ធនាគារជាតិនៃកម្ពុជា មានផែនការបង្កើតឲ្យមានការទូទាត់ឆ្លងដែន តាមរយៈប្រព័ន្ធ KHQR

ការលើកឡើងរបស់លោកស្រី ជា សិរី ធ្វើឡើងក្នុងកម្មវិធីដាក់ឲ្យប្រើប្រាស់ប្រព័ន្ធ KHQR ជាផ្លូវការនៅថ្ងៃទី៤ ខែកក្កដា ឆ្នាំ២០២២ ។

លោកស្រី ជា សិរី បានឲ្យដឹងថា ប្រព័ន្ធ KHQR ជាប្រព័ន្ធថ្មីមួយទៀត ក្នុងប្រព័ន្ធបាគងដែលបន្ថែមភាពងាយស្រួល ដល់ការទូទាត់ជាមួយ QR Code ។

លោកស្រី ជា សិរី បានបន្ដថា «បច្ចុប្បន្នក្រឡេកទៅមើលការលក់ដូរ របស់ប្រជាពលរដ្ឋឃើញមានតាំងប្រព័ន្ធ QR Code របស់គ្រឹះស្ថានធនាគារជាច្រើន ដើម្បីផ្ដល់ជូនដល់អតិថិជនទូទាត់ តាមគ្រឹះស្ថានហិរញ្ញវត្ថុណាដែលអតិថិជនប្រើប្រាស់។ បន្ទាប់ពីឃើញផលលំបាក នៃការទូទាត់នេះ ធនាគារជាតិនៃកម្ពុជា បានបង្កើតស្ដង់ដាររួមមួយ អនុញ្ញាតឲ្យប្រព័ន្ធធនាគារអាចស្កេន QR Code របស់ធនាគារមួយទៀតបាន មានន័យថាអតិថិជនប្រើប្រាស់ធនាគារ «ក» អាចទៅស្កេន QR Code របស់ធនាគារ «ខ» បានដូចគ្នា ឲ្យតែធនាគារទាំងនោះជាសមាជិករបស់ប្រព័ន្ធ KHQR» ។

លោកស្រីបានបញ្ជាក់ថា «បន្ទាប់ពីកម្ពុជាមានស្ដង់ដាររួមថ្នាក់ជាតិបែបនេះ នៅថ្ងៃក្រោយបើចង់ធ្វើសមាហរកម្ម ក្នុងតំបន់ជាមួយប្រទេសជិតខាង គឺយើងអាចប្រើស្ដង់ដាររួមតែមួយនេះ ដោយកម្ពុជាភ្ជាប់ស្ដង់របស់ខ្លួនជាមួយស្ដង់ដារប្រទេសជាដៃគូ នោះធនាគារទូទាំងប្រទេសរបស់កម្ពុជា និងធនាគារទូទាំងប្រទេសរបស់ប្រទេសជាដៃគូ អាចប្រើប្រាស់ប្រព័ន្ធ QR Code តែមួយបានយ៉ាងងាយស្រួល ប៉ុន្ដែបើមិនមានប្រព័ន្ធ QR Code រួមនេះទេយើងត្រូវប្រើប្រាស់ QR Code របស់ធនាគារគ្រប់ប្រភេទ» ។

លោកស្រីបញ្ជាក់ថា បន្ទាប់ពីមានប្រព័ន្ធ KHQR នេះនឹងកាត់បន្ថយការប្រើប្រាស់ប្រព័ន្ធ QR Code របស់គ្រឹះស្ថានធនាគារជាច្រើន លើបញ្ជរទៀតហើយ នេះជាការសម្រួលដល់ការទូទាត់បានស្រួលជាមុន សុវត្ថិភាព និងឆាប់រហ័ស ។ បន្ទាប់ពីការដាក់ឲ្យប្រើប្រាស់ប្រព័ន្ធ KHQR សង្ឃឹមថា ការទូទាត់តាមប្រព័ន្ធ QR Code នេះកាន់តែរីកចម្រើនបន្ថែមទៀត។

សូមជម្រាបថា យោងតាមរបាយការណ៍ របស់ធនាគារជាតិនៃកម្ពុជាបានឲ្យដឹងថា មានគ្រឹះស្ថានធនាគារ និងហិរញ្ញវត្ថុចំនួន៣៧ ជាសមាជិកបាគង បានចូលរួមអភិវឌ្ឍមុខងារ KHQR ក្នុងនោះគ្រឹះស្ថានធនាគារ និងហិរញ្ញវត្ថុចំនួន២៩ បានបំពេញមុខងារ ដោយជោគជ័យជាមួយ KHOR និងបានដាក់ឱ្យប្រើប្រាស់ និងទូទាត់ទំនិញជាមួយនឹងដៃគូពាណិជ្ជករនៅទូទាំងប្រទេស ៕