១១ វិធីជួយអ្នករវល់ដាច់យប់ បន្តធ្វើការបានធម្មតា
១១ វិធីជួយអ្នករវល់ដាច់យប់ បន្តធ្វើការបានធម្មតា
១១ វិធីជួយអ្នករវល់ដាច់យប់ បន្តធ្វើការបានធម្មតាជាទូទៅមនុស្សត្រូវការសម្រាកគ្រប់គ្រាន់មានរយៈពេលពី ៦ ទៅ ៩ ម៉ោង។ ពេលខ្លះដោយសារកត្តាការងារប្រញាប់ប្រញាល់ក្នុងការសម្រេចឲ្យហើយ ឬហេតុផលផ្ទាល់ខ្លួនផ្សេងៗ អ្នកប្រហែលប្រើកាហ្វេជំនួយបន្ថែមកុំឲ្យឆាប់ងងុយច្រើនកែវ ឈានដល់ជ្រុលម៉ោងសម្រាក និយាយឲ្យស្រួលស្ដាប់ គេងមិនបានគ្រប់ម៉ោង ដែលនឹងធ្វើឲ្យសមត្ថភាពបំពេញការងារចុះខ្សោយពេលព្រឹកឡើង។
វិធីណែនាំនេះ នឹងជួយយ៉ាងហោចណាស់ អាចឲ្យអ្នកបំពេញការងារបានប្រសើរមួយកម្រិត៖
១) ជជែកលេងជាមួយមិត្តភក្ដិរួមការងារ
ការគេងមិនគ្រប់គ្រាន់នឹងធ្វើឲ្យអ្នកបាត់បង់សមត្ថភាពផ្ដោតអារម្មណ៍ ឬយកចិត្តទុកដាក់លើការងារ។ ពេលដល់កន្លែងការងារ គួរជជែកកម្សាន្តជាមួយមិត្តរួមការងារពីនេះពីនោះ ដោយផ្ដោតលើការស្ដាប់ ឆ្លើយឆ្លង និងមានកាយវិការ ដើម្បីជំរុញឲ្យខួរក្បាលសកម្ម។
២) ទទួលទានទឹកត្រជាក់ឲ្យបានច្រើន
គួរទទួលទានទឹកត្រជាក់ឲ្យបានច្រើន ជួយដល់រាងកាយចាប់ផ្ដើមថ្ងៃថ្មី។ វាជួយដល់កោសិកាសរីរាង្គ និងឈានដល់ជួយដល់រាងកាយទាំងមូល។
៣) នៅក្បែរៗអ្នកទទួលទានកាហ្វេ
អ្នកមិនត្រូវការទទួលទានកាហ្វេច្រើននោះទេ។ ការសិក្សាបង្ហាញថា ត្រឹមស្រង់ក្លិនកាហ្វេ ក៏អាចជួយជំរុញដល់ខួរក្បាល ធ្វើឲ្យមានអារម្មណ៍ធូរស្រាល សប្បាយ។ មនុស្សសប្បាយ មានលទ្ធភាពបំពេញការងារលើស ១០% ទៅ ១២% ជាងអ្នកមិនសូវសប្បាយចិត្ត។
៤) ទាញប៊ិចមកសរសេរ
គួរសរសេរចេញមកអ្វីក្នុងខួរក្បាល ដែលត្រូវការធ្វើសម្រាប់ថ្ងៃនេះ ហើយធ្វើយ៉ាងម៉េចទើបសម្រេចបាន នេះនឹងជួយជំរុញទឹកចិត្តអ្នក។
៥) ជ្រើសរើសប្រធានបទផ្សេង
ពេលអ្នកហត់នឿយ ងាយស្រួលនឹងធុញថប់ក្នុងការបំពេញការងារស្មុគស្មាញណាស់។ បើមិនអាចយកចិត្តទុកដាក់លើការងារបានទេ អ្នកអាចស្វែងរកការងារសាមញ្ញងាយៗផ្សេងទៀត មកបំពេញ ជាការផ្លាស់ប្ដូរប្រធានបទក្នុងការយកចិត្តទុកដាក់។ នេះនឹងជួយជំរុញទំនុកចិត្តដល់អ្នក ឈានដល់ការត្រលប់ទៅបំពេញការងារពិបាកនោះវិញ។
