លោកនាយករដ្ឋមន្ត្រី ហ៊ុន សែន លើកឡើងពីហេតុផល ៥យ៉ាង ដែលមិនទាន់អាចបញ្ចប់ព្រឹត្តិការណ៍ សហគមន៍២៨វិច្ឆិកា
លោកនាយករដ្ឋមន្ត្រី ហ៊ុន សែន លើកឡើងពីហេតុផល ៥យ៉ាង ដែលមិនទាន់អាចបញ្ចប់ព្រឹត្តិការណ៍ សហគមន៍២៨វិច្ឆិកា
នៅក្នុងការថ្លែងសារ ជូនជនរួមជាតិពាក់ព័ន្ធនឹងស្ថានភាពជំងឺកូវីដ១៩ និងការទិញវ៉ាក់សាំងជំងឺកូវីដ១៩ នៅព្រឹកថ្ងៃទី ១៥ ខែធ្នូ ឆ្នាំ២០២០ម្សិលមិញនេះ លោកនាយករដ្ឋមន្ត្រី ហ៊ុន សែន បានបញ្ជាក់ថា ព្រឹត្តិការណ៍សហគមន៍២៨វិច្ឆិកា គ្រប់គ្រងបានហើយ តែមិនទាន់បញ្ចប់នោះ។
លោកនាយករដ្ឋមន្ត្រី បានបញ្ជាក់បន្ថែមថា ការដែលមិនទាន់បញ្ចប់នូវព្រឹត្តិការណ៍នេះ មានហេតុផល ៥យ៉ាងដូចខាងក្រោម៖
១. មិនទាន់ដឹងអស់នៅឡើយទេថា តើមានកន្លែងណាខ្លះទៀតដែលអ្នកជំងឺកូវីដ-១៩បានទៅដល់ រកមិនទាន់ឃើញ អ្នកជំងឺមិនប្រាប់ ឬភ្លេចកន្លែងទៅដល់រយៈពេល១៤ថ្ងៃមុនពេលរកឃើញ
២. តើនៅមានអ្នកប៉ះពាល់ផ្ទាល់ ឬប្រយោល ដែលមិនហ៊ានមកបង្ហាញមុខ ព្រោះខ្លាចការធ្វើតេស្ត និងមិនបានធ្វើចត្តាឡីស័ក១៤ថ្ងៃ ដែលជាហានិភ័យឆ្លងចូលសហគមន៍
៣. អ្នកប៉ះពាល់មួយចំនួនមិនទាន់ដល់ថ្ងៃធ្វើតេស្តលើកទី២ ឬទី៣នៅឡើយ ព្រោះទើបដឹងថាបានប៉ះពាល់ជាមួយអ្នកវិជ្ជមានកូវីដ-១៩ ហើយទើបធ្វើតេស្តបានមួយដង ឬពីរដងប៉ុណ្ណោះ
៤. អ្នកត្រូវធ្វើចត្តាឡីស័កជាបន្តបន្ទាប់តាំងពីថ្ងៃទី២៩ វិច្ឆិកា ដល់ថ្ងៃរកឃើញអ្នកវិជ្ជមានចុងក្រោយនៅថ្ងៃទី១៤ ធ្នូ មិនដឹងថាបានធ្វើចត្តាឡីស័ក ១៤ថ្ងៃ ឬបានធ្វើតេស្តចំនួន៣ដងដែរឬទេ?
៥. នៅតាមខេត្តមួយចំនួនដែលអ្នកជំងឺកូវីដ១៩ ទៅដល់មុនពេលរកឃើញវិជ្ជមានកូវីដ១៩ តើបានរកឃើញអ្នកពាក់ព័ន្ធអស់ឬទេ?
ជាមួយគ្នានោះ លោកនាយករដ្ឋមន្រ្តី ហ៊ុន សែន ក៏បានសូមការយោគយល់ពីព្រះសង្ឃ និងប្រជាពលរដ្ឋ ក្នុងការរក្សាស្ថានភាពដូចពេលបច្ចុប្បន្នមួយរយៈទៀត ដើម្បីឱ្យប្រាកដថា ព្រឹត្តិការណ៍សហគមន៍២៨វិច្ឆិកា បានបិទបញ្ចប់៕
