សុន្ទរកថារបស់ប្រធានាធិបតីរុស្ស៊ី លោក Vladimir Putin ក្នុងទិវារំលឹកខួបអនុស្សាវរីយ៍នៃជ័យជំនះក្នុងសង្គ្រាមលោកលើកទី២
សុន្ទរកថារបស់ប្រធានាធិបតីរុស្ស៊ី លោក Vladimir Putin ក្នុងទិវារំលឹកខួបអនុស្សាវរីយ៍នៃជ័យជំនះក្នុងសង្គ្រាមលោកលើកទី២
សុន្ទរកថារបស់ប្រធានាធិបតីរុស្ស៊ី លោក Vladimir Putin ក្នុងទិវារំលឹកខួបអនុស្សាវរីយ៍នៃជ័យជំនះក្នុងសង្គ្រាមលោកលើកទី២
ខ្ញុំសូមអបអរសាទរអ្នកទាំងអស់គ្នានៅថ្ងៃនៃជ័យជំនះដ៏អស្ចារ្យនេះ។ ការការពារជាតិមាតុភូមិនៅពេលប្រទេសជាតិកំពុងជួបប្រទះនូវគ្រោះថ្នាក់គឺជារឿងដ៏ពិសិដ្ឋបំផុត។ អារម្មណ៍ស្នេហាជាតិពិតប្រាកដទាំងនេះ បានទាក់ទាញអ្នកស្ម័គ្រចិត្តឱ្យចូលរួមនៅក្នុងកងជីវពល។
នៅថ្ងៃនេះ អ្នកកំពុងប្រយុទ្ធដើម្បីប្រជាជនរបស់យើងនៅតំបន់ Donbas ដើម្បីសន្តិសុខនៃមាតុភូមិរុស្ស៊ីរបស់យើង។ ថ្ងៃទី ០៩ ខែឧសភា ឆ្នាំ ១៩៤៥ ត្រូវបានចារទុកនៅក្នុងប្រវត្តិសាស្ត្រពិភពលោកជារៀងរហូតថាជា «ទិវាជ័យជំនះរបស់សហភាពសូវៀតដ៏រួបរួម»។ យើងមានមោទកភាពចំពោះជ័យជំនះនេះ ហើយវាគឺជាមរតកសម្រាប់ពួកយើង។
កាតព្វកិច្ចរបស់យើងគឺ «ការរក្សាការចងចាំស្តីពីមនុស្ស ដែលបានកម្ចាត់ពួកណាហ្ស៊ី» និង «ការធានាថា ភាពភ័យរន្ធត់នៃសង្គ្រាមលោកនឹងមិនកើតឡើងជាថ្មីម្តងទៀតឡើយ» ហើយនេះគឺជាមូលហេតុ ដែល (បើទោះបីជាមានភាពខុសគ្នានៅក្នុងទំនាក់ទំនងអន្តរជាតិក៏ដោយ) រុស្ស៊ីតែងតែព្យាយាមបង្កើតឱ្យមានសន្តិសុខដែលអាចជឿទុកចិត្តបាន និងដែលសហគមន៍ពិភពលោកទាំងមូលត្រូវការជាចាំបាច់។
រុស្ស៊ីបានអំពាវនាវឱ្យមានដំណោះស្រាយបែបសម្រុះសម្រួល ក៏ប៉ុន្តែបានក្លាយអសារបង់។ បណ្តាប្រទេស NATO មិនស្តាប់យើងទេ ដែលនេះមានន័យថា «ពួកគេមានផែនការផ្សេងពីនេះ ហើយយើងក៏បានឃើញអំពីរឿងនេះដែរ»។ ពួកគេបានរៀបចំដោយបើកចំហនូវប្រតិបត្តិការដាក់ទណ្ឌកម្មមួយផ្សេងទៀតនៅ Donbas និងការឈ្លានពានលើទឹកដីប្រវត្តិសាស្ត្ររបស់យើង បូករួមទាំងតំបន់គ្រីមៀ។
មានការលើកឡើងដែលបង្ហាញថា «ទីក្រុងគៀវអាចនឹងមានលទ្ធភាពទទួលបានអាវុធនុយក្លេអ៊ែរ» ហើយសម្ព័ន្ធភាព NATO បានចាប់ផ្តើមដាក់ពង្រាយកងទ័ពរបស់ពួកគេចូលទៅក្នុងទឹកដីជិតខាងរបស់យើង ហើយពួកគេបានបន្តបង្កការគំរាមកំហែងដែលមិនអាចទទួលយកបានមកលើព្រំដែនរបស់យើង។
