនណាឬក្រុមណាចង់មកបំផ្លិចបំផ្លាញនូវសុខសន្តិភាពនេះ គឺមិនអាចទៅរួចនោះទេ មិនថាកាលៈទេសៈណានោះឡើយ៕
