ខ្មែរប៉ុស្ដិ៍ Close

សម្ដេច ហ៊ុន សែន៖ អរគុណអាមេរិកដែលបានឆ្លុះបញ្ចាំងឱ្យឃើញពីការសម្រេចចិត្តដ៏ត្រឹមត្រូវរបស់ខ្ញុំកាលពីឆ្នាំ ១៩៩៤

ដោយ៖ លី វិទ្យា ​​ | ថ្ងៃសុក្រ ទី១០ ខែធ្នូ ឆ្នាំ២០២១ ផ្ទះហ្វេសប៊ុក 1394
សម្ដេច ហ៊ុន សែន៖ អរគុណអាមេរិកដែលបានឆ្លុះបញ្ចាំងឱ្យឃើញពីការសម្រេចចិត្តដ៏ត្រឹមត្រូវរបស់ខ្ញុំកាលពីឆ្នាំ ១៩៩៤សម្ដេច ហ៊ុន សែន៖ អរគុណអាមេរិកដែលបានឆ្លុះបញ្ចាំងឱ្យឃើញពីការសម្រេចចិត្តដ៏ត្រឹមត្រូវរបស់ខ្ញុំកាលពីឆ្នាំ ១៩៩៤

នារសៀលថ្ងៃទី ១០ ខែធ្នូ ឆ្នាំ២០២១ នេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសរសេរសារក្នុងន័យឆ្លើយតបទៅនឹងការរឹតត្បិតការលក់ដូរអាវុធ និងសម្ភារៈយោធាដល់កម្ពុជា កាលពីថ្ងៃទី ៩ ខែធ្នូម្សិលមិញនេះ ដោយក្រសួងពាណិជ្ជកម្មអាមេរិក។

នៅក្នុងសារនោះ សម្ដេចបានឆ្លៀតគូសបញ្ជាក់ពីការសេម្រេចចិត្តដ៏ត្រឹមត្រូវរបស់លោកកាលពីឆ្នាំ ១៩៩៤ ក្នុងការមិនផ្ដេកផ្ដួលទៅលើអាវុធ និងសម្ភារៈយោធារបស់អាមេរិកសម្រាប់វិស័យការពារជាតិកម្ពុជា។ ទន្ទឹមនេះ សម្ដេចក៏មិនភ្លេចឆ្លុះបញ្ចាំងពីបរាជ័យរបស់របបដែលពឹងពាក់លើអាវុធរបស់អាមេរិកនោះដែរ តួយ៉ាងដូចជារបប លន់ នល់ និងរបបនៅអាហ្វហ្គានីស្ថាននាពេលថ្មីៗនេះជាដើម។

សូមអានសារទាំងស្រុងរបស់សម្ដេចតេជោ ហ៊ុន សែន ដូចខាងក្រោម៖

កាលពីប៉ុន្មានថ្ងៃកន្លងទៅនេះ សហរដ្ឋអាមេរិកបានសម្រេចអំពីការរឹតត្បិតការលក់ដូរអាវុធ និងសម្ភារៈយោធាដល់កម្ពុជា។ ខ្ញុំឆ្លៀតយកឱកាសនេះ សូមអរគុណចំពោះសហរដ្ឋអាមេរិក ដោយសារការសម្រេចរបស់សហរដ្ឋអាមេរិកលើបម្រាមការលក់ដូរអាវុធ និង សម្ភារៈយោធាមកកម្ពុជានាពេលនេះ គឺបានឆ្លុះបញ្ចាំងពីភាពត្រឹមត្រូវនៃការសម្រេចចិត្តរបស់ខ្ញុំ កាលពីឆ្នាំ ១៩៩៤ ដែលនៅពេលនោះ ខ្ញុំបានធ្វើការសម្រេចចិត្ត ដោយមិនធ្វើការផ្លាស់ប្តូរប្រព័ន្ធអាវុធកម្ពុជាដែលមានពេលនោះ ទៅទិញប្រព័ន្ធអាវុធអាមេរិក។ ទន្ទឹមនឹងនេះ ខ្ញុំសូមដាក់ចេញបទបញ្ជាដល់អង្គភាពប្រដាប់អាវុធទាំងអស់ ឱ្យធ្វើការត្រួតពិនិត្យឡើងវិញជាបន្ទាន់អំពីអាវុធ និងសម្ភារៈយោធា ដែលកម្ពុជាមានបច្ចុប្បន្ន ហើយត្រូវប្រមូលអាវុធ និងសម្ភារៈយោធាអាមេរិកទាំងអស់ ប្រសិនបើមាន យកទៅរក្សាទុកក្នុងឃ្លាំង ឬយកទៅកំទេចចោល តាមការជាក់ស្តែង។
តាមចំណាំរបស់ខ្ញុំ អ្នកដែលធ្លាប់ប្រើប្រព័ន្ធអាវុធអាមេរិកជាច្រើន បានចាញ់សង្រ្គាម ដូចជាក្នុងរបបសាធារណខ្មែររបស់ លន់ នល់ ដែលពេលនោះបានប្រើប្រព័ន្ធអាវុធអាមេរិក និងបាននាំចូលអាវុធជាច្រើនមកកម្ពុជា ហើយធ្វើឱ្យកម្ពុជាជាប់បំណុលខ្មៅនេះ រហូតមកដល់បច្ចុប្បន្ននេះ។ ថ្មីៗនេះ ទៀតសោត គឺ អ្នកប្រើប្រព័ន្ធអាវុធអាមេរិក ក៏បានចាញ់សង្រ្គាមនៅអាហ្គានីស្ថាន។ ខ្ញុំមានជំនឿលើភាពក្លាហាន ព្រមទាំងស្មារតី និងទឹកចិត្តប្រយុទ្ធរបស់យុទ្ធជនក្នុងសមរភូមិ ដើម្បីការពារបូរណភាពទឹកដីរបស់កម្ពុជា ជាជាងលើអាវុធតែមួយមុខ។
ជាថ្មីម្តងទៀតខ្ញុំសូមអរគុណសហរដ្ឋអាមេរិកដែលបានជួយបញ្ជាក់ថាការសម្រេចចិត្តរបស់ខ្ញុំមិនយល់ព្រមទិញអាវុធពីអាមេរិកពិតជាត្រឹមត្រូវសម្រាប់នយោបាយការពារជាតិរបស់កម្ពុជាហើយវាក៍ជាសារព្រមានមួយប្រាប់ទៅខ្មែរដែលគ្រប់គ្រងរាជរដ្ឋាភិបាលជំនាន់ក្រោយឱយបានជ្រាបថាបើចង់មានឯករាជ្យភាពលើវិស័យការពារជាតិសូមកុំប្រើប្រាស់អាវុធរបស់អាមេរិក៕

អត្ថបទទាក់ទង