បទអត្ថាធិប្បាយ៖ ភរខាងលើ បោកខាងក្រោម!
បទអត្ថាធិប្បាយ៖ ភរខាងលើ បោកខាងក្រោម!
បន្ទាប់ពីបរាជ័យនៃផែនការវិលត្រឡប់ចូលស្រុក ៩ វិច្ឆិកា ២០១៩ ដើម្បីផ្តួលរំលំរាជរដ្ឋាភិបាលស្របច្បាប់ដឹកនាំដោយគណបក្សប្រជាជនកម្ពុជាមក មេភរមេបោក សម រង្ស៊ី កាន់តែបង្ហាញសាធារណៈជនថាខ្លួនកាន់តែអស់តម្លៃច្រើនឡើងៗនៅក្នុងចំណោមអ្នកគាំទ្ររបស់ខ្លួនទាំងក្នុងនិងក្រៅប្រទេស។ នេះជាការពិតដែលយើងមើលឃើញគ្រប់គ្នា នៅក្នុងជីវិតនយោបាយរបស់ សម រង្ស៊ី គឺមានតែការភូតកុហក បោកប្រាស់ អ្នកគាំទ្ររបស់ខ្លួនដូចជា៖ បោកលុយមូលនិធិ បោកអ្នកគាំទ្រនៅក្រៅប្រទេសដើម្បីរៃអង្គាសប្រាក់យកមកចាយវាយផ្ទាល់ខ្លួន បោកអ្នកគាំទ្រឱ្យជាប់គុកច្រវ៉ាក់ជាដើម។
នៅក្នុងផែនការវិលត្រឡប់ចូលស្រុករបស់ខ្លួន មេបោក សម រង្ស៊ី បានចំណេញប្រាក់មិនស្ទើរឡើយដែលខ្លួនបានដើររៃអង្គាសដូចជា៖ បុណ្យផ្កាប្រាក់ បុណ្យភ្ជុំបិណ្ឌ និងលុយឧបត្ថម្ភពីវេទិកាផ្សេងៗក្រោមហេតុផលសម្រាប់ចំណាយដើម្បីចូលស្រុក ប៉ុន្តែតាមការពិតគឺខ្លួនមិនមានចេតនាចូលស្រុកពិតប្រាកដឡើយពោលគឺយកលុយទាំងនោះដើម្បីមកចាយវាយហ៊ឺហាផ្ទាល់ខ្លួនតែប៉ុណ្ណោះរឿងអីថាចូលមកជាប់គុកនៅកម្ពុជាទាំងវ័យចាស់ជរាបែបនេះ។ បើគាត់ពិតជាចង់ចូលមែនច្បាស់ជាអាចទៅរួចព្រោះគាត់អះអាងថា មានកម្មករខ្មែរនៅថៃជាង២លាននាក់អមដំណើរគាត់ កងកម្លាំងបន្តិចបន្តួចនៅតាមព្រំដែនពិតជាទប់មិនជាប់ឡើយជាមួយនឹងកម្លាំងកម្មកររាប់លាននាក់ដែលត្រូវគាត់អះអាងថាដូចជាស៊ូណាមីនោះប៉ុន្តែកុំថាឡើយ២លាននាក់សូម្បីតែ២០នាក់ក៏គ្មានដែរ។
ដោយសារតែជាមនុស្សពូកែបោកប្រាស់និងញុះញង់ដូចនេះហើយ ទើប សម រង្ស៊ី មិនត្រូវបានបរទេសស្វាគមន៍នោះឡើយសូម្បីតែប្រទេសម៉ាឡេស៊ី និងឥណ្ឌូណេស៊ី ក៏គេមិនស្វាគមន៍ហើយគេអនុញាតិឱ្យជួបនោះគ្រាន់តែជាលក្ខណៈបុគ្គលតែប៉ុណ្ណោះសូម្បីតែនៅក្នុងកិច្ចប្រជុំអន្តរសភាក៏គេមិនឱ្យបុគ្គលនេះចូលមកញុះញង់ឡើយព្រមទាំងបណ្តេញចេញយ៉ាងអាម៉ាស់ជាទីបំផុត។ រហូតមកដល់ពេលនេះ បរទេសចាត់ទុកសម រង្ស៊ី គ្រាន់តែជាកូនអុក ឬក៏ជាក្រដាសអនាម័យ (Toilet paper) ដែលគេប្រើប្រាស់ក្នុងបង្គន់ក្រោយបន្ទោរបង់តែប៉ុណ្ណោះ។
ពេលនេះ សម រង្ស៊ី បរាជ័យងើបមុខមិនរួច ដោយសារតែភាពកំសាករបស់ខ្លួនដែលមិនហ៊ានវិលចូលស្រុកដូចខ្លួនបានសន្យា និងបានបោកប្រាស់សកម្មជន និងអ្នកគាំទ្ររបស់ខ្លួនម្តងហើយម្តងទៀត។ ជីវិតនយោបាយចុងក្រោយរបស់សម រង្ស៊ី ត្រូវបានបញ្ចប់ហើយដោយសារតែខ្លួនបានដើរហួសបន្ទាត់ក្រហមដោយការប្រមាថព្រះមហាក្សត្រដែលជាទីគោរពសក្ការៈរបស់ប្រជារាស្រ្តខ្មែរទាំងអស់ និងធ្វើរដ្ឋប្រហារផ្តួលរំលំរាជរដ្ឋាភិបាលស្របច្បាប់។
សរុបមក ពាក្យពីរឃ្លាយ៉ាងខ្លីនេះល្មមគ្រប់គ្រាន់ក្នុងការរៀបរាប់ពីចរិតលក្ខណៈរបស់ សម រង្ស៊ី គឺ «ភរខាងលើ បោកខាងក្រោម»។ ភរខាងលើនោះ គឺការកុហកញុះញង់អ្នកគាំទ្រនៅបរទេសដើម្បីបានរៃអង្គាសប្រាក់យកមកចាយវាយហ៊ឺហាផ្ទាល់ខ្លួន ចំណែកបោកខាងក្រោមនោះ គឺការបោកប្រាស់សកម្មជននិងអ្នកគាំទ្ររបស់ខ្លួននៅក្នុងប្រទេសឱ្យជាប់គុកជំនួសខ្លួន៕
ដោយ៖ សារ៉ាដា
