មន្ត្រីជាន់ខ្ពស់កូរ៉េខាងត្បូង៖ ពាណិជ្ជកម្មកម្ពុជា-កូរ៉េ នឹងរឹតតែរឹងមាំក្រោយដំណើរទស្សនកិច្ចលោក មូន ជែអ៊ីន

មន្ត្រីជាន់ខ្ពស់កូរ៉េខាងត្បូង៖ ពាណិជ្ជកម្មកម្ពុជា-កូរ៉េ នឹងរឹតតែរឹងមាំក្រោយដំណើរទស្សនកិច្ចលោក មូន ជែអ៊ីន

លោក ក្វុន ព្យុងអូ (Kwon Pyung-oh) នាយកប្រតិបត្តិនៃទីភ្នាក់ងារជំរុញពាណិជ្ជកម្ម និងវិនិយោគកូរ៉េ (KOTRA) បានបង្ហាញក្តីរំពឹងរបស់ខ្លួនថា ការធ្វើពាណិជ្ជកម្មរវាងកម្ពុជា និងសាធារណរដ្ឋកូរ៉េ នឹងរឹតតែរឹងមាំថែមទៀត នៅក្រោយដំណើរទស្សនកិច្ចរបស់លោក មូន ជែអ៉ីន ប្រធានាធិបតីសាធារណរដ្ឋកូរ៉េនៅក្នុងប្រទេសកម្ពុជា។

ការបង្ហាញក្តីរំពឹងរបស់លោក ក្វុន ព្យុងអូ បានធ្វើឡើងនៅថ្ងៃទី១៤ ខែមីនា ឆ្នាំ២០១៩ ក្នុងពេលរូបលោកអញ្ជើញជួបពិភាក្សារងារជាមួយលោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម។

ក្នុងជំនួបនោះលោករដ្ឋមន្ត្រីពាណិជ្ជកម្មកម្ពុជា បានសម្ដែងសេចក្ដីរីករាយចំពោះការមកដល់របស់លោក មូន ជែអ៊ីន ដែលបានមកបំពេញដំណើរទស្សនកិច្ចផ្លូវរដ្ឋនៅកម្ពុជា ដោយមានរួមដំណើរផ្ទាល់ដោយដោយលោក ក្វុន ព្យុងអូ ផងដែរ។

នៅចំពោះមុខលោក ក្វុន ព្យុងអូ, លោករដ្ឋមន្ត្រី ប៉ាន សូរស័ក្តិ សង្ឃឹមថា វត្តមានរបស់លោកប្រធានាធិបតីសាធារណរដ្ឋកូរ៉េ នឹងពង្រឹងសេចក្ដីទុកចិត្តដល់ធុរជននៃសាធារណរដ្ឋកូរ៉េ ឲ្យរឹតតែមានជំនឿចិត្តលើស្ថេរភាពនយោបាយនៅកម្ពុជា ព្រមទាំងបន្ដាក់ទុនវិនិយោគបន្ថែមទៀតនៅក្នុងប្រទេសកម្ពុជា។

លោករដ្ឋមន្ត្រី មានសុទិដ្ឋិនិយមថា វេទិកាធុរកិច្ចដែលកម្ពុជា និងសាធារណរដ្ឋកូរ៉េ នឹងរៀបចំរួមគ្នាក្នុងកំលុងពេលនៃដំណើរទស្សនកិច្ចដ៏មានសារៈសំខាន់នេះ នឹងទាក់ទាញបានវិនិយោគពីបរទេសដោយផ្ទាល់បន្ថែមទៀតពីប្រទេសកូរ៉េ ព្រមទាំងលើកទឹកចិត្តឲ្យក្រុមហ៊ុនកូរ៉េ សិក្សា និងស្វែងរកដៃគូជាមួយនឹងក្រុមហ៊ុនកម្ពុជា ដើម្បីធ្វើពាណិជ្ជកម្មរួមគ្នា។

