អាជ្ញាធរជាតិអប្សរាអនុញ្ញាតឱ្យស្ដារត្រពាំងបុរាណចំនួន៨នៅស្រុកពួកដើម្បីរក្សាទឹកទុកប្រើប្រាស់រដូវប្រាំង
អាជ្ញាធរជាតិអប្សរាអនុញ្ញាតឱ្យស្ដារត្រពាំងបុរាណចំនួន៨នៅស្រុកពួកដើម្បីរក្សាទឹកទុកប្រើប្រាស់រដូវប្រាំងត្រពាំងបុរាណចំនួន៨កន្លែង ស្ថិតនៅឃុំដូនកែវ ស្រុកពួក ខេត្តសៀមរាប ដែលស្ថិតក្នុងតំបន់រមណីយដ្ឋានអង្គរ ត្រូវបានអនុញ្ញាតឱ្យស្ដារឡើងវិញ ដើម្បីជាប្រយោជន៍ដល់អ្នកភូមិសម្រាប់រក្សាទឹកទុកប្រើប្រាស់នារដូវប្រាំង ក៏ដូចជាដើម្បីប្រយោជន៍សហគមន៍ទាំងមូល។
ត្រពាំងបុរាណចំនួន៨កន្លែង ដែលនឹងធ្វើការស្ដារឡើងវិញ ត្រូវបាននាយកដ្ឋានជំនាញចុះវាយតម្លៃរួចហើយ និងយល់ថាគួរអនុញ្ញាតបាន ប៉ុន្តែការស្ដារនេះគួរជៀសវាងស្ដារយកទៅធ្វើអាជីវកម្ម ឬកេងចំណេញផលប្រយោជន៍ណាមួយ។ ត្រពាំងទាំង៨កន្លែងខាងលើ រួមមាន៖
- ត្រពាំងកក់
- ត្រពាំងល្បើក
- ត្រពាំងវ៉េង
- ត្រពាំងតាស្នេហ៍
- ត្រពាំងគក់
- ត្រពាំងទ្រាស
- ត្រពាំងប្រនេត្រ
- ត្រពាំងឈកស្នាយ។
ជាគោលការណ៍គឺអាជ្ញាធរជាតិអប្សរា តែងសហការជាមួយនឹងអាជ្ញាធរមូលដ្ឋាននានាដែលមានបំណងស្ដារត្រពាំងបុរាណនានា ក្នុងបំណងរក្សាត្រពាំងឱ្យនៅគង់វង្សផង ជៀសវាងការយកទីតាំងនោះទៅប្រើប្រាស់អ្វីផ្សេង ឬចាក់ដីលុបតែម្ដងពេលវាកាន់តែរាក់។ បន្ថែមពីនេះ វាក៏ជាកិច្ចការងារថែរក្សា និងអភិរក្សនូវត្រពាំងបុរាណដែលនៅសេសសល់ ជៀសវាងមានជនខិលខូចលួចបន្លំយកធ្វើកម្មសិទ្ធិឯកជននៅពេលត្រពាំងបុរាណទាំងនេះមិនមានទឹក៕
