មកមើលសណ្ឋាគារជ្រូក ៧ ជាន់យ៉ាងទំនើប (មានវីដេអូ)

ដោយ៖ សន ប្រាថ្នា | ថ្ងៃសុក្រ ទី១៨ ខែឧសភា ឆ្នាំ២០១៨ កំសាន្ដ & ប្លែកៗ 47

កសិដ្ឋានកម្ពស់ ៧ជាន់ដ៏ទំនើបពីរត្រូវបានគេសាងសង់ឡើងនៅលើភ្នំ Yaji ភាគខាងត្បូងនៃប្រទេសចិន ដែលនៅក្នុងកសិដ្ឋានមានគេចិញ្ចឹមជ្រូករាប់ពាន់ក្បាលក្នុងមួយជាន់ៗ ហើយកសិដ្ឋាននេះត្រូវបានគេដាក់ឈ្មោះថា «សណ្ឋាគារជ្រូក»។

កសិដ្ឋានចិញ្ចឹមជ្រូកនេះគឺគ្រប់គ្រងដោយក្រុមហ៊ុនកសិកម្ម Guangxi Yangxiang Co Ltd ដែលមានអគារកម្ពស់ ៧ជាន់ដល់ទៅពីរអគារឯណោះ ហើយគេក៏កំពុងសាងសង់ ៤ជាន់បន្ថែមទៀតសម្រាប់អគារទាំងនោះផងដែរ ដែលនឹងនាំឲ្យវាក្លាយជាកសិដ្ឋានចិញ្ចឹមជ្រូកដែលមានកម្ពស់ខ្ពស់ជាងគេក្នុងលោក។
កសិដ្ឋាន
ការចិញ្ចឹមជ្រូកដោយប្រើអគារច្រើនជាន់បែបនេះ ក៏ធ្លាប់ត្រូវបានគេធ្វើឡើងក្នុងចំនួនច្រើននៅក្នុងទ្វីបអឺរ៉ុបផងដែរ ក៏ប៉ុន្តែសាធារណៈជននៅទីនោះបានបដិសេធប្រឆាំងយ៉ាងខ្លាំង ទៅលើការចិញ្ចឹមសត្វក្នុងចំនួនច្រើនដោយគេគិតថា ការចិញ្ចឹមសត្វបែបនេះដូចជាអមនុស្សធម៌ពេក។
កសិដ្ឋាន
ចិនដែលជាប្រទេសដែលចិញ្ចឹមជ្រូកច្រើនជាងគេក្នុងលោក ក៏កំពុងធ្វើឧស្សាហូបនីយកម្មទៅលើរបៀបចិញ្ចឹមជ្រូករបស់គេផងដែរ ដោយវាគឺស្ថិតក្នុងគម្រោង ៣០ឆ្នាំរបស់គេក្នុងការធ្វើទំនើបកម្មចំពោះវិស័យកសិកម្មរបស់គេ និងជួយផ្ដល់សម្រួលជីវភាពសម្រាប់ប្រជាជនក្នុងតំបន់ដាច់ស្រយាល។ ដូចនេះហើយបានជាក្រុមហ៊ុនចិនជាច្រើនកំពុងធ្វើការពិសោធន៍ទៅលើរបៀបចិញ្ចឹមផ្សេងៗ ដោយគេមិនផ្ដោតសំខាន់ពីការចំណាយនោះទេ។ ហើយសណ្ឋាគារជ្រូកនេះ គឺជាភស្តុតាងបង្ហាញថាចិននឹងធ្វើគ្រប់យ៉ាងដើម្បីកែប្រែ វិធីធ្វើកសិកម្មរបស់គេឲ្យបានល្អ។
កសិដ្ឋាន
លោក Xu Jiajing ដែលជាអ្នកគ្រប់គ្រងកសិដ្ឋានលើភ្នំរបស់ក្រុមហ៊ុន Yangxiang នេះបាននិយាយថា «ការចិញ្ចឹមជ្រូកក្នុងអគារខ្ពស់ៗបែបនេះមានអត្ថប្រយោជន៍របស់វា អាចជួយសន្សំថាមពលនិងធនធានដែលយើងប្រើ ហើយវាក៏បានជួយសន្សំផ្ទៃដីដែលយើងត្រូវការផងដែរ»។
កសិដ្ឋាន
ក្រុមហ៊ុននេះបានចំណាយច្រើនជាងកសិដ្ឋានធម្មតាដល់ទៅ ៣០%ឯណោះ បើទោះបីជាតម្លៃជ្រូកនៅក្នុងប្រទេសចិនកាន់តែធ្លាក់ចុះទៅៗអស់រយៈពេល ៨ឆ្នាំមកហើយក៏ដោយ។ ទោះជាយ៉ាងណាក៏ដោយ តម្លៃជ្រូកលើទីផ្សារមិនមែនជាបញ្ហាប្រឈមតែមួយដែលអាចកើតឡើងនោះទេ។ ការចិញ្ចឹមជ្រូកច្រើនក្នុងផ្ទៃដីតូចមួយបែបនេះ ក៏អាចឲ្យមានជំងឺរាតត្បាតឆាប់រហ័សផងដែរ។
កសិដ្ឋាន
អ្នកជំនាញខ្លះបានផ្ដល់ការយល់ឃើញទៅលើកសិដ្ឋានកម្ពស់ ៧ជាន់នេះថា ការធ្វើបែបនេះវាអាចសន្សំផ្ទៃដីបានបន្តិចមែន ក៏ប៉ុន្តែភាពស្មុគស្មាញក្នុងការសាងសង់សំណង់នេះ រួមមានបំពង់ដាក់ចំណី និងទឹកផងអាចនឹងត្រូវទាមទារឲ្យគេចំណាយប្រាក់ច្រើនដដែល៕