លោក ក្វុន ព្យុងអូ បានបង្ហាញជំនឿដូចនឹងរដ្ឋមន្ត្រីពាណិជ្ជកម្មកម្ពុជាផងដែរ។ លោកឡើងថា ពាណិជ្ជកម្មរវាងប្រទេសទាំងពីរ នឹងរឹតតែរឹងមាំបន្ថែមទៀតក្រោយពីដំណើរទស្សនកិច្ចផ្លូវរដ្ឋនេះត្រូវបានបញ្ចប់។

លោក ក្វុន ព្យុងអូ បានលើកឡើងទៀតថា ជំរុញពាណិជ្ជកម្ម និងវិនិយោគសាធារណរដ្ឋកូរ៉េ នឹងបន្តកិច្ចសហប្រតិបត្តិការល្អជាមួយនឹងក្រសួងពាណិជ្ជកម្ម ក៏ដូចជាសហគមន៍ធុរកិច្ចដទៃទៀត ដើម្បីពង្រឹង និងទាក់ទាញបន្ថែមវិនិយោគិនមកកម្ពុជា ដោយជាក់ស្ដែងនៅក្នុងវេទិកាធុរកិច្ចកម្ពុជា-កូរ៉េ នឹងមានការចុះអនុស្សារណៈយោគយល់គ្នារវាងទីភ្នាក់ងារ KOTRA ជាមួយសភាពាណិជ្ជកម្មកម្ពុជា ដើម្បីផ្សារភ្ជាប់ចំណងសហប្រតិបត្តិការរវាងសហគមន៍ធុរកិច្ចនៃប្រទេសទាំងពីរ ឲ្យរឹតតែស៊ីជម្រៅថែមទៀត។

សូមបញ្ជាក់ថា ទំហំពាណិជ្ជរវាងកម្ពុជា និងសាធារណរដ្ឋកូរ៉េបានកើនឡើងជាបន្តបន្ទាប់នៅក្នុងរយៈពេលប្រមាណជា ១០ឆ្នាំចុងក្រោយនេះ។ នៅក្នុងឆ្នាំ២០១៨ ទំហំពាណិជ្ជកម្មនៃប្រទេសទាំង២ មានចំនួនជាង ៧៤៦លានដុល្លារ ក្នុងកម្ពុជានាំចេញទៅសាធារណរដ្ឋកូរ៉េមានជាង ២០២លានដុល្លារ ខណៈកូរ៉េនាំចូលមកកម្ពុជាវិញមានមានជាង ៥៤៣លានដុល្លារ។

ទំនិញដែលកម្ពុជានាំចេញទៅកូរ៉េខាងត្បូងមានសំលៀកបំពាក់ គ្រឿងអេឡិកត្រូនិក ស្បែកជើង ភេសជ្ជៈ កាបូប កៅស៊ូ ឱសថ និងក្រដាសកាតុង។ ដោយឡែកទំនិញដែលកម្ពុជា នាំចូលពីកូរ៉េច្រើនបំផុតមាន ក្រណាត់ត្បាញ រថយន្តដឹកទំនិញ ភេសជ្ជៈ គ្រឿងអេឡិកត្រូនិក គ្រឿងម៉ាស៊ីន វត្ថុតុបតែងលម្អផ្ទះ ឱសថ សាប៊ូ និងផលិតផលប្លាស្ទិក។

កូរ៉េខាងត្បូងក៏ជាប្រទេសដែលមានអ្នកវិនិយោគមកបណ្តាក់ទុនរកស៊ីនៅកម្ពុជាធំមួយផងដែរ។ ក្នុងនោះគិតពីឆ្នាំ១៩៩៦ ដល់ ខែមករា ឆ្នាំ២០១៩ ការវិនិយោគដោយអ្នកវិនិយោគកូរ៉េខាងត្បូង មានចំនួន ២១៤គម្រោង ជាមួយទំហំទឹកប្រាក់ប្រមាណ ៤.៤៧ពាន់លានដុល្លារ។ ក្នុងចំណោមគម្រោងទាំងនេះមាន ១២៣គម្រោង គឺជារោងចក្រដែលមានទំហំទុនវិនិយោគសរុប ៤៨៦លានដុល្លារអាមេរិក បង្កើតការងារប្រមាណ ៨ម៉ឺនកន្លែង៕