រាជរដ្ឋាភិបាលអនុញ្ញាតឱ្យបើកដំណើរការរមនីយដ្ឋានទេសចរណ៍នៅទូទាំងប្រទេស និងឱ្យធ្វើដំណើរឆ្លងខេត្តឡើងវិញ លើកលែងរាជធានីភ្នំពេញ និងក្រុងតាខ្មៅ
រាជរដ្ឋាភិបាលអនុញ្ញាតឱ្យបើកដំណើរការរមនីយដ្ឋានទេសចរណ៍នៅទូទាំងប្រទេស និងឱ្យធ្វើដំណើរឆ្លងខេត្តឡើងវិញ លើកលែងរាជធានីភ្នំពេញ និងក្រុងតាខ្មៅ
នាព្រឹកថ្ងៃអាទិត្យទី ២៥ ខែមេសា ឆ្នាំ២០២១ នេះ រាជរដ្ឋាភិបាលកម្ពុជាបានចេញសេចក្ដីសម្រេចមួយ ដែលបិទបញ្ចប់ការហាមឃាត់ការធ្វើដំណើរ និងការបញ្ចប់ការបិទរមនីយដ្ឋានទេសចរណ៍នៅទូទាំងប្រទេស ដែល ខ្លួនបានដាក់ចេញកាលពីថ្ងៃទី ៦ ខែមេសា និងនៅថ្ងៃទី ១៧ ខែមេសាកន្លងទៅ។
នៅក្នុងសេចក្ដីសម្រេចដដែលនេះបានបញ្ជាក់ថា សម្រាប់ការធ្វើដំណើរចេញចូល និងឆ្លងកាត់តាមភូមិសាស្ត្រនានាដែលត្រូវបានបិទខ្ទប់ ត្រូវអនុវត្តតាមសេចក្ដីសម្រេចរបស់រាជរដ្ឋាភិបាល ស្ដីពីការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្ដាល និងសេចក្ដីសម្រេចពាក់ព័ន្ធនានារបស់រដ្ឋបាលរាជធានីខេត្តដែលមានជាធរមាន។
ដោយឡែក នៅពេលសួរថា តើនឹងត្រូវបន្តបិទខ្ទប់ឬបើកឡើងវិញ សម្រាប់រាជធានីភ្នំពេញនិងក្រុងតាខ្មៅ លោក ឃួង ស្រេង អភិបាលរាជធានីភ្នំពេញ បានឱ្យដឹងតាមរយៈវិទ្យុបារាំងអន្តរជាតិ RFI នៅព្រឹកថ្ងៃអាទិត្យនេះថា អាជ្ញាធរក្រុងកំពុងរង់ចាំសេចក្តីសម្រេចពីក្រសួងសុខាភិបាល និងឧត្តមក្រុមប្រឹក្សាសេដ្ឋកិច្ចជាតិ ដែលជាអ្នកជំនាញជាមុនសិន ទើបរដ្ឋបាលរាជធានីភ្នំពេញជូនដំណឹងនៅពេលក្រោយ៕