យើងបានឃើញពួកគេលាតត្រដាងអំពីហេដ្ឋារចនាសម្ព័ន្ធយោធា ហើយយើងបានឃើញពីរបៀបដែលទីប្រឹក្សាយោធារាប់រយនាក់បានចាប់ផ្តើមធ្វើការ បូករួមនឹងការផ្គត់ផ្គង់អាវុធពីអង្គការ NATO។ ហានិភ័យបានកើនឡើងជារៀងរាល់ថ្ងៃ ហើយរុស្ស៊ីក៏បានចាត់វិធានការការពារប្រឆាំងនឹងអ្នកឈ្លានពាន។ វាគឺជាវិធានការទាន់ពេលវេលា និងជាការសម្រេចចិត្តដ៏ត្រឹមត្រូវបំផុតតែមួយគត់របស់ប្រទេសដែលមានអធិបតេយ្យភាព, ដែលរឹងមាំ និងឯករាជ្យ។
សហរដ្ឋអាមេរិក ជាពិសេសបន្ទាប់ពីការដួលរលំនៃសហភាពសូវៀត បានចាប់ផ្តើមនិយាយអំពីអំណាចផ្តាច់មុខរបស់ខ្លួន ហើយពួកគេបានប្រើរឿងនេះដើម្បីបង្កការអាម៉ាស់ មិនត្រឹមតែចំពោះពិភពលោកទាំងមូលប៉ុណ្ណោះទេ ប៉ុន្តែពួកគេក៏បានបង្កការអាម៉ាស់ដល់បណ្តាប្រទេសរណបនឹងពួកគេផងដែរ។
យើងគឺជាប្រទេសខុសពីពួកគេ។ ប្រទេសរុស្សីមានអត្តចរិតខុសពីពួកគេ។ យើងនឹងមិនលះបង់ក្តីស្រឡាញ់របស់យើងចំពោះជាតិមាតុភូមិរបស់យើង, មិនលះបង់មុខមាត់របស់យើង និងតម្លៃប្រពៃណីរបស់យើង និងរបស់បុព្វបុរសរបស់យើង និងមិនលះបង់ការគោរពចំពោះប្រជាជន និងវប្បធម៌របស់យើងនោះទេ។ ប៉ុន្តែនៅលោកខាងលិច ពួកគេបានសម្រេចចិត្តលះបង់ចោលនូវតម្លៃនេះ។
យើងដឹងថា «អតីតយុទ្ធជនអាមេរិកចង់ចូលរួមនៅក្នុងព្យុហយាត្រាយោធានៅទីក្រុងម៉ូស្គូ ក៏ប៉ុន្តែត្រូវបានហាមឃាត់មិនឱ្យធ្វើបែបនេះ» ក៏ប៉ុន្តែខ្ញុំចង់ឱ្យពួកគេដឹងថា «យើងមានមោទនភាពចំពោះស្នាដៃនៃវីរភាពរបស់អ្នក និងការចូលរួមចំណែករបស់អ្នកនៅក្នុងជ័យជំនះរួម»។ យើងនឹងគោរពអ្នកចម្បាំងទាំងអស់នៅក្នុងកងទ័ពសម្ព័ន្ធមិត្ត មិនថាអង់គ្លេស បារាំង អាមេរិក ចិន និងអ្នកដែលបានចូលរួមកម្ចាត់ពួកយោធា និយមណាហ្ស៊ី។
សព្វថ្ងៃនេះកងជីវពលនៅតំបន់ Donbas រួមជាមួយទាហានរុស្ស៊ីកំពុងប្រយុទ្ធនៅលើទឹកដីរបស់ពួកគេដើម្បីជាតិមាតុភូមិ និងដើម្បីអនាគតរបស់ពួកគេ។ គ្មាននរណាម្នាក់នឹងភ្លេចមេរៀនដែលទទួលបានពីសង្គ្រាម លោកលើកទី២ នោះទេ។ ថ្ងៃនេះ យើងសូមគោរពរំលឹកនូវការចងចាំដ៏ប្រពៃចំពោះអ្នកដែលបានស្លាប់បាត់បង់ជីវិតដោយសារសង្រ្គាមស្នេហាជាតិដ៏អស្ចារ្យ។
យើងសូមគោរព រំលឹកនូវការចងចាំចំពោះមនុស្សដែលត្រូវបានដុតទាំងរស់ នៅក្នុងអគារពាណិជ្ជកម្មកាលពីថ្ងៃទី ១៩ ខែឧសភា ឆ្នាំ ២០១៤ និងចំពោះស្ត្រី និងមនុស្សចាស់ និងកុមារនៅតំបន់ Donbas ដែលបាន ស្លាប់នៅក្រោមការបាញ់ផ្លោងរបស់ពួកណាហ្ស៊ី។
យើងសូមគោរពចំពោះសមមិត្តរបស់យើងដែលបានពលីជីវិតនៅក្នុងសមរភូមិ ដើម្បីការពារប្រទេសរុស្ស៊ី។ ការស្លាប់របស់ទាហាន និងនាយទាហានរបស់យើងម្នាក់ៗ គឺជាសោកនាដកម្មសម្រាប់យើងទាំងអស់គ្នា។ យើងនឹងធ្វើអ្វីៗគ្រប់យ៉ាងដើម្បីថែទាំគ្រួសាររបស់ពួកគេ និងជួយពួកគេ ហើយការឧបត្ថម្ភដ៏ពិសេសនឹងត្រូវបានផ្តល់ជូនដល់កុមារដែលជាកូនចៅរបស់សមមិត្តដែលបានពលីជីវិតនិងអ្នកដែលបានរងរបួស។ ខ្ញុំបានចុះហត្ថលេខាលើច្បាប់មួយដែលនឹងចូលជាធរមាននៅថ្ងៃនេះ។
ខ្ញុំសូមជូនពរដល់យោធិន និងនាយទាហានដែលរងរបួសឆាប់ជាសះស្បើយ ហើយខ្ញុំសូមអរគុណដល់គ្រូពេទ្យ និងគិលានុបដ្ឋាយិកា, បុគ្គលិកពេទ្យនៅក្នុងមន្ទីរពេទ្យយោធាសម្រាប់ការងារដ៏ក្លាហានរបស់ពួកគេ។
ឥឡូវនេះ នៅលើទីលានក្រហម Red Square ទាហាននិងមន្ត្រីកំពុងឈរនៅទីនេះ គឺជាអ្នកដែលបានមកពីតំបន់ជាច្រើននៃមាតុភូមិដ៏ធំរបស់យើង ដែលរួមមានទាំងអ្នកដែលមកដោយផ្ទាល់ពីតំបន់ Donbas ដែលជាតំបន់សង្រ្គាម។
យើងនៅតែចងចាំអំពីរបៀបដែលសត្រូវរបស់រុស្ស៊ីបានព្យាយាមប្រើក្រុមភេរវករអន្តរជាតិប្រឆាំងនឹងយើង។ ពួកគេបានព្យាយាមផ្តួលយើង ក៏ប៉ុន្តែពួកគេបានទទួលបរាជ័យ។ សព្វថ្ងៃនេះ អ្នកចម្បាំងរបស់យើង ដែលមានជាតិសាសន៍ផ្សេងៗគ្នាកំពុងប្រយុទ្ធនៅក្នុងសមរភូមិ។ នេះគឺជាកម្លាំងដ៏រឹងមាំរបស់រុស្ស៊ី។
បច្ចុប្បន្ននេះ អ្នកកំពុងការពារអ្វីដែលឪពុកនិងជីតារបស់អ្នកធ្លាប់បានការពារ។ សម្រាប់ពួកគេ អត្ថន័យដ៏ប្រសើរបំផុតនៅក្នុងជីវិតរបស់ពួកគេគឺ «ភាពរុងរឿង និងសុវត្ថិភាពរបស់ជាតិមាតុភូមិរបស់ពួកគេ» ហើយភាពស្មោះត្រង់របស់យើងចំពោះមាតុភូមិគឺជា «គុណតម្លៃដ៏ធំបំផុត និងជាមូលដ្ឋានដ៏ធំបំផុតនៃឯករាជ្យភាពរបស់រុស្ស៊ី»។
អ្នកដែលបានកម្ចាត់ពួកណាហ្ស៊ីនៅក្នុងអំឡុងសង្គ្រាមស្នេហាជាតិដ៏អស្ចារ្យ បានបង្ហាញយើងអំពីគំរូនៃវីរភាព ហើយនេះគឺជាយុគសម័យនៃជ័យជំនះ ហើយយើងនឹងយកគំរូតាមវីរៈបុរសរបស់យើងជានិច្ច៕
