ទីតាំងសម្រាប់ប្រជាពលរដ្ឋឡើងជិះរថយន្តក្រុង Free ទៅខេត្ត៧ នៅមុននិងក្រោយចូលឆ្នាំ
ទីតាំងសម្រាប់ប្រជាពលរដ្ឋឡើងជិះរថយន្តក្រុង Free ទៅខេត្ត៧ នៅមុននិងក្រោយចូលឆ្នាំ
រដ្ឋបាលរាជធានីភ្នំពេញ នឹងរៀបចំរថយន្តក្រុងសាធារណៈចំនួន ៦០គ្រឿងមានស្លាកសញ្ញា “រាជធានីភ្នំពេញ” សម្រាប់ឲ្យប្រជាពលរដ្ឋជិះដោយមិនបង់ប្រាក់ ចាប់ពីថ្ងៃទី១២ ដល់ ១៨ ខែមេសា ឆ្នាំ២០១៨ ទៅតាមបណ្តាខេត្តចំនួន៧ ដែលស្ថិតនៅតាមផ្លូវជាតិលេខ១ និងផ្លូវជាតិលេខ៥។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ នៅល្ងាចថ្ងៃទី១ ខែមេសា ឆ្នាំ២០១៨នេះ បានបង្ហាញអំពីកន្លែងរថយន្តក្រុងចេញដំណើរ ដែលអាជ្ញាធររាជធានី នឹងរៀបចំជូនប្រជាពលរដ្ឋ ចំនួន៣ទីតាំងដូចខាងក្រោម៖
- ទីតាំងទី១៖ នៅមហាវិថី សម្តេចតេជា ហ៊ុន សែន (ផ្លូវ៦០ម៉ែត្រ) ទល់មុខក្រុមហ៊ុន Mercedes Benz ដោយចូលតាមផ្លូវមុខវត្តចាក់អង្រែក្រោម ចម្ងាយប្រមាណ ៧០០ម៉ែត្រ ឬចូលតាមមហាវិថីសម្តេចតេជោ ហ៊ុន សែន ប្រមាណ ១៥០០ម៉ែត្រ សម្រាប់ប្រជាពលរដ្ឋដែលត្រូវធ្វើដំណើរតាមផ្លូវជាតិលេខ១ ឆ្ពោះទៅខេត្តកណ្តាល ព្រៃវែង និងស្វាយរៀង។
- ទីតាំងទី២៖ នៅចំណតសួនឫស្សីកែវ (ទីលានប្រជាធិបតេយ្យថ្មី) ផ្លូវជាតិលេខ៥ សង្កាត់ឫស្សីកែវ ខណ្ឌឫស្សីកែវ សម្រាប់ប្រជាពលរដ្ឋដែលត្រូវធ្វើដំណើរតាមផ្លូវជាតិលេខ៥ ឆ្ពោះទៅខេត្តកំពង់ឆ្នាំង ពោធិ៍សាត់ បាត់ដំបង និងខេត្តបន្ទាយមានជ័យ។
- ទីតាំងទី៣៖ នៅចំណុចប្រសព្វរវាងផ្លូវជាតិលេខ៤ និងមហាវិថីឈ្នះឈ្នះ (ផ្លូវកប់ស្រូវ) សង្កាត់ចោមចៅ ខណ្ឌពោធិ៍សែនជ័យ សម្រាប់ប្រជាពលរដ្ឋដែលត្រូវធ្វើដំណើរតាមផ្លូវជាតិលេខ៥ ឆ្ពោះទៅខេត្តកំពង់ឆ្នាំង ពោធិ៍សាត់ បាត់ដំបង និងខេត្តបន្ទាយមានជ័យ។
សូមជម្រាបថា ការជូនដំណឹងខាងលើនេះ គឺបន្ទាប់ពីការប្រកាសរបស់សម្តេចនាយករដ្ឋមន្រ្តី ហ៊ុន សែន កាលពីព្រឹកមិញ ក្នុងពិធីសំណេះសំណាលជាមួយគ្រូបង្រៀន នៅកោះពេជ្រ៕
ប្រភព៖ ខ្លីៗ
