គួរឲ្យព្រឺខ្លួន! កោះដាច់ស្រយាលមួយគ្មានអ្នកណាហ៊ានចូល
គួរឲ្យព្រឺខ្លួន! កោះដាច់ស្រយាលមួយគ្មានអ្នកណាហ៊ានចូល
ជាធម្មតា មនុស្សតែងតែចង់ស្វែងរកទីកន្លែង និង វប្បធម៌ប្លែកៗ ដែលពួកគេមិនធ្លាប់ស្គាល់ពីមុនមក។ ទោះបីជាយ៉ាងណា មានកុលសម្ព័ន្ធមួយក្រុមកំពុងរស់នៅលើកោះដាច់ស្រយាលមួយ ហើយគ្មាននរណាម្នាក់ហ៊ានចូល ឬ គ្មានសិទ្ធិចូលទៅលេងទីនោះឡើយ។
North Sentinel គឺជាកោះមួយនៃបណ្តុះកោះ Andaman នៅក្នុងមហាសមុទ្រឥណ្ឌា ដោយត្រូវបានហាមឃាត់មិនឲ្យចូលទៅឡើយ ព្រោះវាត្រូវបានកាន់កាប់ និងរស់នៅដោយក្រុមកុលសម្ព័ន្ធ Sentinelese។
ក្រុមកុលសម្ព័ន្ធនេះមិនព្រមទាក់ទងជាមួយអ្នកខាងក្រៅឡើយ មិនតែប៉ុណ្ណោះថែមទាំងវាយប្រហារ អ្នកដែលហ៊ានចូលទៅក្បែរកោះរបស់ពួកគេទៀតផង។ កោះខាងលើមិនមានភាពស៊ាំទៅនឹងជំងឺនាសម័យទំនើបនេះឡើយ ដូច្នេះការចូល ឬ ទាក់ទងជាមួយអ្នកខាងក្រៅ អាចធ្វើឲ្យក្រុមកុលសម្ព័ន្ធ Sentinelese វិនាសក៏ថាបាន។
យ៉ាងណាមិញ រដ្ឋាភិបាលឥណ្ឌាមានបំណងចង់ទាក់ទងជាមួយកុលសម្ព័ន្ធ Sentinelese ដោយការទំនាក់ទំនងមិត្តភាពដំបូងបង្អស់ ត្រូវបានធ្វើឡើងក្នុងឆ្នាំ ១៩៩១ ដោយអ្នកប្រាជ្ញម្នាក់ឈ្មោះ Triloknath Pandit ដែលបានចូលទៅកោះខាងលើដោយនាំយកផ្លែដូង រួមទាំង អំណោយមួយចំនួន ដើម្បីទិញទឹកចិត្តពួកគេ។ វាគឺជាលើកដំបូងបង្អស់ហើយ ដែល Sentinelese បានស្វាគមន៏អ្នកខាងក្រៅ ដោយមិនប្រើប្រាស់គ្រាប់ព្រួញ។
ទោះជាយ៉ាងណាក៏ដោយ បន្ទាប់ពីបេសកកម្មនេះបញ្ចប់ ក្រុមមន្រ្តីក៏បានសម្រេចចិត្តបញ្ឈប់បេសកកម្មផ្សេងៗទៀតទាំងអស់តែម្តង។ ពួកគេបានសន្និដ្ឋានថា ក្រុមកុលសម្ព័ន្ធនេះមានសុខភាពល្អ និង អាចរីកចម្រើនដោយគ្មាន ឬមិនចាំបាច់ត្រូវការ ការអន្តរាគមន៍ពីមនុស្សសម័យទំនើបឡើយ៕
ប្រភព៖ Sabay
