អាងហែលទឹកបែបសិប្បនិម្មិតលើផ្ទៃដី៦ហិកតា នឹងបង្ហាញខ្លួននៅកម្ពុជាក្នុងពេលឆាប់ៗខាងមុខ
អាងហែលទឹកបែបសិប្បនិម្មិតលើផ្ទៃដី៦ហិកតា នឹងបង្ហាញខ្លួននៅកម្ពុជាក្នុងពេលឆាប់ៗខាងមុខឆ្នេររាម គឺជាគោលដៅទេសចរណ៍មួយដែលរដ្ឋាភិបាលបានកំណត់ទុក ហើយតំបន់នេះក៏កំពុងមានការចាប់អារម្មណ៍ពីសំណាក់អ្នកវិនិយោគធំៗផងដែរ ឯគម្រោងអភិវឌ្ឍន៍របស់រដ្ឋក៏មានវត្តមានលើទីតាំងនេះក្រាស់ក្រែល ដែលធ្វើឱ្យតំបន់នេះ កាន់តែមានភាពទាក់ទាញថែមទៀត ទោះបីពីមុនជាកន្លែងដ៏ស្ងាត់ជ្រងំក្ដី។
នៅមុននេះបន្តិច ការចុះផ្សាយលើផេកផ្លូវការរបស់ក្រុមហ៊ុន FURI Real Estate បានឱ្យដឹងថា អាងហែលទឹកសិប្បនិម្មិត ដែលល្បីជាង៣០ប្រទេសជុំវិញពិភពលោក ឈ្មោះថា Crystal Lagoon នឹងមានវត្តមាននៅតំបន់ឆ្នេររាម ក្នុងពេលឆាប់ៗនេះ។
«Crystal Lagoon វាជាអាងហែលទឹកបែបសិប្បនិម្មិតហើយល្បីជាង៣០ប្រទេសជុំវិញពិភពលោកអីឡូវនេះបានមកដល់តំបន់ឆ្នេររាមខេត្តព្រះសីហនុហើយ» ។ នេះជាសម្រង់ប្រយោគរបស់ផេក FURI Real Estate នៅថ្ងៃទី ២០ ខែ កុម្ភៈ ឆ្នាំ២០២០ នេះ។
គួរជម្រាបផងដែរថា អាងហែលទឹកសប្បនិមិ្មត នេះស្ថិតក្រោមគម្រោងអភិវឌ្ឍន៍ដែលមានឈ្មោះថា Crystalville Ream Beach ចំណាយទុនវិនិយោគ ប្រមាណ១០០០ លានដុល្លារអាមេរិក លើផ្ទៃដីទំហំ៤៣ ហិកតា ដោយមានការអភិវឌ្ឍជា ៣ដំណាក់កាល ក្នុងនោះមាន ការសាងសង់ជាលំនៅដ្ឋានប្រភេទវីឡាកម្រិតអភិជន មជ្ឈមណ្ឌលពាណិជ្ជកម្ម សណ្ឋាគារកម្រិតផ្កាយ៥ និងផ្សារទំនើប ជាដើម។ គម្រោងដ៏មហិមានៅតំបន់ឆ្នេររាមនេះ ត្រូវបានវិនិយោគរួមគ្នារវាងក្រុមហ៊ុនក្នុងស្រុក FURI Corporation និងក្រុមហ៊ុនមកពីប្រទេសសឹង្ហបុរី។
គួរបញ្ជាក់ផងដែរថា សម្រាប់អាងហែលទឹកដ៏ទាន់សម័យនេះ គឺស្ថិតក្នុងដំណាក់ទី២នៃគម្រោងយក្ស Crystalville Ream Beachនេះ ដែលសាងសង់លើ ទំហំដីរហូតទៅដល់៦ហិកតា ក្រោមជំនាញរបស់ក្រុមហ៊ុនមកពីសាំងហ្គាពួរ ហើយក៏ជាលក្ខណៈពិសេសដែលស្ថិតនៅចំកណ្តាលគម្រោង Crystalville Ream Beach ផងដែរ។
អត្ថបទ៖ Business Cambodia
