អ្នកនាំពាក្យក្រសួងសុខាភិបាល៖ ក្នុងអំឡុងពេលឈប់សម្រាកសប្តាហ៍មុន ពុំមានសញ្ញានៃការឆ្លងរាលដាលនៃជម្ងឺកូវីដ១៩ នៅក្នុងសហគមន៍នោះទេ
អ្នកនាំពាក្យក្រសួងសុខាភិបាល៖ ក្នុងអំឡុងពេលឈប់សម្រាកសប្តាហ៍មុន ពុំមានសញ្ញានៃការឆ្លងរាលដាលនៃជម្ងឺកូវីដ១៩ នៅក្នុងសហគមន៍នោះទេ
ក្នុងអំឡុងពេលឈប់សម្រាករយៈពេលវែង កាលពីសប្តាហ៍កន្លងមកនេះ ដែលជាការឈប់សងថ្ងៃបុណ្យចូលឆ្នាំ ចាប់ពីថ្ងៃទី១៧-២១ ខែសីហា ឆ្នាំ២០២០ គឺពុំមានសញ្ញានៃវីរុសកូវីដ១៩ នៅក្នុងសហគមន៍កម្ពុជាឡើយ។ នេះបើតាមការបញ្ជាក់របស់លោកស្រី ឱ វណ្ណឌីន អ្នកនាំពាក្យក្រសួងសុខាភិបាល។
លោកស្រី ឱ វណ្ណឌីន បានបញ្ជាក់ថា «តាមការសង្កេតតាមដានយ៉ាងយកចិត្តទុកដាក់ពីប្រព័ន្ធសុខាភិបាលរបស់យើង នៅតាមបណ្តារាជធានី-ខេត្ត ជាពិសេសនៅតាមរមណីយដ្ឋានទេសចរណ៍នានា យើងសង្កេតឃើញថា មិនទាន់រកឃើញហេតុការណ៍ចម្លងវីរុសកូវីដ១៩ នៅក្នុងសហគមន៍យើងនៅឡើយទេ។ នេះជារឿងល្អ ប៉ុន្តែទោះជាយ៉ាងនេះក្តី ខ្ញុំសូមអំពាវនាវឱ្យបងប្អូនប្រជាពលរដ្ឋ បន្តការប្រុងប្រយ័ត្ន ឱ្យបានខ្ពស់ និងជាប់ជានិច្ច ព្រមទាំងអនុវត្តវិធានការការពាររបស់ក្រសួងសុខាភិបាល ដោយសារតែវីរុសកូវីដ១៩នេះ មិនបានចេញឆ្ងាយពីប្រទេសកម្ពុជានៅឡើយទេ»។
លោកស្រី ឱ វណ្ណឌីន ក៏បានថ្លែងអំណរគុណដល់បងប្អូនប្រជាពលរដ្ឋខ្មែរទាំងអស់ ដែលបានចូលរួមអនុវត្តវិធានការការពារខ្លួន រួមទាំងអាជ្ញាធរដែនដី កងកម្លាំងប្រដាប់អាវុធ ជាពិសេសគឺក្រុមគ្រូពេទ្យទាំងអស់ ដែលពុំបានឈប់សម្រាក ហើយត្រូវបំពេញការងារទៅតាមគោលដៅ ដើម្បីចាំជួយសម្របសម្រួល ណែនាំ និងអនុវត្តបទបញ្ជានានា ការពារ និងទប់ស្កាត់ការឆ្លងរីករាលដាលជាយថាហេតុណាមួយ នៃវីរុសកូវីដ១៩ នៅក្នុងសហគមន៍។
ក្រសួងសុខាភិបាល បានប្រកាសថា គិតមកដល់ព្រឹកថ្ងៃទី២៤ ខែសីហា ឆ្នាំ២០២០ នៅទូទាំងប្រទេសកម្ពុជា រកឃើញអ្នកឆ្លងជំងឺកូវីដ១៩ សរុបចំនួន ២៧៣នាក់។ ក្នុងនោះ អ្នកព្យាបាលជាសះស្បើយ មានចំនួន ២៦៣នាក់ និងកំពុងសម្រាកព្យាបាលនៅមន្ទីរពេទ្យ មានចំនួន ១០នាក់៕
