អាជ្ញាធរខេត្តកំពង់ឆ្នាំងដំឡើងឧបករណ៍ការពាររន្ទះនៅរមណីយដ្ឋានទេសចរណ៍សំខាន់ៗចំនួន៨កន្លែង
អាជ្ញាធរខេត្តកំពង់ឆ្នាំងដំឡើងឧបករណ៍ការពាររន្ទះនៅរមណីយដ្ឋានទេសចរណ៍សំខាន់ៗចំនួន៨កន្លែងអាជ្ញាធរខេត្តកំពង់ឆ្នាំងដំឡើងឧបករណ៍ការពាររន្ទះនៅតាមរមណីយដ្ឋានទេសចរណ៍សំខាន់ៗចំនួន៨កន្លែងដើម្បីធានាសុវត្ថិភាពជូនប្រជាពលរដ្ឋ និងភ្ញៀវទេសចរក្នុងឱកាសថ្ងៃឈប់សំរាកខាងមុខនេះ ។
លោក សេង សាលី ប្រធានមន្ទីរទេសចរណ៍ខេត្តកំពង់ឆ្នាំងបានមានប្រសាសន៍ថា ការដំឡើងឧបករណ៍ការពាររន្ទះនេះ ក្នុងគោលបំណងការពារសុវត្ថិភាពជូនភ្ញៀវទេសចរ និងប្រជាពលរដ្ឋក្នុងតំបន់នោះ ផ្ទាល់ ដោយសារខែនេះជារដូវវស្សាមានភ្លៀងធ្លាក់ញឹកញាប់ផង ជាពិសេសស្របពេលដែលរាជរដ្ឋាភិបាលបានអនុញ្ញាតផ្តល់ថ្ងៃឈប់សម្រាកសងថ្ងៃចូលឆ្នាំប្រពៃណីជាតិខ្មែរក្នុងចន្លោះរដូវវស្សាផង ដែលអាចបង្កឲ្យមានផ្គររន្ទះកើតឡើងជាយថាហេតុ ។
លោកបន្តថា ដោយមានការយកចិត្តទុកដាក់ គាំទ្រពីឯកឧត្តមអភិបាលខេត្ត និងអ្នកពាក់ព័ន្ធ ធ្វើឲ្យក្រុមការងារដំឡើងបានចំនួន៤ទីតាំង ខណៈដែលផែនការត្រូវដាក់ឧបករណ៍នេះមានចំនួន៨ទីតាំង ។
សំឡេង ៖ « តាមការយកចិត្តទុកដាក់របស់ឯកឧត្តមអភិបាលខេត្ត ក៏ដូចជាថ្នាក់ដឹកនាំ គឺដើម្បីរក្សាសុវត្ថិភាពជូនភ្ញៀវទេសចរណ៍ ដែលមកកំសាន្តក្នុងតំបន់ទេសចរណ៍នៅក្នុងខេត្តកំពង់ឆ្នាំងឲ្យចៀផុតពីគ្រោះថ្នាក់ធម្មជាតិផ្សេងៗជាពិសេសរន្ទះនោះ គឺលោកបានដាក់ផែនការឲ្យយើងដំឡើងនេះ ដើម្បីការពារសុវត្ថិភាពភ្ញៀវទេសចរ ដែលមកកម្សាន្តក្នុងរមណីយដ្ឋានទាំងអស់ក្នុងខេត្ត» ។
សូមបញ្ជាក់ថា តំបន់រមណីយដ្ឋានសំខាន់ៗក្នុងខេត្តំពង់ឆ្នាំងមាន៨ទីតាំងដូចជា រមណីយដ្ឋានភ្នំព្រះធាតុ រមណីយដ្ឋានអាចាំង រមណីយដ្ឋាន២០ឧសភា រមណីយដ្ឋានទំនប់គង្គា រមណីយដ្ឋានGreen Farm តំបន់ទឹកធ្លាក់ស្រែអំពិល ទឹកធ្លាក់ថ្មក្រាល និងតំបន់ទឹកធ្លាក់អន្លង់ស្វាយ ៕
