ខ្មែរប៉ុស្ដិ៍ Close

ជំងឺគេងមិនលក់ អាចបណ្តាលពីបញ្ហាទាំង ៥ នេះ

ដោយ៖ សន ប្រាថ្នា ​​ | ថ្ងៃអង្គារ ទី១ ខែឧសភា ឆ្នាំ២០១៨ ព័ត៌មានទូទៅ 6324
ជំងឺគេងមិនលក់ អាចបណ្តាលពីបញ្ហាទាំង ៥ នេះ young beautiful hispanic woman at home bedroom lying in bed late at night trying to sleep suffering insomnia sleeping disorder or scared on nightmares looking sad worried and stressed

ជំងឺគេងមិនលក់ គឺជាបញ្ហាទូទៅបំផុតទាក់ទងនឹងការគេងដែលជះឥទ្ធិពលអវិជ្ជមានដល់សមត្ថភាពក្នុងការគេងលក់ ឬគេងបានស្កប់។ មានបញ្ហាសុខភាពជាច្រើនដែលបណ្ដាលឲ្យកើតមានការគេងមិនលក់ ហើយជារឿយៗ គឺដោយសារតែរោគសញ្ញានៃបញ្ហាទាំងនោះ។ លើសពីនេះទៅទៀត ថ្នាំសម្រាប់ព្យាបាលបញ្ហាសុខភាពមួយចំនួនក៏ផ្សាភ្ជាប់ទៅនឹងជំងឺគេងមិនលក់ផងដែរ។ អត្ថបទខាងក្រោមនឹងបង្ហាញឲ្យដឹងពីបញ្ហាសុខភាពទូទៅបំផុតដែលបណ្ដាលឲ្យគេងមិនលក់ រួមជាមួយនឹងដំណោះស្រាយ ៖

១. ជំងឺទឹកនោមផ្អែម ៖ គឺជាបញ្ហាសុខភាពមួយដែលអាចបណ្ដាលឲ្យកើតមានជំងឺគេងមិនលក់ ដោយសារតែរោគសញ្ញាផ្សេងៗនៃជំងឺនេះ។ ជាក់ស្ដែងដូចជា អ្នកកើតជំងឺទឹកនោមផ្អែម គឺឈឺនោមញឹក ដែលជាហេតុអាចធ្វើឲ្យភ្ញាក់ដឹងខ្លួនជាច្រើនដងនៅពេលយប់ពិបាកនឹងគេងលក់បានស្កប់។ ដូច្នេះចូរព្យាយាមនោមឲ្យហើយមុនពេលចូលគេង ក៏ព្រោះប្រសិនបើចូលគេងទាំងឈឺនោមតិចៗនោះ អ្នកនឹងត្រូវភ្ញាក់ដឹងខ្លួនកណ្ដាលយប់ ឬពេលកំពុងគេងលក់ស្រួល ដោយសារតែប្លោកនោមមិនអាចទ្រទ្រង់ទឹកនោមបានទៀត ឬឈឺនោមខ្លាំង។ ដើម្បីជៀសវាងបញ្ហានេះកើតឡើង អ្នកមិនគួរទទួលទានទឹក ឬភេសជ្ជៈដទៃទៀតនៅរយៈពេល ២ ឬ ៣ ម៉ោងមុនចូលគេងឡើយ។

២. ឈឺចាប់រ៉ាំរ៉ៃ ៖ ប្រភេទនៃជំងឺផ្សេងទៀតដែលបណ្តាលអោយអ្នកគេងមិនលក់ ដោយការភ្ញាក់ដឹងខ្លួននៅពាក់កណ្តាលយប់នោះ គឺអាការៈនានាដែលបណ្តាលឲ្យកើតមានបញ្ហាឈឺចាប់រ៉ាំរ៉ៃ។ រួមបញ្ចូលទាំង ជំងឺរលាកសន្លាក់ ជំងឺឈឺសាច់ដុំ និងសសៃពួរ ជាដើម។ ការឈឺចាប់រ៉ាំរ៉ៃ គឺមិនត្រឹមតែធ្វើឲ្យអ្នកពិបាកក្នុងការគេងលក់ប៉ុណ្ណោះទេ ប៉ុន្តែថែមទាំងបណ្ដាលឲ្យភ្ញាក់ដឹងខ្លួនកណ្ដាលយប់នៅពេលទទួលរងអារម្មណ៍ឈឺចាប់ផងដែរ។ វិធីដ៏ល្អបំផុតដើម្បីបំបាត់អាការៈឈឺចាប់នោះ គឺអ្នកត្រូវទៅពិនិត្យព្យាបាលជាមួយគ្រូពេទ្យជំនាញ ឬប្រើប្រាស់ថ្នាំបំបាត់ការឈឺចាប់ដែលមានវេជ្ជបញ្ជាត្រឹមត្រូវ។

