អង់គ្លេសផ្តើមជីវិតថ្មី ក្រោយចេញពីសហភាពអឺរ៉ុប
អង់គ្លេសផ្តើមជីវិតថ្មី ក្រោយចេញពីសហភាពអឺរ៉ុប
ចាប់ពីថ្ងៃសៅរ៍ទី ១ កុម្ភៈនេះទៅ អង់គ្លេស មានជីវិតថ្មី ដែលមិនមែនជាសមាជិកសហភាពអឺរ៉ុប។ អង់គ្លេស ត្រូវផ្តើមស្ថាបនាប្រទេស ដោយត្រូវស្វែងរកទំនាក់ទំនងថ្មីជាមួយអឺរ៉ុបផង និងដោយត្រូវស្វែងរកតួនាទីថ្មីនៅលើឆាកអន្តរជាតិផង។ យ៉ាងណាក៏ដោយ ក៏នៅយប់មិញ ពលរដ្ឋអង់គ្លេសអ្នកគាំទ្រ Brexit បានសម្តែងការអបអរសាទរយ៉ាងខ្លាំង ដំណើរចាកចេញពីអឺរ៉ុបជាផ្លូវការ។
នាយករដ្ឋមន្ត្រីអង់គ្លេស លោក បូរីស ចនសុន ដែលបានក្លាយជាបុរសខ្លាំងនាំអង់គ្លេសឱ្យដើរចេញពីអឺរ៉ុបបានសម្រេច មិនចង់ប្រារព្វពិធីBrexit ដោយហ៊ឹកហ៊ាក់ពេកទេ។ លោកបានជ្រើសរើសភាពស្ងប់ស្ងាត់ ស្ថិតនៅជាឯកជនក្នុងការិយាល័យនាយករដ្ឋមន្ត្រី និងបានថ្លែងសុន្ទរកថាដ៏ខ្លី ទៅកាន់ប្រជាជាតិនៅវេលាម៉ោង ១០យប់ ទទួលស្គាល់ថា មានពលរដ្ឋអង់គ្លេសមួយភាគធំរីករាយ ដែលបានចាកចេញពីអឺរ៉ុប ប៉ុន្តែក៏មានពលរដ្ឋមួយចំនួនធំផ្សេង កំពុងកើតទុក្ខ និងមួយក្រុមទៀត កំពុងចាប់ផ្តើមព្រួយបារម្ភខ្លាចការតស៊ូនយោបាយដើម្បីBrexitមិនចប់។
លោកនាយករដ្ឋមន្ត្រីបានសន្យា ថ្ងៃនេះជាការចាប់ផ្តើមថ្មីរបស់អង់គ្លេស ដូច្នេះ លោកនឹងប្រឹងធ្វើគ្រប់យ៉ាងដើម្បីបំពេញបំណងពលរដ្ឋដែលចង់បានការប្តូរផ្លាស់។ លោកចនសុន បានអះអាងជាថ្មីថា Brexit គឺជាការចាប់ផ្តើមសករាជថ្មីនៃកិច្ចសហប្រតិបត្តិការមិត្តភាពជាមួយអឺរ៉ុប។ Brexit ជាជោគជ័យដ៏រន្ទឺរបស់អង់គ្លេស បើទោះបីជាមានឧបសគ្គយ៉ាងច្រើនយ៉ាងណាក៏ដោយ។ នេះបើតាមការព្យាកររបស់លោកចនសុន។
ចំណែកខាងប្រជាពលរដ្ឋវិញ កន្លះវិនាទី មុនម៉ោង ១១យប់ ម៉ោងនៅអង់គ្លេស (ត្រូវជាម៉ោងសូន្យ ម៉ោងនៅក្រុងព្រុចសែល រដ្ឋធានីរបស់សហភាពអឺរ៉ុប) ហ្វូងមនុស្សបានកកកុញគ្នា នៅមុខសភាអង់គ្លេស នាទីក្រុងឡុងដ៍ ដើម្បីរាប់លេខថយ។ គម្រប់ម៉ោងសូន្យឆ្លងចូលថ្ងៃទី១កុម្ភៈភ្លាម ពួកគេបាននាំគ្នាស្រវាអោបគ្នា និងស្រែកច្រៀងជូនពរជ័យគ្នា ជាតំណាងនៃការក្រេបរសជាតិសេរីភាពថ្មី។
ប៉ុន្តែនៅភាគខាងជើងប្រទេសវិញ ជាពិសេសនៅអេកូស ពលរដ្ឋនាំគ្នាអុជទៀន កាន់ទុក្ខ ខ្លះបង្ហូរទឹកភ្នែក ខ្លះបញ្ចេញកំហឹង ចំពោះការបែកព្រាត់ពីសហភាពអឺរ៉ុប។ ថ្ងៃ៣១មករា២០២០ ជាព្រឹត្តិការណ៍ប្រវត្តិសាស្ត្រមែន ព្រោះអង់គ្លេសត្រូវបើកទំព័រថ្មី តែមិនមែនជាការបិទបញ្ចប់ភាពប្រេះឆាផ្ទៃក្នុងឡើយ។ នៅវេលាម៉ោងសូន្យ ហ្វូងមនុស្សបាននាំគ្នាស្រែកថា គ្រាន់តែជាការលាមួយរយៈ។ អេកូសនៅតែ រក្សាទង់ជាតិអឺរ៉ុបនៅមុខសភាដដែល៕
RFI
