ក្រសួងកសិកម្ម៖ កម្ពុជា ទទួលទានបន្លែប្រមាណជាង ៥៧០តោន ក្នុងមួយថ្ងៃ
ក្រសួងកសិកម្ម៖ កម្ពុជា ទទួលទានបន្លែប្រមាណជាង ៥៧០តោន ក្នុងមួយថ្ងៃ
បរិមាណនៃការទទួលទានបន្លែរបស់ប្រជាពលរដ្ឋកម្ពុជាមានកម្រិតខ្ពស់ ខណៈដែលរាជរដ្ឋាភិបាលបានជំរុញឱ្យបង្កើនផលិតកម្មបន្លែគ្មានជាតិគីមី ដើម្បីផ្គត់ផ្គង់តម្រូវការក្នុងស្រុក និងកាត់បន្ថយការនាំចូល។
បើតាមតួលេខពីក្រសួងកសិកម្ម រុក្ខាប្រមាញ់ និងនេសាទ បានបង្ហាញថា ប្រជាពលរដ្ឋកម្ពុជាទទួលទានបន្លែចំនួន ៥៧៣តោន ក្នុងមួយថ្ងៃ ដែលក្នុងនោះ ៤០០ តោនត្រូវបានដាំដុះក្នុងស្រុក ក្រៅពីនេះគឺនាំចូលពីបរទេស ដូចជាវៀតណាម ថៃ និងចិន ជាដើម។ ជាមួយគ្នានេះ រាជរដ្ឋាភិបាលបាន និងកំពុងជំរុញផលិតកម្មក្នុងស្រុក ដូចជាការដាំបន្លែ ការចិញ្ចឹមសត្វ និងនេសាទដើម្បីផ្គត់ផ្គង់តម្រូវការក្នុងស្រុក និងបម្រើភ្ញៀវទេសចរបរទេស។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា ក្រសួងបាននិងកំពុងធ្វើការលើកកម្ពស់ផលិតកម្មក្នុងស្រុកដើម្បីឆ្លើយតបទៅនឹងតម្រូវការក្នុងស្រុក។ លោកបានបញ្ជាក់ថា «យើងបាន និងកំពុងជំរុញផលិតកម្មបន្លែ និងសាច់ ដើម្បីបង្កើនការផ្គត់ផ្គង់ទីផ្សារ។ យើងរំពឹងថាផលិតកម្មក្នុងស្រុករបស់យើងនឹងកើនឡើង ហើយអាចឆ្លើយតបនឹងតម្រូវការទីផ្សារក្នុងស្រុកបាន” ។
សូមបញ្ជាក់ផងដែរថា កាលពីពេលថ្មីៗនេះ លោកនាយករដ្ឋមន្ត្រី ហ៊ុន សែន បានអំពាវនាវឱ្យមានការបង្កើនផលិតកម្មបន្លែសត្វគ្មានជាតិគីមីដើម្បីកាត់បន្ថយការនាំចូល៕