៧) ជ្រើសរើសចម្រៀងស្ដាប់ឲ្យបានត្រឹមត្រូវ
បើអ្នកត្រូវការផ្ដោតអារម្មណ៍លើការអាន សរសេរ ឬការងារផ្សេងៗ តន្ត្រីអាចជួយអ្នកបាន។ ការមានសំឡេងរំខាន (តន្ត្រី) តិចៗ នៅផ្ទៃខាងក្រោយ អាចជួយជំរុញខួរក្បាល ឈានដល់ការបំពេញការងារមានប្រសិទ្ធភាព។
៨) បំបែកការងារទៅជាតូចៗ
អ្នកអាចបំបែកការងារជាចំណុចតូចៗ រួចជ្រើសរើសមកបំពេញ។ នេះនឹងជួយឲ្យអ្នកមានអារម្មណ៍ល្អ និងមានគំនិតវិជ្ជមានក្នុងការបំពេញការងារបន្ថែម។ ចំណុចតូចៗនេះហើយ ដែលនឹងបន្ធូរបន្ថយអារម្មណ៍អ្នក ពេលអ្នកគេងមិនបានគ្រប់គ្រាន់។
៩) ទុកទូរសព្ទទៅមួយឡែក
អ្នកប្រហែលបានពិនិត្យមើលទូរសព្ទប្រមាណ ១៥០ ដងក្នុងមួយថ្ងៃ ហើយ ៦៧% ទាំងអស់គ្នាប្រហែលធ្វើដូចគ្នា ដោយមិនទាំងមាន Notification អ្វីបញ្ជូនមក។
ការសម្រេចការងារបានលទ្ធផល និងការគ្រប់គ្រងពេលវេលា ទាមទារបញ្ចៀសការរំខាន។ ជាពិសេស ពេលអ្នកគេងមិនគ្រប់គ្រាន់ មិនគួរឲ្យមានការរំខានដោយទូរសព្ទនោះទេ។ ដូច្នេះ អ្នកអាចដាក់ទូរសព្ទ Silent ឬទុកមួយឡែក។ នេះនឹងជួយឲ្យអ្នកផ្ដោតអារម្មណ៍លើការងារ។
១០) ឈរ
អ្នកមានការហត់នឿយ ដោយសារការគេងមិនបានគ្រប់គ្រាន់ ហើយរាងកាយនឹងព្យាយាមសម្រាក ពេលអ្នកអង្គុយស្រណុកលើកៅអីទន់ៗ។ អ្នកគួរប្រឆាំង ដោយអាចលុបមុខ ឈរធ្វើការ (ប្រើតុឈរ) ជារួមកុំឲ្យរាងកាយស្រណុកពេក។ នេះនឹងជួយអ្នកបំពេញការងារបានយូរអង្វែង។
១១) បំពេញការងារបែបច្នៃប្រឌិតជាមុន
អ្នកគួរបំពេញការងារមានលក្ខណៈច្នៃប្រឌិតជាមុន ព្រោះការងារប្រភេទនេះមានលក្ខណៈសប្បាយ ងាយស្រួលដាស់ខួរក្បាលឲ្យដំណើរការបានធម្មតា។ ឬនិយាយមួយបែបទៀត រកការងារណាមួយ អ្នកពេញចិត្តខ្លាំងនឹងធ្វើជាមុន។
ត្បិតអ្នកហត់នឿយ ដោយការគេងមិនលក់ ជាមួយហេតុផលផ្សេងៗ តែម៉ោងការងារ គឺការងារ ដែលតម្រូវឲ្យមានការយកចិត្តទុកដាក់ក្នុងការបំពេញ លើការងារបានទទួល។ បើអ្នកមិនអាចទប់ទល់បាន ប្រហែលអាចដាក់ច្បាប់សម្រាកមួយថ្ងៃ៕
ប្រភព៖ Sabay
