កម្ពុជា-ស្វីស ប្តេជ្ញារួមគ្នាអភិវឌ្ឍន៍ទៅលើប្រព័ន្ធបណ្តុះបណ្តាល បច្ចេកទេស និងវិជ្ជាជីវៈ ក្នុងដំណាក់កាលទី២

កម្ពុជា-ស្វីស ប្តេជ្ញារួមគ្នាអភិវឌ្ឍន៍ទៅលើប្រព័ន្ធបណ្តុះបណ្តាល បច្ចេកទេស និងវិជ្ជាជីវៈ ក្នុងដំណាក់កាលទី២

ក្រសួងការងារ និងបណ្តុះបណ្តាលវិជ្ជាជីវៈ ព្រមទាំងទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការ (SDC) បានប្តេជ្ញារួមគ្នាអភិវឌ្ឍន៍ទៅលើប្រព័ន្ធបណ្តុះបណ្តាល បច្ចេកទេស និងវិជ្ជាជីវៈ (TVET) ក្នុងដំណាក់កាលទី២ ស្របពេលដែលគម្រោងទី១ បានរងផលប៉ះពាល់ពីជំងឺផ្លូវដង្ហើមកូវីដ-១៩។

គម្រោងទី២នេះ ជាការបណ្តុះបណ្តាលជំនាញដល់យុវជនក្រីក្រនៅក្នុងសហគមន៍ នៃខេត្តគោលដៅចំនួន៥ នៅភាគឦសាន្តប្រទេសកម្ពុជា រួមមានខេត្តព្រះវិហារ ស្ទឹងត្រែង ក្រចេះ មណ្ឌលគិរី និងរតនគិរី។

ការលើកឡើងដូច្នេះធ្វើឡើងក្នុងជំនួបពិភាក្សាការងាររវាងលោក អ៉ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈជាមួយ គណៈប្រតិភូនៃទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការ (SDC) ដឹកនាំដោយលោកស្រី Nadia Ottiger នាយិការង ទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការប្រចាំកម្ពុជា នៅទីស្តីការក្រសួងការងារ ព្រឹកថ្ងៃទី១០ ខែមិថុនា ឆ្នាំ២០២០។

លោក អ៉ិត សំហេង បានសម្តែងនូវអំណរគុណយ៉ាងជ្រៀលជ្រៅចំពោះរដ្ឋាភិបាលស្វីស ដែលតែងតែគាំទ្រនូវគ្រប់សកម្មភាពក្នុងការលើកកម្ពស់ធនធានមនុស្សក្នុងវិស័យការងារ និងបណ្តុះបណ្តាលវិជ្ជាជីវៈនៅកម្ពុជា។

លោកលើកឡើងថា គម្រោងអភិវឌ្ឍជំនាញនេះ ជាគំនិតផ្តួចផ្តើមដ៏ល្អប្រសើរមួយក្នុងការធ្វើសមាហរណកម្មជំនាញនៅប៉ែកឦសានប្រទេស ក្នុងការកសាងធនធានមនុស្ស សម្រាប់កម្ពុជាលើវិស័យមួយនេះ។

លោកបញ្ជាក់ថា គោលដៅនៃគម្រោងនេះគឺ ទាក់ទាញយុវជនក្រីក្រក្នុងសហគមន៍ឱ្យចាប់អារម្មណ៍ទទួលយកការបណ្តុះបណ្តាលជំនាញ ដើម្បីបង្កើនធនធានមនុស្ស ក៏ដូចជាបង្កើនប្រាក់ចំណូលសម្រាប់ប្រជាជនកម្ពុជាផងដែរ។

លោកស្រី Nadia Ottiger បានលើកឡើងថា គម្រោងទី២នេះ នឹងធ្វើឱ្យប្រសើរឡើង ទាំងធនធានមនុស្ស និងជីវភាពរបស់ប្រជាពលរដ្ឋ ដែលកំពុងរស់នៅក្នុងសហគមន៍នៃខេត្តទាំង៥ ភាគឦសាន្តប្រទេសកម្ពុជា តាមរយៈទទួលបានជំនាញ និងបង្កើនប្រាក់ចំណូល សម្រាប់ទ្រទ្រង់ជីវភាពបានល្អប្រសើរ។

លោកស្រីបញ្ជាក់ថា រាល់សកម្មភាពគម្រោងទាំងមូលត្រូវបានគាំទ្រយ៉ាងជិតស្និតពីក្រសួងការងារ និងបណ្តុះបណ្តាលវិជ្ជាជីវៈ ក៏ដូចជាដៃគូនានាទៀត ដើម្បីអភិវឌ្ឍន៍ជំនាញ កាត់បន្ថយការធ្វើទេសន្តប្រវេសន៍ ទន្ទឹមនេះកិច្ចដំណើរការគម្រោង គឺស្របតាមយន្តការ ក៏ដូចជាកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ហើយក៏ជាការឆ្លើយតបទៅនិងតម្រូវការទីផ្សារការងារ និងអ្វីដែលនិយោជកចង់បាននាពេលបច្ចុប្បន្ននេះផងដែរ។

គួរបញ្ជាក់ថា ដំណាក់កាលទី២របស់គម្រោងមួយនេះ ត្រូវចាប់ផ្តើមអនុវត្តចាប់ពីថ្ងៃទី០១ ខែកក្កដា ឆ្នាំ២០២០ រហូតដល់ ខែមិថុនា ឆ្នាំ២០២៤ ដែលមានថវិកាសរុបចំនួនប្រមាណ៩លានដុល្លារអាមេរិក។ ចំពោះលទ្ធផលនៃគម្រោងនឹងទទួលបាន ១.នូវប្រព័ន្ធ TVET កម្ពុជាមានប្រសិទ្ធភាពជាងមុន នៅតាមខេត្តគោលដៅ ក្នុងតំបន់ និងសហគ្រាស និង ២.យុវជន បុរស ស្ត្រី និងកម្មករ ដែលមានជំនាញទាបបានបង្កើនលទ្ធភាពទទួលបានការងារ៕