៣. ការច្រាលឡើងនៃអាស៊ីតក្រពះ ៖ អាការៈនៃការច្រាលអាស៊ីតក្រពះ ក៏ជាកត្តាដែលបណ្ដាលឲ្យអ្នកភ្ញាក់ដឹងខ្លួនកណ្ដាលយប់ផងដែរ ដោយសារតែការឈឺចាប់ ឬក្រហាយទ្រូង។ ពេលវេលាដែលរាងកាយបង្កើតជាតិអាស៊ីត គឺចន្លោះពីម៉ោង ១០ យប់ ដល់ ២ ភ្លឺ។ នេះមានន័យថា ប្រសិនបើអ្នកទទួលទានអាហារគៀកនឹងម៉ោង ឬពេលចូលគេងពេក អ្នកនឹងជួបប្រទះបញ្ហាច្រាលអាស៊ីតក្រពះ ខណៈពេលកំពុងគេងជាមិនខាន។ អារម្មណ៍ក្រហាយទ្រូងនឹងបណ្ដាលឲ្យអ្នកគេងមិនលក់ រួមផ្សំជាមួយនឹងការឈឺចាប់ខ្លាំងទៀតនោះ អ្នកនឹងភ្ញាក់ដឹងខ្លួន។ ដូច្នេះដើម្បីជៀសវាងបញ្ហានេះកើតឡើង ចូរជៀសវាងការទទួលទានអាហារផ្សេងៗច្រើននៅខណៈពេលជិតចូលគេង។

៤. ថ្នាំពេទ្យ ឬឱសថ ៖ រោគគេងមិនលក់អាចកើតមាន ដោយសារតែការប្រើប្រាស់ថ្នាំមួយចំនួនដូចជា ថ្នាំ alpha-blockers (បន្ថយសម្ពាធឈាម) ថ្នាំ beta-blockers (ព្យាបាលជំងឺលើសឈាម និងបញ្ហាបេះដូង) ថ្នាំ corticosteroids (ព្យាបាលជំងឺហឺត) ថ្នាំ SSRI antidepressants (ព្យាបាលជំងឺធ្លាក់ទឹកចិត្ត) ថ្នាំលើសឈាម ACE inhibitors ថ្នាំ angiotensin II-receptor blockers (បញ្ចុះសម្ពាធឈាម) ថ្នាំ cholinesterase inhibitors (ព្យាបាលជំងឺភ្លេចភ្លាំង ឬវង្វេងវង្វាន់) ថ្នាំ non-sedating antihistamines  ថ្នាំ glucosamine និង chondroitin (ព្យាបាលជំងឺសន្លាក់) និងថ្នាំ statins (បន្ថយកម្រិតកូឡេស្តេរ៉ូល)។ ប្រសិនបើអ្នកទទួលទាន ឬប្រើប្រាស់ថ្នាំប្រភេទដូចដែលបានរៀបរាប់ ហើយជួបប្រទះនូវបញ្ហាគេងមិនលក់ ចូរពិភាក្សាជាមួយនឹងគ្រូពេទ្យជំនាញអំពីដំណោះស្រាយ ដោយគ្រូពេទ្យ ឬវេជ្ជបណ្ឌិតអាចនឹងធ្វើការផ្លាស់ប្ដូរថ្នាំប្រភេទផ្សេង។

៥.បញ្ហាជំងឺផ្លូវចិត្ត ៖ បញ្ហាផ្លូវចិត្ត គឺជាមូលហេតុទូទៅបំផុតមួយដែលជាញឹកញយបណ្ដាលឲ្យគេងមិនលក់។ ហើយការថប់បារម្ភ និងធ្លាក់ទឹកចិត្ត គឺជាអាការៈចម្បងបំផុត៕

 

ប្រភព៖ Dailyhealthpost

អត្ថបទទាក់ទង