កម្ពុជាបានចុះហត្ថលេខាជាមួយក្រុមហ៊ុនជប៉ុន លើការសាងសង់ប្រព័ន្ធបង្ហូរទឹកកខ្វក់ក្នុងរាជធានីភ្នំពេញ
កម្ពុជាបានចុះហត្ថលេខាជាមួយក្រុមហ៊ុនជប៉ុន លើការសាងសង់ប្រព័ន្ធបង្ហូរទឹកកខ្វក់ក្នុងរាជធានីភ្នំពេញ
ឯកអគ្គរាជទូតនៃព្រះរាជាណាចក្រកម្ពុជាប្រចាំប្រទេសជប៉ុន លោក អ៊ឹង រចនា ក្នុងនាមមន្ទីរសាធារណការ និងដឹកជញ្ជូនរាជធានីភ្នំពេញ នៅថ្ងៃទី២០ ខែមេសា ឆ្នាំ២០២១ បានចុះហត្ថលេខាលើកិច្ចសន្យាសាងសង់គម្រោងអភិវឌ្ឍន៍ប្រព័ន្ធបង្ហូរទឹកកខ្វក់ក្នុងរាជធានីភ្នំពេញ ជាមួយក្រុមហ៊ុនជប៉ុន Kubota Metawater Joint venture នៅទីក្រុងតូក្យូ។
តាមរយៈបណ្តាញសង្គមហ្វេសប៊ុក Royal Embassy of Cambodia in Japan នៅថ្ងៃទី ២០ ខែមេសានេះ បានឲ្យដឹងថា ក្នុងនាមមន្ទីរសាធារណការ និងដឹកជញ្ជូនរាជធានីភ្នំពេញ លោកឯកអគ្គរាជទូតបានចូលរួមចុះហត្ថលេខាលើកិច្ចសន្យាសាងសង់គម្រោងអភិវឌ្ឍន៍ប្រព័ន្ធបង្ហូរទឹកកខ្វក់ក្នុងរាជធានីភ្នំពេញ ជាមួយនឹងក្រុមហ៊ុន Kubota Metawater Joint venture បន្ទាប់ពីក្រុមហ៊ុននេះ បានទទួលជោគជ័យក្នុងការដេញថ្លៃគម្រោងខាងលើនៅថ្ងៃទី ១២ ខែ មេសា ឆ្នាំ ២០២១។
ប្រធានមន្ទីរសាធារណការ និងដឹកជញ្ជូនរាជធានីភ្នំពេញ លោក សាំ ពិសិដ្ឋ បានឲ្យដឹងថា កាលពីថ្ងៃទី ១២ ខែ មេសា ឆ្នាំ ២០២១ នៅទីក្រុងតូក្យូប្រទេសជប៉ុន បានរៀបចំពិធីដាក់ឱ្យដេញថ្លៃនៃគម្រោងអភិវឌ្ឍន៍ប្រព័ន្ធទឹកកខ្វក់នៅរាជធានីភ្នំពេញ ដែលជាគម្រោងជំនួយឥតសំណង ហើយក្រុមហ៊ុន KUBOTA METAWATER JOINT VENTURE ជាអ្នកឈ្នះ។
លោកថ្លែងថា៖ «ក្រុមហ៊ុន KUBOTA METAWATER JOINT VENTURE បានទទួលជ័យជំនះលើការដាក់ឱ្យដេញថ្លៃគម្រោងសាងសង់រោងចក្រប្រព្រឹត្តិកម្មទឹកកខ្វក់នៅបឹងជើងឯក ដែលមានសមត្ថភាពចម្រោះទឹកកខ្វក់ ៥ ០០០ ម៉ែត្រគុប ក្នុង ១ ថ្ងៃ»។
លោក ឃួង ស្រេង អភិបាលរាជធានីភ្នំពេញធ្លាប់លើកឡើងថា តំបន់អភិវឌ្ឍន៍ភាគខាងត្បូងរាជធានីភ្នំពេញមានទំហំដី ៥២០ ហិកតា ដោយក្នុងនោះ ១៨១ ហិកតា ជាដីរបស់រដ្ឋ ដែលនឹងប្រើធ្វើអាងស្តុកទឹក អាងប្រព្រឹត្តិកម្មទឹកស្អាត និងហេដ្ឋារចនាសម្ព័ន្ធផ្សេងទៀត៕
