ក្រោយមានករណីស្លាប់អ្នកជំងឺទី១នៅកម្ពុជា ដោយសារ H5N1 អង្គការសុខភាពពិភពលោក បានផ្តល់ឱសថព្យាបាលជំងឺនេះដល់កម្ពុជាចំនួន ៣ពាន់ដូស
ក្រោយមានករណីស្លាប់អ្នកជំងឺទី១នៅកម្ពុជា ដោយសារ H5N1 អង្គការសុខភាពពិភពលោក បានផ្តល់ឱសថព្យាបាលជំងឺនេះដល់កម្ពុជាចំនួន ៣ពាន់ដូស
អង្គការសុខភាពពិភពលោក ហៅកាត់ថា (WHO) នៅថ្ងៃទី២៧ ខែកុម្ភៈ ឆ្នាំ២០២២៣ បានផ្តល់ឱសថព្យាបាលជំងឺផ្តាសាយបក្សី H5N1 ដល់ប្រទេសកម្ពុជាចំនួន ៣ពាន់ដូស ។ ការផ្តល់ជំនួយ ជាឪសថព្យាបាលជំងឺនេះ បានធ្វើឡើងបន្ទាប់ពីប្រទេសកម្ពុជា បានរកឃើញ ករណីផ្ដាសាយបក្សី H5N1 ដោយមានកុមារីម្នាក់បានស្លាប់ នៅក្នុងខេត្តព្រៃវែង។
រដ្ឋលេខាធិការក្រសួងសុខាភិបាល លោកស្រី យក់ សម្បត្តិ បានឲ្យដឹងថា ឱសថទាំងនេះ នឹងត្រូវបញ្ជូនបែងចែកតាមសហគមន៍ដែលមានការសង្ស័យពាក់ព័ន្ធទៅនឹងជំងឺផ្ដាសាយបក្សី (H5N1)ដូចជាស្រុកស៊ីធរកណ្ដាល ខេត្តព្រៃវែងជាដើម។ លោកស្រីបន្តថា មួយរយៈមកនេះ ក្រោយការតាមដានយ៉ាងយកចិត្តទុកដាក់ របស់ក្រសួងសុខាភិបាល ទៅលើករណីជំងឺផ្ដាសាយបក្សីនៅខេត្តព្រៃវែង គឺស្ថានភាពជំងឺនេះ មិនមានសភាពគួរឲ្យព្រួយបារម្ភនោះទេ។
ពាក់ព័ន្ធនឹងជំងឺនេះដែរ កាលពីថ្ងៃទី២២ ខែកុម្ភៈ កន្លងទៅនេះ មានកុមារីម្នាក់បានស្លាប់បាត់បង់ជីវិត បន្ទាប់ពីការធ្វើរោគវិនិច្ឆ័យឃើញថា កើតជំងឺផ្តាសាយបក្សី (H5N1)។ ជំងឺផ្តាសាយបក្សី (H5N1) មួយករណីនេះ កើតលេីកុមារីអាយុ ១១ឆ្នាំ ៦ខែ រស់នៅភូមិរលាំង ឃុំរំលេច ស្រុកស៊ីធរកណ្តាល ខេត្តព្រៃវែង។ ក្រោយករណីនេះ ក្រុមការឆ្លើយតបបន្ទាន់របស់ក្រសួងសុខាភិបាល បានរកឃើញមនុស្ស ១២នាក់ ដែលបានប៉ះពាល់ជាមួយកុមារីកើតជំងឺផ្តាសាយបក្សី (H5N1) នៅក្នុងខេត្តព្រៃវែង។ ក្នុងនោះអ្នកប៉ះពាល់ ៤នាក់ បានចាប់ផ្តើមចេញរោគសញ្ញា៕
