រដ្ឋមន្ត្រីក្រសួងយុត្តិធម៌ ណែនាំឱ្យស្ថាប័នតុលាការ បន្តដោះស្រាយសំណុំរឿងថ្មីៗ ដើម្បីចៀសវាងនៃការកកស្ទះសំណុំរឿងបន្តទៀត
រដ្ឋមន្ត្រីក្រសួងយុត្តិធម៌ ណែនាំឱ្យស្ថាប័នតុលាការ បន្តដោះស្រាយសំណុំរឿងថ្មីៗ ដើម្បីចៀសវាងនៃការកកស្ទះសំណុំរឿងបន្តទៀតឯកឧត្ដម កើត រិទ្ធ រដ្ឋមន្ត្រីក្រសួងយុត្តិធម៌បានណែនាំឱ្យចៅក្រម ព្រះរាជអាជ្ញា មន្រ្តីតុលាការ និងមន្រ្តីរាជការទាំងអស់នៃសាលាដំបូង ត្រូវបន្តដោះស្រាយសំណុំរឿងថ្មីៗបន្ថែមទៀត ដើម្បីចៀសវាងការវិលត្រឡប់មកស្ថានភាព នៃការកកស្ទះសំណុំរឿង នៅតាមសាលាដំបូង និងអយ្យការអមសាលាដំបូង របស់ខ្លួនឡើងវិញ។ ការណែនាំរបស់ឯកឧត្ដមរដ្ឋមន្រ្ដីនេះ ក្នុងពិធីប្រកាសផ្ទេរ តែងតាំង និងចូលកាន់មុខតំណែងជាផ្លូវការរបស់ប្រធានសាលាដំបូងខេត្តពោធិ៍សាត់ ប្រធានសាលាដំបូងខេត្តឧត្តរមានជ័យ ប្រធានសាលាដំបូង និងព្រះរាជអាជ្ញានៃអយ្យការអមសាលាដំបូងខេត្តប៉ៃលិន ព្រះរាជអាជ្ញានៃអយ្យការអមសាលាដំបូងខេត្តបាត់ដំបង ព្រះរាជអាជ្ញានៃអយ្យការអមសាលាដំបូងខេត្តបន្ទាយមានជ័យ និងព្រះរាជអាជ្ញានៃអយ្យការអមសាលាដំបូងខេត្តសៀមរាប កាលពីថ្ងៃទី២៤ ខែឧសភា ឆ្នាំ២០២១ នៅខេត្ដបាត់ដំបង។
ឯកឧត្ដម កើត រិទ្ធ បានក្រើនរម្លឹកដល់ចៅក្រម ព្រះរាជអាជ្ញា មន្រ្តីតុលាការ និងមន្រ្តីរាជការទាំងអស់ នៃសាលាជម្រះក្តីគ្រប់ជាន់ថ្នាក់ ត្រូវពង្រឹងសមត្ថភាពរបស់ខ្លួន ឱ្យស្របតាមដំណើរវិវត្តន៍ នៃកំណែទម្រង់ដោយត្រូវបន្តសិក្សាជាប្រចាំ ហើយត្រូវចូលរួមលើកកម្ពស់កិត្តិយស សេចក្តីថ្លៃថ្នូរ និងកិត្យានុភាពនៃអង្គចៅក្រម ដោយត្រូវប្រកាន់ខ្ជាប់ឱ្យបានម៉ឺងម៉ាត់នូវវិន័យ និងក្រមសីលធម៌វិជ្ជាជីវៈរបស់ចៅក្រម និងព្រះរាជអាជ្ញា ទាំងក្នុងពេលបំពេញការងារ ទាំងក្នុងជីវភាពរស់នៅប្រចាំថ្ងៃ។ ឯកឧត្ដមបានគូសបញ្ជាក់ ចៅក្រម ព្រះរាជអាជ្ញា មន្រ្តីតុលាការ និងមន្រ្តីរាជការទាំងអស់នៃសាលាដំបូង និងអយ្យការ អមសាលាដំបូង ដែលទទួលបានជោគជ័យក្នុងការអនុវត្តយុទ្ធនាការដោះ ស្រាយការកកស្ទះសំណុំរឿង ត្រូវបន្តខិតខំប្រឹងប្រែងដោះស្រាយសំណុំរឿងថ្មីៗបន្ថែមទៀត ដើម្បីចៀសវាងការវិលត្រឡប់មកស្ថិតក្នុងស្ថានភាពនៃការកកស្ទះសំណុំរឿង នៅតាមសាលាដំបូង និងអយ្យការអមសាលាដំបូងរបស់ខ្លួនឡើងវិញ។
ឯកឧត្ដមរដ្ឋមន្ដ្រីក៏បានជំរុញដល់ប្រធានសាលាជម្រះក្តី និងអយ្យការអមសាលា ជម្រះក្តីទាំងអស់ ត្រូវពង្រឹងនូវវិន័យការងារប្រចាំថ្ងៃរបស់ចៅក្រម ព្រះរាជអាជ្ញាដែលបម្រើ ការនៅក្នុងស្ថាប័នក្រោមសមត្ថកិច្ចរបស់ខ្លួន ជាពិសេស ការគ្រប់គ្រងវត្តមានប្រចាំថ្ងៃ និងផលិតភាពការងារឱ្យបានត្រឹមត្រូវ ហើយត្រូវចាត់វិធានការនានាស្របតាមច្បាប់ចំពោះអ្នកដែលមិនគោរពវិន័យការងារ។
សូមជម្រាបជូនថា សមាសភាពដែលត្រូវបានប្រកាសផ្ទេរ តែងតាំង និងចូលកាន់មុខតំណែងនៅក្នុងពិធីនេះ រួមមាន ៖ ១- ឯកឧត្តម តេង រតនា ត្រូវបានតែងតាំងជាប្រធានសាលាដំបូងខេត្តពោធិ៍សាត់ ២- ឯកឧត្តម អ៊ុំ ចាន់ថុល ត្រូវបានតែងតាំងជាប្រធានសាលាដំបូងខេត្តឧត្តរមានជ័យ, ៣- ឯកឧត្តម គឹម ម៉េង ត្រូវបានតែងតាំងជាប្រធានសាលាដំបូងខេត្តប៉ៃលិន, ៤- ឯកឧត្តម កែវ សុជាតិ ត្រូវបានផ្ទេរមកជាព្រះរាជអាជ្ញានៃអយ្យការអមសាលាដំបូងខេត្តបាត់ដំបង ៥- ឯកឧត្តម កើត វណ្ណារ៉េត ត្រូវបានផ្ទេរមកជាព្រះរាជអាជ្ញានៃអយ្យការអមសាលាដំបូងខេត្តបន្ទាយមានជ័យ ៦- ឯកឧត្តម មាស ច័ន្ទពិសិដ្ឋ ត្រូវបានផ្ទេរមកជាព្រះរាជអាជ្ញានៃអយ្យការអមសាលាដំបូងខេត្តសៀមរាប និង ៧- ឯកឧត្តម សេង គីមឡាក់ ត្រូវបានតែងតាំងជាព្រះរាជអាជ្ញានៃអយ្យការអមសាលាដំបូងខេត្តប៉ៃលិន៕ដោយ ប៊ុនរិទ្ធ ប្រភព៖ ក្រសួងយុត្ដិធម៌
