ឥណ្ឌាដែលមានប្រជាជន ជាង ១៣០០លាននាក់ចាប់ផ្តើមបិទទីក្រុង ដោយសារ កូវីដ-១៩
ប្រជាជនឥណ្ឌាសម្រុកគ្នាឡើងរថភ្លើង បន្ទាប់ពីរដ្ឋាភិបាលប្រកាសបិទទីក្រុងញូវដេលី ដោយសារកូវីដ ១៩ REUTERS - PRASHANT WAYDANDE
រដ្ឋ និងទីក្រុងធំៗរបស់ឥណ្ឌាបានបិទព្រំដែន ចាប់ពីព្រឹកថ្ងៃចន្ទ ទី ២៣មីនា ចំណែកប្រជាជនត្រូវបានអំពាវនាវឲ្យស្ថិតនៅក្នុងផ្ទះ ក្នុងក្របខ័ណ្ឌ នៃយុទ្ធនាការរបស់រដ្ឋាភិបាល ដើម្បីទប់ស្កាត់ការឆ្លងរីករាលដាល កូវីដ ១៩។ វិធានការបិទទីក្រុង និងរដ្ឋ នៅទូទាំងប្រទេស ត្រូវបាននាយករដ្ឋមន្រ្តីឥណ្ឌា ប្រកាស កាលពីយប់ថ្ងៃអាទិត្យ នៅបន្ទាប់ពី បម្រាមគោរពស្ម័គ្រចិត្ត រយៈពេល ១៤ម៉ោងបានឈានចូលដល់ទីបញ្ចប់។
សម្រាប់នាយករដ្ឋមន្រ្តីឥណ្ឌា លោកណារិនដ្រា ម៉ូឌី បម្រាមគោរព ស្ម័គ្រចិត្ត រយៈពេល ១៤ម៉ោង កាលពីថ្ងៃអាទិត្យ ជាការហាត់សមរបស់ប្រជាជនឥណ្ឌា ដើម្បីត្រៀម ខ្លួន ស្ថិតនៅតែក្នុងផ្ទះ ក្នុងរយៈពេលយូរអង្វែងដែល មានការបិទទីក្រុង ដើម្បី ចូលរួមកាត់បន្ថយ ការឆ្លងមេរោគកូរ៉ូណា។
“នេះគ្រាន់តែជាការចាប់ផ្តើមនៃការប្រយុទ្ធប្រឆាំងដ៏យូរអង្វែងមួយ។ ប្រជាជនរបស់ប្រទេសឥណ្ឌា បានប្រកាសថា ពួកគេអាចបន្តប្រយុទ្ធយកឈ្នះ បើសិន គេសម្រេចចិត្តថា ធ្វើ” នេះជាសាររបស់លោកនាយករដ្ឋមន្រ្តីនៅក្នុងបណ្តាញសង្គមTwitter កាលពីថ្ងៃអាទិត្យ។
ទីក្រុងញូវដេលី ដែលមានប្រជាជន ២០លាននាក់ បានបិទព្រំដែនរបស់ខ្លួន បិទហាង និងការិយាល័យឯកជន រហូតដល់ថ្ងៃទី ៣១មីនា។ រដ្ឋផ្សេងទៀត បានបិទ ព្រំដែនទាំងមូល ឬ បិទតែស្រុកណាដែលមានផ្ទុះការរាតត្បាតកូរ៉ូណាវីរុស កាត់បន្ថយ ការធ្វើដំណើរ និងបិទមធ្យោបាយធ្វើដំណើរសឹងទាំងស្រុង។ ក្រុមហ៊ុនអយស្ម័យយានឥណ្ឌាបានលុបចោល សេវាដឹកជញ្ជូនរបស់ខ្លួនភាគច្រើន ដោយរក្សាទុកតែការដឹកជញ្ជូនទំនិញ និងចរាចរណ៍នៅជាយក្រុង។
ឥណ្ឌា ដែលមានប្រជាជនច្រើនជាងគេទី២ ក្នុងពិភពលោក បន្ទាប់ពីប្រទេសចិន ប្រមាណ ១៣០០លាននាក់ រកឃើញមានចំនួនអ្នកឆ្លង ៣៦០នាក់ និងមនុស្សស្លាប់ ៧នាក់ ដោយសារកូរ៉ូណាវីរុស។ សម្រាប់អ្នកជំនាញ កង្វះតេស្តរកមេរោគ ធ្វើឲ្យគេជឿថា ចំនួនអ្នកឆ្លងមេរោគកូរ៉ូណា មានចំនួនច្រើនជាងនេះឆ្ងាយណាស់។ មន្រ្តីឥណ្ឌាអះអាងថា តេស្តរកមេរោគកូរ៉ូណាធ្វើសម្រាប់តែអ្នកដែលចេញរោគសញ្ញា និងដែលធ្លាប់ប៉ះពាល់អ្នកជំងឺកូវីដ ១៩ កន្លងមក។
ឥណ្ឌាស្ថិតក្នុងចំណោមប្រទេសផ្សេងទៀត នៅក្នុងតំបន់ អាស៊ីខាងត្បូង ដែលមានប្រជាជនរស់នៅកកកុញ ជិតគ្នា ដែលអាចប្រឈមខ្លាំងនឹងការឆ្លងមេរោគកូរ៉ូណា។ អ្នកជំនាញព្រមានថា ឥណ្ឌាដែលកំពុងមានវិស័យសុខាភិបាលខ្សត់ខ្សោយ ខ្វះគ្រូពេទ្យ និងមន្ទីរពេទ្យ នឹងមិនអាចជៀសផុត ពីការកើនឡើងនៃចំនួនអ្នកឆ្លងមេរោគកូរ៉ូណានោះទេ។ នៅទីក្រុងប៊ុមបៃ ប្រជាជននៅតំបន់ជាយក្រុង ដ៏ក្រីក្រធំជាងគេក្នុងពិភពលោកបាននិយាយថា ដោយសារតែប៉ូលិសហាមមិនឲ្យប្រជាជនដើរចេញក្រៅ ពួកគេត្រូវស្ថិតនៅប្រជ្រៀតគ្នា ក្នុងខ្ទម ដែលធ្វើឲ្យពួកគេកាន់តែខ្លាចខ្លាំងពីលទ្ធភាពឆ្លងមេរោគកូរ៉ូណា៕ RFI
