លោកនាយករដ្ឋមន្រ្តី ហ៊ុន សែន៖ ពិដានប្រាក់បៀវត្សដែលត្រូវជាប់ពន្ធសម្រាប់ឆ្នាំ២០២០ គឺចាប់ពី ១លាន ២សែនរៀល ដល់ ១លាន ៣សែនរៀល

លោកនាយករដ្ឋមន្រ្តី ហ៊ុន សែន៖ ពិដានប្រាក់បៀវត្សដែលត្រូវជាប់ពន្ធសម្រាប់ឆ្នាំ២០២០ គឺចាប់ពី ១លាន ២សែនរៀល ដល់ ១លាន ៣សែនរៀល

លោកនាយករដ្ឋមន្រ្តី ហ៊ុន សែន បានថ្លែងថា តាមការគ្រោងទុកពិដាននៃពន្ធបៀវត្សអប្បបរមាជាប់ពន្ធនឹងត្រូវដំឡើង ពី១លាន២សែនរៀល ដល់១លាន៣សែនរៀលសម្រាប់ឆ្នាំ២០២០ ។ លោកបានថ្លែងដូចនេះ នៅព្រឹកថ្ងៃទី២៥ ខែតុលា ឆ្នាំ២០១៩ នៅក្នុងកិច្ចប្រជុំពេញអង្គគណៈរដ្ឋមន្ត្រី ដែលប្រព្រឹត្តទៅនៅវិមានសន្តិភាព រាជធានីភ្នំពេញ។

លោកនាយករដ្ឋមន្រ្តី ហ៊ុន សែន បានបញ្ជាក់ថា ក្នុងការអនុវត្តជាក់ស្តែង កម្រិតអប្បបរមានៃប្រាក់បៀវត្សដែលត្រូវជាប់ពន្ធត្រូវបានធ្វើវិសោធនកម្មជាបន្តបន្ទាប់នៅក្នុងច្បាប់ស្តីពីហិរញ្ញវត្ថុប្រចាំឆ្នាំសរុបចំនួនបីលើករួចមកហើយដូចជា៖ លើកទី១- ពី៥០ម៉ឺនរៀល ដល់៨០ម៉ឺនរៀល នៅឆ្នាំ២០១៥ លើកទី២- ពី៨០ម៉ឺនរៀល ដល់១លានរៀល នៅឆ្នាំ២០១៧ លើកទី៣- ពី១លានរៀល ដល់១លាន២សែនរៀល នៅឆ្នាំ២០១៨។

លោកនាយករដ្ឋមន្រ្តី ហ៊ុន សែន ក៏បានគូសបញ្ជាក់ថា ចាប់តាំងពីនីតិកាលទី៥នៃរដ្ឋសភាមក ក្នុងការអនុវត្តគោលនយោបាយលើកកម្ពស់ជីវភាពរស់នៅរបស់មន្រ្តីរាជការស៊ីវិល គ្រូបង្រៀន គ្រូពេទ្យ នគរបាលជាតិ និងយោធិន ក៏ដូចជាកម្មករនិយោជិត រាជរដ្ឋាភិបាលកម្ពុជា បានខិតខំផ្តោតការយកចិត្តទុកដាក់ជាប្រចាំក្នុងការដំឡើងប្រាក់បៀវត្សអប្បបរមា និងប្រាក់ឈ្នួលអប្បបរមា។

ស្របជាមួយគ្នានេះផងដែរ រាជរដ្ឋាភិបាលតែងគិតគូរធានាឱ្យប្រាក់បៀវត្សអប្បបរមា និងប្រាក់ឈ្នួលអប្បបរមា ដែលត្រូវបានដំឡើងនោះ ត្រូវតែរួចផុតពីកាតព្វកិច្ចបង់ពន្ធលើប្រាក់បៀវត្សក្នុងស្មារតីជួយសម្រួលបន្ទុកសម្រាប់មន្រ្តីរាជការក៏ដូចជាកម្មករ និយោជិតមួយកម្រិតថែមទៀត៕