សត្វត្មាតស៊ីសាកសពស្អុយរលួយ តែបានជួយដល់មនុស្ស សត្វមិនធម្មតា
សត្វត្មាតស៊ីសាកសពស្អុយរលួយ តែបានជួយដល់មនុស្ស សត្វមិនធម្មតា
សត្វត្មាតជាសត្វដែលស៊ីសាកសពជាអាហារ ហើយការស៊ីសាកសពនេះអាចធ្វើឲ្យមនុស្សមួយចំនួនគិតថាសត្វនេះជាសត្វកខ្វក់ ប៉ុន្តែការពិតជាក់ស្តែងសត្វត្មាតបានជួយដល់មនុស្ស និងសត្វដទៃទៅវិញទេតាមរយៈការស៊ីសាកសពនេះ។
អង្គការ BirdLife International Cambodia Programme បានសរសេរនៅលើ ទំព័រហ្វេសប៊ុករបស់ខ្លួនថាសត្វត្មាតរក្សាបរិស្ថានឱ្យល្អស្អាត និងបង្ការមិនឱ្យក្លិនស្អុយ និងជំងឺរាតល្បាត ឆ្លងទៅមនុស្ស និងសត្វពាហនៈ។ ប្រភពដដែលសរសេរទៀតថា សត្វត្មាតស៊ីសាកសពសត្វដែលងាប់ស្អុយរលួយ ដែលសាកសពសត្វស្អុយរលួយនោះ អាចមានផ្ទុកមេរោគឆ្លង ហើយអាចចម្លងមកមនុស្ស និងសត្វបាន។
ទោះយ៉ាងណាមកដល់ឆ្នាំ២០១៨ នេះតាមរយៈការអង្កេតសត្វត្មាតនៅកម្ពុជាមានតិចជាង១៣០ក្បាលប៉ុណ្ណោះ។ ប្រភពដដែលបន្តថា៖ «សត្វត្មាតទាំងនេះ ជាប្រភេទសត្វបក្សី ដែលមានជាតិអាស៊ីតខ្លាំងក្នុងក្រពះ ដែលធ្វើឱ្យពួកវាអាចស៊ីសាកសពសត្វស្អុយរលួយបានយ៉ាងងាយ ដោយសម្អាតសាកសពសត្វដែលស្អុយរលួយអស់ពីដី សត្វត្មាតបង្ការមិនឱ្យមានជំងឺឆ្លងរាលដាលដល់មនុស្ស និងសត្វ»។
ទោះយ៉ាងណាប្រភពខាងលើថាសត្វត្មាតកំពុងទទួលរងគ្រោះបាត់ជម្រកដោយការកាប់បំផ្លាញព្រៃឈើ និងដោយការពុលថ្នាំ ដែលគេបំពុលសត្វព្រៃជាដើម។ អង្គការខាងលើអំពាវឲ្យប្រជាពលរដ្ឋរួមគ្នាជួយការពារសត្វត្មាត ឈប់បរិភោគសាច់សត្វព្រៃ និងប្រើប្រាស់ថ្នាំបំពុលសត្វព្រៃ៕
