លិខិតមិត្តអ្នកអាន៖ អ្នកណាចាក់ថា សម រង្ស៊ី ចូលស្រុកវិញ នឹងចាញ់អស់គូទខោមិនខាន!
លិខិតមិត្តអ្នកអាន៖ អ្នកណាចាក់ថា សម រង្ស៊ី ចូលស្រុកវិញ នឹងចាញ់អស់គូទខោមិនខាន!
មនុស្សធ្លាប់បោកគឺនៅតែបោក! សណ្តានមនុស្សភូត គឺនៅតែភូត! សូមកុំជឿឱ្យសោះប្រភេទមនុស្សក្រឡិចក្រឡុច ភូតច្រើន ជំនាញតែខាងបោកប្រាស់ មិនចោលចរិត និងសារជាតិរបស់ខ្លួននោះទេ។ សម រង្ស៊ី ជាមនុស្សដែលញៀននឹងការបោកប្រាស់ ភូតភរសកម្មជន និងអ្នកគាំទ្រតាំងតែពីដើមរហូតមក គាត់គ្មានថ្ងៃនឹងចោលចរិតដើមរបស់គាត់ឡើយ។ សំខាន់អាណិតតែអ្នកជឿទេ មិនដឹងជាត្រូវខកចិត្ត និងចាញ់អស់គូទខោប៉ុន្មានលើក ប៉ុន្មានសារទៀតទេព្រះអើយ? ពីមុនថា ថ្ងៃនេះ-ខែនេះ នឹងត្រឡប់មកកម្ពុជាវិញ។ ក្រោយមកថា ការប្រកាសរបស់ខ្លួន គឺគ្រាន់តែដើម្បីបង្អើលលោក ហ៊ុន សែន តែប៉ុណ្ណោះ ហើយថា ខ្លួននឹងមិនប្រាប់ថ្ងៃមកពិតប្រាកដនោះទេ ដើម្បីទុកឱ្យលោក ហ៊ុន សែន ចលាចល។ ប៉ុន្តែពេលនេះ បែរជាបោកថានៅថ្ងៃទី៩ ខែវិច្ឆិកា ឆ្នាំ២០១៩ ខាងមុខនេះ ខ្លួននិងគូកន នឹងត្រឡប់មកវិញ ដើម្បីផ្លាស់ប្តូរការដឹកនាំនៅកម្ពុជា។ ជឿទៅ! បើជឿហើយហ៊ានចាក់លុយភ្នាល់ទៀត គឺរឹតតែឆាប់រលាយ ព្រោះលទ្ធផលប្រាកដជាចាញ់ អស់គូទខោមិនខាន។
សារជាតិរបស់ សម រង្ស៊ី គឺតែងតែធ្វើនយោបាយលើខ្នងអ្នកគាំទ្រ ប្រមូលតែលុយ និងប្រជាប្រិយភាព ដោយមិនដែលចេះរអៀសខ្លួន ឬអាម៉ាស់នូវរាល់ទង្វើ ដែលគ្មានទំនួលខុសត្រូវរបស់ខ្លួនម្តងណាឡើយ។ គេនៅចាំបានថា ក្នុងទសវត្សរ៍ឆ្នាំ២០០០ សម រង្ស៊ី នេះហើយ ដែលជាមេបំបះបំបោរ ញុះញង់ និងអុចអាល ឱ្យកម្មករ-កម្មការិនីរោងចក្រធ្វើបាតុកម្មប៉ាតណាប៉ាតណីក្រោមលេសទាមទារតម្លើងប្រាក់ខែ និងលេសផ្សេងៗ។ ជាលទ្ធផលរោងចក្រមួយចំនួន បានប្រឈមនឹងការខាតបង់ និងបិទទ្វារ។ កម្មករខ្លះ ត្រូវបានបញ្ឈប់ពីការងារ ហើយអ្នកជ្រុលខ្លួនផ្កាប់មុខ ជឿតាមការបញ្ឆេះរបស់ សម រង្ស៊ី ក៏អត់ការងារធ្វើ ជីវភាពធ្លាក់ទៅជាដុនដាប ប៉ុន្តែ សម រង្ស៊ី វិញ គឺរត់ទៅបរទេស សំងំសោយសុខយ៉ាងរំភើយ គ្មានខ្វល់ពីអ្នកណាទាំងអស់។ ដល់ពេលដែលសភាពការណ៍ក្នុងស្រុកស្ងប់ស្ងាត់បន្តិច សម រង្ស៊ី ក៏វិលមកកកូរកកាយ ចាក់រុក ឆ្កឹះឆ្កៀល