អគារទីស្ដីការថ្មីរបស់ក្រសួងសាធារណការ និងដឹកជញ្ជូន គ្រោងនឹងសម្ពោធដាក់ឱ្យ ប្រើប្រាស់ជាផ្លូវការនៅខែមករា ឆ្នាំ២០២១ ខាងមុខ
អគារទីស្ដីការថ្មីរបស់ក្រសួងសាធារណការ និងដឹកជញ្ជូន គ្រោងនឹងសម្ពោធដាក់ឱ្យ ប្រើប្រាស់ជាផ្លូវការនៅខែមករា ឆ្នាំ២០២១ ខាងមុខ
អគារទីស្ដីការថ្មីរបស់ក្រសួងសាធារណការ និងដឹកជញ្ជូន គ្រោងនឹងសម្ពោធដាក់ឱ្យ ប្រើប្រាស់ជាផ្លូវការនៅខែមករា ឆ្នាំ២០២១ ខាងមុខ
នៅថ្ងៃពុធ ទី២៣ ខែធ្នូ ឆ្នាំ២០២០ នៅទីស្ដីការក្រសួងសាធារណការ និងដឹកជញ្ជូន ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំថ្នាក់ដឹកនាំក្រសួងប្រចាំសប្ដាហ៍តាមរយៈប្រព័ន្ធវីដេអូពីចម្ងាយ ដោយកិច្ចប្រជុំនោះផ្ដោតជាសំខាន់លើការត្រៀមរៀបចំ ផ្លាស់ប្ដូរទៅទីស្ដីការក្រសួងថ្មី និងការស្វែងរកដំណោះស្រាយបញ្ហាមួយចំនួនដែលថ្នាក់ដឹកនាំបានជួបប្រទះអំឡុងពេលអនុវត្តការងាររបស់ខ្លួន និងមិនទាន់អាចដោះស្រាយបាន សំដៅសម្រួលការងារឱ្យមានភាពសាមញ្ញ និងកាន់តែរីកចម្រើនទៅមុខ។
នៅក្នុងឱកាសនោះ ឯកឧត្ដមទេសរដ្ឋមន្ត្រីបានមានប្រសាសន៍ថា ក្រសួងនឹងប្ដូរទៅអគារទីស្ដីការក្រសួងថ្មីនៅថ្ងៃទី០៤ ខែមករា ឆ្នាំ២០២១ខាងមុខ តាមសេចក្ដីជូនដំណឹងរបស់ក្រសួងសាធារណការ និងដឹកជញ្ជូន លេខ០៥៤ សក.រប.សជណ ចុះថ្ងៃទី១៨ ខែធ្នូ ឆ្នាំ២០២០ ហើយការផ្លាស់ប្ដូរទីស្ដីការក្រសួងទៅកាន់ទីតាំងថ្មីនេះ ធ្វើឡើងក្នុងគោលបំណងដើម្បីប្រមូលផ្ដុំអង្គភាពក្រោមឱវាទក្រសួងទាំងអស់ឱ្យស្ថិតនៅទីតាំងតែមួយ ដែលមានទីធ្លាធំទូលាយ ឆ្លើយតបទៅតាមទំហំការងារនាពេលបច្ចុប្បន្ន ឆ្លុះបញ្ចាំងចក្ខុវិស័យនាពេលអនាគត ជាពិសេសទីតាំងថ្មីនេះជួយសម្រួលដល់លំហូរការងារប្រចាំថ្ងៃរបស់មន្ត្រីគ្រប់ជាន់ថ្នាក់បានកាន់តែល្អប្រសើរ និងផ្ដល់ភាពងាយស្រួលដល់បងប្អូនប្រជាពលរដ្ឋដែលស្វែងរកសេវាសាធារណៈចាំបាច់នៅក្រសួងសាធារណការ និងដឹកជញ្ជូន។
ទន្ទឹមនឹងនេះ ឯកឧត្ដមទេសរដ្ឋមន្ត្រី បានថ្លែងអំណរគុណ និងកោតសរសើរចំពោះថ្នាក់ដឹកនាំ និងមន្ត្រីក្រោមឱវាទក្រសួង ដែលបានខិតខំប្រឹងប្រែងបំពេញការងាររបស់ខ្លួនប្រកបដោយឆន្ទៈនិងមនសិការវិជ្ជាជីវៈខ្ពស់ ក្នុងបុព្វហេតុបម្រើឧត្ដមប្រយោជន៍ជាតិ និងបានថ្លែងអំណរគុណដល់ក្រុមការងារទទួលបន្ទុកការងារសាងសង់អគារទីស្ដីការក្រសួងថ្មីនេះបានចប់សព្វគ្រប់តាមពេលវេលាដែលបានកំណត់។
ជាមួយគ្នានេះដែរ ឯកឧត្តមទេសរដ្ឋមន្ត្រីបានមានប្រសាសន៍ផ្ដាំផ្ញើឱ្យមន្ត្រីទាំងអស់ខិតខំប្រឹងប្រែងបំពេញការងារបន្ថែមទៀត ជាពិសេសត្រូវយកចិត្តទុកដាក់ថែរក្សាអគារថ្មីនេះ និងគ្រឿងចក្រនានាឱ្យបានល្អបំផុត ដើម្បីប្រើប្រាស់បានយូរអង្វែង។
សូមបញ្ជាក់ថា អគារទីស្ដីការក្រសួងថ្មីនេះ មានទីតាំងស្ថិតនៅផ្លូវលេខ៥៩៨ (ផ្លូវឯកឧត្ដម ជា សុផារ៉ា) សង្កាត់ច្រាំងចំរេះ២ ខណ្ឌឬស្សីកែវ រាជធានីភ្នំពេញ គ្រោងនឹងសម្ពោធដាក់ឱ្យប្រើប្រាស់ជាផ្លូវការនៅដើមខែមករា ឆ្នាំ២០២១ ក្រោមអធិបតីភាពដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕
