ចូលឆ្នាំចិន-វៀតណាម ៣ថ្ងៃ ៖ ខេត្តមណ្ឌលគិរីទទួលភ្ញៀវទេសចរណ៍ ១២,៦៨៩ នាក់
ចូលឆ្នាំចិន-វៀតណាម ៣ថ្ងៃ ៖ ខេត្តមណ្ឌលគិរីទទួលភ្ញៀវទេសចរណ៍ ១២,៦៨៩ នាក់ក្នុងរយៈពេល៣ថ្ងៃ ចាប់ពីថ្ងៃទី១២ ដល់ថ្ងៃទី១៤ ខែកុម្ភៈ ឆ្នាំ២០២១ នៃពិធីបុណ្យចូលឆ្នាំចិន-វៀតណាមមានភ្ញៀវទេសចរជាតិ-អន្តរជាតិសរុបចំនួន១២ ៦៨៩នាក់ ក្នុងនោះភ្ញៀវអន្តរជាតិមានចំនួន៦៤នាក់ ភ្ញៀវជាតិ ១២ ៦២៥នាក់ គឺមានការធ្លាក់ចុះ២៩,០៧ភាគរយ ភ្ញៀវជាតិធ្លាក់ចុះ២៨,២៣ភាគរយ ភ្ញៀវអន្តរជាតិធ្លាក់ចុះ៧៨,៦០ភាគរយ បើប្រៀបធៀបនឹងបុណ្យចូលឆ្នាំចិន-វៀតណាមឆ្នាំ២០២០កន្លងមក មានចំនួន១៧,៨៩០នាក់។ នេះបើតាមប្រធានមន្ទីរទេសចរណ៍ខេត្ដរតនគិរីបានបញ្ជាក់ឱ្យដឹងនៅរសៀលថ្ងៃទី១៤ ខែកុម្ភៈឆ្នាំ២០២១នេះ។
លោក ង៉ែត ពិទូ ប្រធានមន្ទីរទេសចរណ៍ខេត្ដរតនគិរីបានគូសបញ្ជាក់ថាគិតត្រឹមល្ងាចថ្ងៃទី១៤ ខែកុម្ភៈ ឆ្នាំ២០២១នេះកត្តាធំបំផុតដែលនាំឱ្យភ្ញៀវទេសចរមានការធ្លាក់ចុះបណ្តាមកពីប្រជាពលរដ្ឋមានការព្រួយបារម្ភពីជំងឺកូវីដ-១៩ ជាពិសេសច្រកទ្វារអន្តរជាតិនានាត្រូវបានបិទការចេញ-ចូលទាំងស្រុងដើម្បីបង្កាទប់ស្កាត់ជំងឺកូវីដ-១៩ ផងដែរ។
លោកបន្តថា ភ្ញៀវបានមកទស្សនាកម្សាន្តតាមរមណីយដ្ឋាននៅក្នុងខេត្តរតនគិរីមានចំនួន១៤កន្លែងសុទ្ធសឹងជារមណីយដ្ឋានធម្មជាតិ។ ចំពោះរមណីយដ្ឋានដែលពេញនិយម និងមានភ្ញៀវទេសចរទៅលេងកម្សាន្តយ៉ាងច្រើននោះគឺបឹងយក្សឡោម ក្នុងក្រុងបានលុង រមណីយដ្ឋានទឹកធ្លាក់អូរសៀងលែ, មណីយដ្ឋានបឹងលំកុដ្ឋិ ក្នុងស្រុកលំផាត់ ក្រៅពីរមណីយដ្ឋានធម្មជាតិទាំងបីកន្លែងនេះ ក៏មានរមណីដ្ឋានដទៃទៀតដែលមានភ្ញៀវទេសចរជាតិ និងអន្តរជាតិ ទៅលេងកម្សាន្តយ៉ាងច្រើនកុះករ ។
លោកបានលើកឡើងថា ក្នុងរយៈពេល៣ថ្ងៃនេះ គ្រប់រមណីយដ្ឋានដែល ភ្ញៀវបានទៅលេងកម្សាន្ត សង្កេតឃើញថាភ្ញៀវទេសចរទាំងអស់បានចូលរួមថែរក្សាអនាម័យបរិស្ថានបានល្អពោលគឺ ក្រោយហូបចុករួចពួកគាត់បានវេចខ្ចប់សំរាមទុកដាក់បានត្រឹមត្រូវ។
ជាមួយគ្នានេះ ភ្ញៀវមានស្មារតី ម្ចាស់ការក្នុងការចូលរួមការពារទប់ស្កាត់ជំងឺកូវីដ-១៩ តាមរយៈការចូលខ្លួនឱ្យបាញ់កម្ដៅការលាងសម្អាតដៃនៅតាមឡាបូសាធារណៈដែលបានរៀបចំជូននៅតាមរមណីយដ្ឋាននានា ការពាក់ម៉ាស់ និងការរក្សាគម្លាតសង្គមជាដើម។
លោកប្រធានមន្ទីរបានថ្លែងអំណរគុណយ៉ាងជ្រាលជ្រៅចំពោះភ្ញៀវទេសចរជាតិ-អន្តរជាតិ ដែលបានមកលេងកម្សាន្តក្នុងទឹកដីខេត្តរតនគិរី ជាពិសេសម្ចាស់ផ្ទះសំណាក់ សណ្ឋាគារ និងម្ចាស់សេវាកម្មម្ហូបអាហារទាំងអស់ដែលបានចូលរួមជាមួយអាជ្ញាធរខេត្តក្នុងការរឹតបន្តឹងវិធានការអនាម័យតាមការណែនាំរបស់ក្រសួងសុខាភិបាល ដើម្បីបង្ការកុំឱ្យមានការរាតត្បាតជំងឺកូវីដ-១៩។
ជាមួយគ្នានេះ លោកប្រធានមន្ទីរក៏សូមថ្លែងអំណរគុណផងដែរចំពោះសមត្ថកិច្ចពាក់ព័ន្ធដែលបានបំពេញតួនាទីភារកិច្ចចូលរួមថែរក្សាការពារសន្តិសុខ សណ្តាប់ធ្នាប់សាធារណៈ ទាំងយប់ទាំងថ្ងៃជូនភ្ញៀវទេសចរជាតិ-អន្តរជាតិបានយ៉ាងល្អប្រសើរ៕ AKP
ឭ 
