ក្រសួងសុខាភិបាល កំពុងរៀបចំបញ្ជូនវ៉ាក់សាំងកូវីដ-១៩ ទៅបណ្តាខេត្តជាប់ព្រំដែន ដើម្បីចាក់ជូនប្រជាពលរដ្ឋតាមការស្ម័គ្រចិត្ត
ក្រសួងសុខាភិបាល កំពុងរៀបចំបញ្ជូនវ៉ាក់សាំងកូវីដ-១៩ ទៅបណ្តាខេត្តជាប់ព្រំដែន ដើម្បីចាក់ជូនប្រជាពលរដ្ឋតាមការស្ម័គ្រចិត្ត
ថ្លែងក្នុងសន្និសីទសារព័ត៌មាន នាព្រឹកថ្ងៃទី១៩ ខែកុម្ភៈ ឆ្នាំ២០២១ លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានឲ្យដឹងថា ពេលនេះក្រសួងសុខាភិបាលបាននិងកំពុងរៀបចំក្នុងការបញ្ជូនវ៉ាក់សាំងការពារជំងឺកូវីដ-១៩ ទៅកាន់បណ្តាខេត្តនានានៅតាម បណ្តាខេត្តនៅជាប់ព្រំដែន ដើម្បីចាក់ជូនប្រជាពលរដ្ឋដែលស្ម័គ្រចិត្ត បន្ទាប់ពីធ្វើការបណ្តុះបណ្តាលក្រុមគ្រួពេទ្យបញ្ចប់រួចរាល់ហើយនោះ។
លោកស្រី បានបញ្ជាក់ថា ខេត្តដែលបានបណ្តុះបណ្តាលគ្រូពេទ្យកាលពីថ្ងៃទី១៨ ខែកុម្ភៈ កន្លងមកនេះរួចហើយ អីចឹងពេលគាត់ត្រឡប់ទៅវិញគាត់ត្រូវរៀបចំដើម្បីទទួលវ៉ាក់សាំង ហើយយើងនឹងរៀបចំក្នុងការបញ្ជូនវ៉ាក់សាំងនេះជូនទៅដល់ក្រុមគ្រូពេទ្យ ដែលបានបណ្តុះបណ្តាលរួចហើយ ជាពិសេស ខេត្តនៅតាមជាប់ព្រំដែនរួមាន ខេត្តបាត់ដំបង បន្ទាយមានជ័យ រាជធានីភ្នំពេញ ឧត្តរមានជ័យ ប៉ៃលិន កោះកុង ព្រះសីហនុ ស្វាយរៀង ពោធិ៍សាត់ កែប និងមន្ទីពេទ្យព្រះកុសុមៈ ក៏ដូចជាមជ្ឈមណ្ឌលជាតិគាំពារកុមារ និងទាករ”។
លោកស្រីបានបន្ដថា នៅថ្ងៃទី១៩កុម្ភៈនេះ ក៏មានគ្រុមគ្រូពេទ្យមួយចំនួនដែលមកពីបណ្តាខេត្តដូចជា ខេត្តក្រចេះ មណ្ឌលគិរី រតនគិរី ព្រះវិហារ ស្ទឹងត្រែង កំពង់ស្ពឺ កំពង់ឆ្នាំង និងព្រៃវែង ដែលនឹងធ្វើការបញ្ជូនវ៉ាក់សាំងជាបន្តបន្ទាប់ទៀត។
លោកស្រីបានបន្ថែមថា “នៅពេលគាត់រៀនចប់ យើងនឹងរៀបចំបញ្ជូនវ៉ាក់សាំងទៅបន្តបន្ទាប់តាមនីតិវិធីរបស់យើងឱ្យបានត្រឹមត្រូវ ជាពិសេសនោះរក្សាទុកវ៉ាក់សាំង គឺទុកក្នុងប្រព័ន្ធត្រជាក់ឱ្យបានត្រឹមត្រូវបំផុតដើម្បីចៀសវាងការខូចគុណភាពវ៉ាក់សាំង”។
លោកស្រី បានឱ្យដឹងទៀតថា ការចាក់វ៉ាក់សាំងជំហានដំបូងនេះគឺយើងចាក់វ៉ាក់សាំងដែលទទួលបានពីប្រទេសចិន (Sinopharm) ក្នុងកម្រិត៣០០ពាន់ដូស ដោយគ្រោងចាក់លើមនុស្សចំនួន ១៤៩ ៥០០នាក់។ លោកស្រីបានពន្យល់ផងដែរថា ការចាក់វ៉ាក់សាំងនេះ ដោយសារត្រូវរក្សាទុកចំនួនពី១៥ ទៅ២០ភាគរយ នៃការខ្វះខាតដូចជាធ្លាក់បែក បូមលើសជាដើម។ ទន្ទឹមនេះ ចំពោះការចាក់វ៉ាក់សាំងនេះគឺអាស្រ័យលើកការស្ម័គ្រចិត្ត ឬលទ្ធភាពរបស់បងប្អូនប្រជាពលរដ្ឋ ដែលត្រូវធ្វើដំណើរ ឬក៏ចូលរួមក្នុងការចាក់វ៉ាក់សាំងកូវីដ-១៩។
ជាមួយគ្នានេះដែរ លោកស្រី ឱ វណ្ណឌីន ក៏បានអះអាងថា ក្រសួងចង់ឱ្យមានការចូលរួមចាក់វ៉ាក់សាំងពីប្រជាពលរដ្ឋឱ្យបានលឿន ពីព្រោះថានៅពេលបន្តិចទៀតកម្ពុជា នឹងទទទួលបានវ៉ាក់សាំងពីមជ្ឈមណ្ឌលកូវ៉ាក់។ ដូច្នេះនៅពេលចប់ការចាក់វ៉ាក់សាំងរបស់ចិនទៅ យើងនឹងចាប់ផ្តើមចាក់វ៉ាក់សាំងកូវ៉ាក់ ជាបន្តទៀត៕