កម្មករ-កម្មការិនីឱ្យក្រោបឡើងបះបោរប្រឆាំងនឹងរដ្ឋាភិបាលទៀត។ ក្រៅតែពីញុះញង់ ប្រមូលមនុស្សធ្វើបាតុកម្មលន់តួចៅហ្វាយនាយបរទេសឱ្យដាក់សម្ពាធលើកម្ពុជា សុំឱ្យបរទេសផ្តាច់ជំនួយ និងកុំឱ្យបរទេសមកវិនិយោគនៅកម្ពុជា។ សម រង្ស៊ី មិនដែលធ្វើអ្វីបម្រើដល់ផលប្រយោជន៍ជាតិនិងប្រជាជនឡើយ។ សកម្មភាពដ៏លេចធ្លោរ និងជំនាញមួយទៀត របស់ សម រង្ស៊ី គឺភូតភរ កុហក បោកប្រាស់ បង្កើតប្រធានបទថ្មីៗ ដើម្បីប្រមូលលុយពីអ្នកគាំទ្រ ទាំងក្នុង និងក្រៅប្រទេស សម រង្ស៊ី គឺគាត់មានជំនាញខ្ពស់តែម្តង។ រាល់សកម្មភាពរបស់ សម រង្ស៊ី កន្លងមក ធ្វើឱ្យយើងមើលឃើញយ៉ាងច្បាស់ថា ជននេះហ៊ានធ្វើអ្វីៗសព្វគ្រប់បែបយ៉ាង ដើម្បីតែមហិច្ឆតាដណ្តើមអំណាចរបស់ខ្លួនតែប៉ុណ្ណោះ។
ដោយសារតែធ្លាប់ភូតភរ កុហក បោកប្រាស់ដដែលៗ ច្រំដែលៗ ច្រើនលើកច្រើនសារបែបនេះហើយ បានជាអ្នកតាមដាននយោបាយនៅកម្ពុជា និងអ្នកវិភាគនយោបាយ ព្រមទាំងសាធារណៈមតិជាទូទៅ បានវាយតម្លៃថា ការប្រកាសរបស់ សម រង្ស៊ី នៅពេលថ្មីៗនេះ ថាខ្លួននឹងវិលត្រឡប់មកកម្ពុជាវិញនៅថ្ងៃទី៩វិច្ឆិកា គឺជាការបោកប្រាស់សុទ្ធសាធ។ លោក ខាន់ សុវណ្ណ អ្នកលេងបណ្តាញសង្គម Facebook និងជាក្រុមសមាជិកអង្គព្រោកប្រាជ្ញ គ្រាន់តែបានលឺថា សម រង្ស៊ី ហ៊ានដាក់កាលបរិច្ឆេទច្បាស់លាស់ វិលចូលស្រុកវិញនោះ លោកបានប្រកាសភ្លាមៗ បបួល សម រង្ស៊ី ភ្នាល់គ្នាតែម្តង។ លោក ខាន់ សុវណ្ណ ហ៊ានចំណាយលុយថ្លៃភ្នាល់រហូតដល់១លានដុល្លារអាមេរិក ហើយបើ សម រង្ស៊ី ពិតជាហ៊ានមកវិញមែន លោកសុខចិត្ត យកលុយទៅប្រគល់ឱ្យដល់គុកតែម្តង។ អ្នកគាំទ្រលោក សម រង្ស៊ី ក៏អាចភ្នាល់ជាមួយលោក ខាន់ សុវណ្ណ បានដែរ បើខ្លួនជឿថា លោកប្រធានពិតជាហ៊ានត្រឡប់មកវិញមែននោះ។ ប៉ុន្តែយកល្អ ក្រុមអ្នកផ្កាប់មុខ និងសកម្មជនជើងក្រោមដែលនៅសេសសល់តិចតួចរបស់អតីតបក្សប្រឆាំង គួរកុំទាន់អាលជឿលឿនពេកអីវាល្អជាង ព្រោះថាមិនបាន អាចត្រូវចាញ់ការភ្នាល់បោសគូទខោក៏ថាបាន។ បើចង់ចាក់ថា សម រង្ស៊ី ហ៊ានមកវិញឬអត់ គួរតែបង្អង់ពេលគិតបន្តិចសិន ឬក៏ចាំមើលភាពប្រែប្រួលមិនទៀងទាត់របស់លោកប្រធាន សម រង្ស៊ី សិន ប្រសើរជាងចាញ់លុយភ្នាល់ ហើយខ្មាស់គេទៀត។ ចំណែកលោក ខាន់ សុវណ្ណ វិញ គឺបានបញ្ជាក់ជំហរច្បាស់ហើយថាលោកហ៊ានលេង និងហ៊ានភ្នាល់ ដោយមិនស្តាយលុយទេ តែសំខាន់ចង់ដឹងថា សម រង្ស៊ី ហ៊ានបោះបង់ចោលភាពកំសាករបស់ខ្លួន ចូលមកយកលុយ ១លានដុល្លារ ក្នុងគុកឬអត់? ព្រោះថា បើមកវិញមែន គឺមិនមែនជាប់គុក១ខែ-២ខែទេ គឺជាប់រហូតដល់ថ្ងៃស្លាប់ក្នុងគុកតែម្តង។ ដូច្នេះសម្រាប់លោក ខាន់ សុវណ្ណ លុយ១លានដុល្លារ ដូរនឹងសេរីភាព នៃជីវិតចុងក្រោយរបស់ សម រង្ស៊ី គឺលោកមិនស្តាយនោះទេ។
បើយើងវិភាគទៅលើស្ថានភាពបច្ចុប្បន្នរបស់ សម រង្ស៊ី វិញ គឺមានភាគរយតិចណាស់ ដែល សម រង្ស៊ី ហ៊ានប្តូរលេងល្បែងដ៏គ្រោះថ្នាក់មួយនេះ។ ខាងក្រោមនេះ គឺជាមូលហេតុដ៏ជាក់ស្តែងបង្ហាញថា សម រង្ស៊ី ចាតែថេះ (ចេះតែថា) ឱ្យតែរួចពីមាត់៖
១/តាមធម្មតាមនុស្ស សម រង្ស៊ី នេះ គឺជាមនុស្សកំសាកញី សូម្បីតែអ្នកគាំទ្រអតីតបក្សប្រឆាំង ក៏ធ្លាប់រិះគន់ថា សម រង្ស៊ី មិនបានមួយចំណិត កឹម សុខា ផង។ កឹម សុខា សុខចិត្តក្រាញននៀលនៅជាមួយអ្នកគាំទ្រ ក្នុងកាលៈទេសៈដែលលំបាកៗ ប៉ុន្តែ សម រង្ស៊ី វិញ គឺថា បិទសាប៊ូគូទ ដាក់មេប្រ៉ូចជានិច្ច។
២/គម្រោងវិលត្រឡប់មកវិញនេះ បើ សម រង្ស៊ី សង្ឃឹមលើចៅហ្វាយនាយបរទេសវិញនោះ គឺរឹតតែលំបាក ព្រោះពួកគេរំលឹកតែឈ្មោះ កឹម សុខា ប៉ុណ្ណោះ មិនដែលលើកឡើងពីឈ្មោះ សម រង្ស៊ី នោះទេ។ ដូច្នេះរឿងអីដែល សម រង្ស៊ី ត្រូវសុខចិត្ត មកចោលឆ្អឹងក្នុងគុកនោះ វាមិនអាចទៅរួចទេ។
៣/បើយើងវិភាគទៅលើបុគ្គលិកលក្ខណៈរបស់ សម រង្ស៊ី វិញ គឺបុគ្គលរូបនេះ ធ្លាប់តែរស់នៅសោយសុខនៅក្រៅស្រុកច្រើនជាងក្នុងស្រុក។ គ្រួសារ សម រង្ស៊ី ធ្លាប់តែរស់នៅក្នុងស្ថានភាពសុខស្រួល និងហ៊ឺហារគ្មានប្រវត្ថិជាអ្នកតស៊ូ ចូលព្រៃ ឬរស់ក្នុងស្ថានភាពលំបាកវេទនាម្តងណាឡើយ។ ដូច្នេះគាត់ប្រាកដជាមិនអាចប្រថុយ មករងទុក្ខក្នុងគុកនោះទេ។
៤/មួយវិញទៀត ឆ្នាំនេះ សម រង្ស៊ី មានវ័យកាន់តែចាស់ហើយ អាយុចូល៧១ឆ្នាំហើយ បើហ៊ានប្រថុយមកចូលគុកវិញ ប្រាកដជាត្រូវចាស់ទ្រុឌទ្រោមក្នុងគុក ហើយប្រពន្ធ និងក្រុមគ្រួសាររបស់គាត់ ដាច់ខាតប្រាកដជាមិនព្រមឱ្យមកនៅក្នុងគុកនោះទេ។ តាមដឹង សម រង្ស៊ី ក៏មានជំងឺប្រចាំកាយដែរ ប្រពន្ធគាត់ ប្រាកដជាមិនដាច់ចិត្ត ឃើញប្តីត្រូវលំបាកក្នុងគុកនោះទេ។
