ម្ចាស់នាវា Westerdam ថ្លែងអំណរគុណកម្ពុជា ចំពោះសណ្តានចិត្តដ៏ល្អ ស្វាគមន៍នាវារបស់លោកយ៉ាងកក់ក្តៅ

ម្ចាស់នាវា Westerdam ថ្លែងអំណរគុណកម្ពុជា ចំពោះសណ្តានចិត្តដ៏ល្អ ស្វាគមន៍នាវារបស់លោកយ៉ាងកក់ក្តៅ

នៅថ្ងៃទី១៨ ខែកុម្ភៈ ឆ្នាំ២០២០ លោកនាយករដ្ឋមន្ត្រី ហ៊ុន សែន បានទទួលជួបជាមួយលោក Orlando Ashford ប្រធានក្រុមហ៊ុន Holland America Line ម្ចាស់នាវាទេសចរណ៍ Westerdam។ ក្នុងជំនួបនោះ លោក Orlando Ashford បានថ្លែងអំណរគុណយ៉ាងជ្រាលជ្រៅចំពោះលោក ហ៊ុន សែន និងប្រជាពលរដ្ឋកម្ពុជាក៏ដូចជាអាជ្ញាធរកម្ពុជាចំពោះសណ្តានចិត្តដ៏ល្អប្រកបដោយភាពកក់ក្តៅ និងជួយថែរក្សាទទួលអ្នកដំណើរ និងពិនិត្យជំងឺជូនដល់អ្នកដំណើរ ជាពិសេសទៀតនោះអនុញ្ញាតឲ្យកប៉ាល់ចុះចតនៅខេត្តព្រះសីហនុ។ លោកបានជម្រាបជូនផងដែរថា ថ្ងៃនេះ ឬថ្ងៃស្អែកនឹងមានយន្តហោះមកដឹកអ្នកដំណើរទាំងនោះត្រឡប់ទៅប្រទេសគាត់វិញហើយ។

លោកនាយករដ្ឋមន្ត្រី ហ៊ុន សែន បានថ្លែងអំណរគុណចំពោះពាក្យពេចន៍ដ៏ល្អរបស់លោក លោក Orlando Ashford ដែលជា ប្រធានក្រុមហ៊ុន Holland America Line។ ទន្ទឹមនឹងនោះ លោក បានមាន ប្រសាសន៍ថា បន្ទាប់ពីបានទទួលដំណឹងថា នាវាមានបំណងចូលចតនៅកម្ពុជាលោកបានសម្រេចចិត្តអនុញ្ញាតឲ្យចូលចតភ្លាមដោយយល់ឃើញថា បញ្ហាមនុស្សធម៌គឺជាបញ្ហាសំខាន់ ប្រសិនបើកម្ពុជាមិនអនុញ្ញាតឲ្យចូលចតទេនោះ នាវាមិនដឹងជាចូលចតនៅទីណានោះទេហើយអ្នកធ្វើដំណើរនៅលើនាវានោះនឹងមានការព្រួយបារម្ភ ហើយបើមានអ្វីកើតឡើង ជាពិសេសបើមានជំងឺរាតត្បាតនោះនឹងប៉ះពាល់ដល់អ្នកដទៃទៀត។ ក្នុងន័យនេះ លោក បានសម្រេចចិត្តភ្លាមៗ និងមានការសប្បាយចិត្តដោយឃើញនាវាបានមកចូលចត និងអ្នកដំណើរទាំងអស់មិនមានជំងឺកើតឡើង និងមានសុវត្ថិភាព ។

លោកនាយករដ្ឋមន្ត្រី ហ៊ុន សែន បានវាយតម្លៃខ្ពស់ចំពោះក្រុមហ៊ុនដែលបានយកចិត្តទុកដាក់ចំពោះអ្នកធ្វើដំណើរតាមនាវាទេសចរណ៍ Westerdam មិនត្រឹមតែរៀបចំជប់លៀង និងយកចិត្តទុកដាក់លើសុខភាពប៉ុណ្ណោះទេថែមទាំងរៀបចំយន្តហោះឲ្យអ្នកដំណើរទាំងនោះបានវិលត្រឡប់ទៅកាន់ប្រទេសគាត់វិញផងដែរ។

ទន្ទឹមនឹងនោះ លោកនាយករដ្ឋមន្ត្រី​ ហ៊ុន សែន បានមានប្រសាសន៍បន្ថែមទៀតថាអ្វីដែលគួរឲ្យកត់សម្គាល់មាន០៣ចំណុច៖
ទី១) លោក បានថ្លែងអំណរគុណដល់ក្រុមហ៊ុនដែលបានគិតដល់កម្ពុជាពាក់ព័ន្ធនឹងការងារមនុស្សធម៌នៅពេលដែលការងារមនុស្សធម៌ត្រូវការចាំបាច់បំផុតនោះ គឺក្រុមហ៊ុនបានមកដល់កម្ពុជាយើងដើម្បីអនុញ្ញាតឲ្យកម្ពុជាទទួលធ្វើការងារមនុស្សធម៌បម្រើដល់មនុស្សជាតិ។ ទី២) លោក បានធ្វើការកត់សម្គាល់ថាអ្វីដែលក្រុមហ៊ុនបានធ្វើនោះពិតជាការយកចិត្តទុកដាក់ខ្ពស់ចំពោះអ្នក ដំណើរនៅក្នុងនាវានោះ។
ទី៣) ដែលជាកត្តាសំខាន់នោះ គឺទាំងអ្នកធ្វើដំណើរ ទាំងអ្នកគ្រប់គ្រង និងអ្នកបើកបរនាវា រួមទាំងអាជ្ញាធរដែនដី គឺបានសហការគ្នាល្អធ្វើយ៉ាងណាបានជួយដល់អ្នកធ្វើដំណើរតាមនាវានេះ ហើយនៅក្នុងរយៈពេលមួយថ្ងៃ ពីរថ្ងៃទៀតពួកគាត់នឹងបានវិលត្រឡប់ទៅកាន់ប្រទេសគាត់វិញ៕