៥/មួយទៀតបើសង្ឃឹមថា ចង់ចូលគុកដើម្បីកសាងប្រជាប្រិយភាព បន្ទាប់ពីចេញពីគុកវិញ ដូចអ្នកនយោបាយនៅស្រុកគេមួយចំនួននោះ ក៏រឹតតែមិនអាចទៀត ព្រោះអាយុរបស់ សម រង្ស៊ី គឺឆ្លងហួសខ្សែបន្ទាត់ នៃការតស៊ូបែបសាច់កម្មនេះទៅហើយ។ អ្នកនយោបាយមួយចំនួននៅស្រុកគេ គឺគេជាប់គុករយៈពេល១០-២០ឆ្នាំ ចេញទៅវិញ អាយុត្រឹម ៤០-៥០ឆ្នាំ។ ឬឯ សម រង្ស៊ី វិញ បើជាប់គុកអាយុ៧០ឆ្នាំ ហើយបើមានសំណាង បានចេញពីគុកវិញបន្ទាប់ពី១០-២០ឆ្នាំនោះ គឺអាយុឡើងដល់ ៨០-៩០ឆ្នាំហើយ។ អាយុនេះឈានចូលដល់វ័យចាស់ជរាហើយ មានអីឱ្យសង្ឃឹមទៀត។
ដូច្នេះសរុបមកវិញ៖
១-ការប្រកាសពីការវិលត្រឡប់របស់ សម រង្ស៊ី នៅថ្ងៃទី៩វិច្ឆិកា គឺគ្រាន់តែជារឿងប្រឌិត ភូតភរ បោកប្រាស់ ដើម្បីស្ទង់ចំណាប់អារម្មណ៍អ្នកគាំទ្រតែប៉ុណ្ណោះ។
២-ហេតុផលមួយទៀត សម រង្ស៊ី មិនចោលក្បួនទេ ក្នុងការដើរបោកគ្រប់ទីកន្លែង ដើម្បីម្រូលលុយពីអ្នកជឿនោះ។ ការប្រកាសថ្ងៃមកវិញ មានន័យថា គាត់មានមានរបៀបវារៈ និងមានលេសគ្រប់គ្រាន់ ដើម្បីប្រមូលលុយពីអ្នកគាំទ្រថែមទៀត។
៣-មួយវិញទៀត ការប្រកាសពីថ្ងៃវិលត្រឡប់ចូលស្រុកលើកនេះ ក៏អាចដោយសារតែគាត់ត្រូវបានបុរសខ្លាំង ហ៊ុន សែន រុញឱ្យផ្ទប់ជញ្ជាំង ព្រោះតែភាពកំសាកមិនហ៊ានដាក់ថ្ងៃវិលមកវិញពិតប្រាកដ។ ដូច្នេះដើម្បីកុំឱ្យខ្មាសគេពេក ដោយត្រូវបានគេសើចចំអកថា ខែទី១៣បានមកវិញនោះ សម រង្ស៊ី ក៏ធ្វើជាខែងរ៉ែង ប្រកាសឱ្យល្អមើលសិន ចាំជិតដល់ពេល ចាំប្រកាសប្តូរថ្ងៃតាមក្រោយវិញ កុំឱ្យថាមិនហ៊ានប្រាប់ថ្ងៃមក ខា្លចវាអន់ពេក។ ប៉ុន្តែសម្រាប់ខ្ញុំវិញ សម រង្ស៊ី ទោះលេងច្រកណាក៏ចាញ់ដែរ។ បើមិនហ៊ានមក គឺត្រូវជាប់ឈ្មោះជាជនកំសាកញីអស់មួយជីវិត។ បើហ៊ានមកវិញ គឺជាប់គុកអស់មួយជីវិត។ ចឹងមានតែធ្វើនយោបាយ របៀបថ្ងៃបណ្តើរកូន គឺដើរមួយជំហាន គិតមួយជំហាន ឱ្យតែរួចមួយថ្ងៃៗសិនគឺបានហើយ។ នេះគេហៅថា នយោបាយទាល់ច្រក អស់ផ្លូវដើរ មានតែបណ្តោយតាមខ្យល់បក់ ធ្វើម៉េចឱ្យតែរួចខ្លួនបានមួយគ្រាៗ។ ដូច្នេះយកល្អ អ្នកផ្កាប់មុខ ដែលជឿក្រុមប្រឆាំង កុំចេះតែហ៊ានភ្នាល់ឱ្យសោះ ប្រយ័ត្នចាញ់អស់គូទខោ យល់ល្អទុកលុយកាក់ សម្រាប់ចាយវាយ ពេលបុណ្យភ្ជុំបិណ្ឌខាងមុខនេះវិញ វាប្រសើរជាង៕
ដោយ៖ ស ជាតិ
